TVK ఎమ్మెల్యేలతో విజయ్ కీలక భేటీ

Vijay Holds Key Meeting with MLAs

తమిళనాడులో కొత్త ప్రభుత్వ ఏర్పాటుపై రాజకీయ ఉత్కంఠ కొనసాగుతోంది. తొలి ఎన్నికల్లోనే అతిపెద్ద పార్టీగా అవతరించినప్పటికీ, ప్రభుత్వ ఏర్పాటుకు అవసరమైన మెజారిటీకి కొద్ది దూరంలో టీవీకే (తమిళగ వెట్రి కళగం) నిలిచిపోయింది. ఈ కీలక తరుణంలో పార్టీ అధ్యక్షుడు విజయ్ నేడు పనైయూర్‌లోని పార్టీ ప్రధాన కార్యాలయంలో కొత్తగా ఎన్నికైన ఎమ్మెల్యేలతో అత్యవసర సమావేశం ఏర్పాటు చేశారు.

ఇటీవల జరిగిన అసెంబ్లీ ఎన్నికల్లో 234 స్థానాలకు గాను టీవీకే 108 సీట్లు గెలుచుకుని సంచలనం సృష్టించింది. దశాబ్దాలుగా తమిళ రాజకీయాలను శాసిస్తున్న డీఎంకే, అన్నాడీఎంకేల ఆధిపత్యానికి గండి కొడుతూ విజయ్ పార్టీ చరిత్రాత్మక విజయం సాధించింది. అయినప్పటికీ ప్రభుత్వం ఏర్పాటు చేయడానికి అవసరమైన 118 మేజిక్ ఫిగర్‌కు ఇంకా 10 సీట్ల దూరంలో ఉంది. దీంతో ఇతర పార్టీలు, స్వతంత్ర శాసనసభ్యుల మద్దతు కూడగట్టే ప్రయత్నాల్లో టీవీకే నిమగ్నమైంది.

గత రెండు రోజులుగా తెరవెనుక మంతనాలు ముమ్మరంగా జరుగుతున్నాయి. ఈ నేపథ్యంలో ఎమ్మెల్యేలతో విజయ్ భేటీకి ప్రాధాన్యత ఏర్పడింది. మారుతున్న రాజకీయ పరిణామాలు, ఇతర పార్టీలతో జరుపుతున్న చర్చల పురోగతి, ప్రభుత్వ ఏర్పాటుకు ఉన్న అవకాశాలపై ఈ సమావేశంలో విజయ్ ప్రధానంగా చర్చించనున్నట్లు పార్టీ వర్గాలు తెలిపాయి.

ఈ క్లిష్ట సమయంలో ఎమ్మెల్యేలందరూ ఐక్యంగా ఉండాలని, వారికి భరోసా కల్పించేందుకే విజయ్ ఈ సమావేశం నిర్వహిస్తున్నారని సమాచారం. ప్రభుత్వ ఏర్పాటు ప్రక్రియ, రాజ్యాంగపరమైన అంశాలపై కూడా ఆయన ఎమ్మెల్యేలకు వివరించనున్నారు. చర్చలు జరుగుతున్నందున అనవసరమైన బహిరంగ వ్యాఖ్యలు చేయవద్దని, పార్టీ నాయకత్వానికి అందుబాటులో ఉండాలని కూడా విజయ్ సూచించే అవకాశం ఉంది.

సంఖ్యాబలంపై స్పష్టత రాకపోవడంతో ఈ వారంలో జరగాల్సిన ప్రమాణ స్వీకారోత్సవంపై నీలినీడలు కమ్ముకున్నాయి. రానున్న 48 గంటలు తమిళ రాజకీయాలకు అత్యంత కీలకమని, విజయ్ ప్రభుత్వ ఏర్పాటులో విజయం సాధిస్తారా లేదా, ప్రత్యర్థి కూటములు ప్రత్యామ్నాయ వ్యూహాలు రచిస్తాయా అనేవి తేలిపోతాయని రాజకీయ విశ్లేషకులు భావిస్తున్నారు. ఈ సమావేశం నేపథ్యంలో పనైయూర్‌లోని పార్టీ కార్యాలయం వద్ద భారీగా కార్యకర్తలు చేరుకునే అవకాశం ఉండటంతో పోలీసులు పటిష్ఠ భద్రతా ఏర్పాట్లు చేశారు.

Follow us