Land scam case : రాబర్ట్ వాద్రాకు ఎదురుదెబ్బ.. ఢిల్లీ కోర్టు నోటీసులు

Land scam case : కాంగ్రెస్ పార్టీ ఎంపీ ప్రియాంక గాంధీ భర్త, ప్రముఖ వ్యాపారవేత్త రాబర్ట్ వాద్రా పేరు మరోసారి వార్తల్లోకి ఎక్కింది. షికోహ్‌పూర్ భూముల ఒప్పందాల కేసులో ఆయనపై న్యాయస్థానం తాజా చర్యలు తీసుకుంది. ఢిల్లీలోని రౌస్ అవెన్యూ కోర్టు ఈ కేసులో ప్రధాన నిందితుడిగా వాద్రాతో పాటు మరో 11 మందికి నోటీసులు జారీ చేసింది. ఈ మనీలాండరింగ్ కేసు దర్యాప్తును నిర్వహించిన ఎన్‌ఫోర్స్‌మెంట్ డైరెక్టరేట్ (ఈడీ) తాజాగా ఈ కేసుకు సంబంధించిన ఛార్జిషీట్‌ను కోర్టులో దాఖలు చేసింది. ఈ ఛార్జిషీట్‌ను కోర్టు శనివారం విచారణకు స్వీకరించింది. తదుపరి విచారణను ఆగస్టు 28వ తేదీకి వాయిదా వేయడం జరిగింది. అదే రోజు రాబర్ట్ వాద్రా కోర్టు ఎదుట హాజరై తన వాదనను వినిపించాల్సి ఉంటుంది. ఈ కేసు మూలం 2008 సంవత్సరానికి చెందింది.

Read Also: Gold Prices: చుక్క‌లు చూపిస్తున్న బంగారం.. ఈరోజు ఎంత పెరిగిందో తెలుసా?

గురుగ్రామ్‌లోని షికోహ్‌పూర్ గ్రామంలో ఉన్న 3.53 ఎకరాల భూమిని రాబర్ట్ వాద్రాకు చెందిన కంపెనీ మెసర్స్ స్కై లైట్ హాస్పిటాలిటీ ప్రైవేట్ లిమిటెడ్ అక్రమంగా, తప్పుడు పత్రాలతో కొనుగోలు చేసిందని ఆరోపణలు ఉన్నాయి. ఈ భూమిని రూ. 7.5 కోట్లకు ఓంకారేశ్వర్ ప్రాపర్టీస్ ప్రైవేట్ లిమిటెడ్ నుంచి కొనుగోలు చేశారు. అనంతరం, అదే భూమిని 2012లో ప్రముఖ రియల్ ఎస్టేట్ సంస్థ డీఎల్‌ఎఫ్‌కు రూ. 58 కోట్లకు విక్రయించడం వివాదాస్పదమైంది. ఈ లావాదేవీల నేపథ్యంలో ఈడీ తన దర్యాప్తును ముమ్మరం చేసింది. అన్యాయ మార్గాల్లో సంపాదించిన నిధులను వాద్రా తనకు అనుబంధంగా ఉన్న పలు షెల్ కంపెనీల ద్వారా మళ్లించినట్లు ఈడీ ఛార్జిషీట్‌లో పేర్కొంది. ఈ లావాదేవీలకు సంబంధించి రాబర్ట్ వాద్రాకు చెందిన కంపెనీతో పాటు ఇతర ఆస్తులను ఈడీ అటాచ్ చేసింది. అటాచ్ చేసిన ఆస్తుల మొత్తం విలువను రూ. 37.64 కోట్లుగా పేర్కొంది.

ఇంతకుముందు, హర్యానా రాష్ట్రంలో ల్యాండ్ కన్సాలిడేషన్ డైరెక్టర్ జనరల్‌గా పనిచేసిన అశోక్ ఖేమ్కా, షికోహ్‌పూర్ భూముల మ్యుటేషన్‌ను రద్దు చేశారు. భూ మంత్రిత్వ శాఖ నిబంధనలను ఉల్లంఘించారని ఆయన పేర్కొనడం, అప్పట్లో పెద్ద రాజకీయ దుమారానికి దారి తీసింది. అప్పటి నుంచి ఈ భూ ఒప్పందానికి సంబంధించి న్యాయపరమైన మరియు పరిపాలనపరమైన విచారణలు కొనసాగుతూనే ఉన్నాయి. ఈ కేసులో వాద్రా పాత్రపై గతంలోనూ అనేక విమర్శలు, ఆరోపణలు వెలువడ్డాయి. కాంగ్రెస్ పార్టీ రాజకీయంగా ఎదుర్కొంటున్న సమస్యల నేపథ్యంలో, ఈ కేసు తిరిగి చర్చల్లోకి రావడం రాజకీయ వర్గాల్లో కలకలం రేపుతోంది. ప్రస్తుత పరిణామాలతో ఈ వ్యవహారం కొత్త మలుపు తిరిగే అవకాశాలున్నాయి. వాద్రాపై వచ్చిన ఈ ఆరోపణలు ఆయన వ్యక్తిగతంగా, రాజకీయంగా గణనీయమైన ఒత్తిడిని తీసుకురావచ్చు. ఆయన కోర్టులో తన వైపు వాదనలు ఎలా ఉంచతారన్నది, ఈ కేసు తీర్పుపై ఎంతటి ప్రభావం చూపుతుందన్నది చూడాల్సి ఉంది. మొత్తం మీద, షికోహ్‌పూర్ భూముల కేసులో తాజా పరిణామాలతో రాబర్ట్ వాద్రా రాజకీయ జీవితం మరోసారి ప్రశ్నార్థకంగా మారింది. ఆగస్టు 28న జరగనున్న తదుపరి విచారణ ఈ కేసులో కీలక మలుపుగా భావిస్తున్నారు.

Read Also: PM Kisan : పీఎం కిసాన్‌ నిధుల విడుదల.. మీ అకౌంట్లో డబ్బులు పడ్డాయో లేదో ఇలా చెక్ చేసుకోండి!