Recruitment scam: బెంగాల్ టీచర్ స్కామ్… 36,000 టీచర్లు డిస్మిస్
బెంగాల్ రిక్రూట్‌మెంట్ స్కామ్‌లో 36,000 మంది ప్రాథమిక ఉపాధ్యాయుల ఉద్యోగాలను రద్దు చేయాలని కలకత్తా హైకోర్టు ఆదేశించింది. ఈ ఉపాధ్యాయులందరూ శిక్షణ పొందని వారే.
- By Praveen Aluthuru Published Date - 07:21 AM, Sat - 13 May 23
Recruitment scam: బెంగాల్ రిక్రూట్‌మెంట్ స్కామ్‌లో 36,000 మంది ప్రాథమిక ఉపాధ్యాయుల ఉద్యోగాలను రద్దు చేయాలని కలకత్తా హైకోర్టు ఆదేశించింది. ఈ ఉపాధ్యాయులందరూ శిక్షణ పొందని వారే. వాస్తవానికి ఈ అన్ ట్రైన్డ్ టీచర్ల రిక్రూట్ మెంట్ లో పెద్ద ఎత్తున అక్రమాలు జరిగినట్లు ఆరోపణలు వచ్చాయి. ఇంత పెద్ద సంఖ్యలో ఉపాధ్యాయుల ఉద్యోగాలను ఒకేసారి రద్దు చేయడం దేశంలోనే తొలి సారి. గతంలో 2014లో త్రిపురలో దాదాపు 10,000 మంది ఉపాధ్యాయులను హైకోర్టు తొలగించింది.
కలకత్తా హైకోర్టు న్యాయమూర్తి అభిజిత్ గంగోపాధ్యాయ డిస్మిస్ అయిన టీచర్లు నాలుగు నెలల పాటు పాఠాలు చెప్పాల్సిందిగా, ఈ నాలుగు నెలలు వారికీ జీతం చెల్లించాలని తెలిపారు. దీంతో పాటు ఖాళీగా ఉన్న పోస్టుల భర్తీ ప్రక్రియను మూడు నెలల్లోగా పూర్తి చేయాలని రాష్ట్ర ప్రభుత్వాన్ని హైకోర్టు ఆదేశించింది. కాగా.. ప్రైమరీ ఎడ్యుకేషన్ బోర్డ్ ఖాళీగా ఉన్న పోస్టులలో కొత్తగా నియమించబడిన ఉపాధ్యాయుల నియామకానికి ఏర్పాట్లు చేస్తుంది. విశేషం ఏంటంటే.. ఉద్యోగాలు రద్దు చేయబడిన ఉపాధ్యాయులు ఇంతకుముందు శిక్షణ పొందినట్లయితే కొత్త రిక్రూట్‌మెంట్ ప్రక్రియలో పాల్గొనవచ్చని జస్టిస్ అభిజిత్ గంగోపాధ్యాయ చెప్పారు. ఈ కొత్త రిక్రూట్‌మెంట్ ప్రక్రియ ఖర్చులను రాష్ట్ర ప్రభుత్వం భరించలేకపోతే, అవసరమైతే ప్రాథమిక విద్యా మండలి మాజీ ఛైర్మన్ మరియు తృణమూల్ ఎమ్మెల్యే మాణిక్ భట్టాచార్య నుండి డబ్బు తీసుకోవచ్చని కూడా జస్టిస్ గంగోపాధ్యాయ చెప్పారు.
2016 నాటి ప్రాథమిక ఉపాధ్యాయ నియామక ప్రక్రియ మొత్తం రద్దు చేయబడుతుందని జస్టిస్ గంగోపాధ్యాయ తెలిపారు. రిక్రూట్‌మెంట్ ప్రక్రియలో చాలా అవకతవకలు జరిగాయని న్యాయవాది తరుణ్ జ్యోతి తివారీ తెలిపారు. రాష్ట్రంలో శిక్షణ పొందని ఉపాధ్యాయులకు ఉద్యోగాలు కల్పించారు. పిటిషనర్లతో పోలిస్తే ఉపాధ్యాయులుగా ఉద్యోగాలు పొందిన వారి సంఖ్య చాలా తక్కువన్నారు.
మరోవైపు హైకోర్టు ఆదేశాల మేరకు ఉపాధ్యాయులందరికీ నిబంధనల మేరకు శిక్షణ ఇచ్చామని ప్రాథమిక విద్యా మండలి చైర్మన్ గౌతమ్ పాల్ తెలిపారు. రిక్రూట్‌మెంట్ పరీక్షలో ఆప్టిట్యూడ్ టెస్ట్ కూడా తీసుకుంటారు. ఈ విషయంలో బోర్డు న్యాయ సలహా తీసుకుంటోందని తెలిపారు. హైకోర్టు సింగిల్‌ బెంచ్‌ ఆదేశాలను డివిజన్‌ బెంచ్‌లో సవాలు చేసే అంశాన్ని బోర్డు పరిశీలిస్తోంది.
