Rahul Gandhi: లోక్ సభలో ప్రతిపక్ష నేతగా రాహుల్ గాంధీ

Rahul Gandhi: కాంగ్రెస్‌ అధ్యక్షుడు మల్లికార్జున్‌ ఖర్గే ఇంట్లో ఇండియా కూట‌మి సమావేశం మంగళవారం జరిగింది. ఈ సమావేశంలో రాహుల్ గాంధీ (Rahul Gandhi)ని ప్రతిపక్ష నేతగా చేయాలని నిర్ణయం తీసుకున్నారు. అలాగే సమావేశంలో తీసుకున్న ఈ నిర్ణయంపై ప్రొటెం స్పీకర్ భర్తృహరి మహతాబ్‌కు లేఖ రాస్తూ సమాచారం అందించారు. మంగళవారం రాత్రి ఖర్గే ఇంట్లో జరిగిన ఇండియా కూట‌మి సమావేశం అనంతరం కాంగ్రెస్‌ సీనియర్‌ నేత, ఎంపీ కేసీ వేణుగోపాల్‌ మాట్లాడుతూ.. రాహుల్‌ గాంధీని సభలో ప్రతిపక్ష నేతగా చేయాలని ఈ సమావేశంలో నిర్ణయించినట్లు తెలిపారు. రాహుల్ గాంధీని లోక్‌సభలో ప్రతిపక్ష నాయకుడిగా నియమిస్తూ నిర్ణయం తీసుకున్న విషయాన్ని తెలియజేస్తూ సీపీపీ అధ్యక్షుడు ప్రొటెం స్పీకర్ భర్తిహరి మహతాబ్‌కు లేఖ రాశారని తెలిపారు.

ఈ ప్రతిపాదనను సీడబ్ల్యూసీ సమావేశంలో ఆమోదించారు

ఇటీవల కాంగ్రెస్‌ వర్కింగ్‌ కమిటీ సమావేశంలో రాహుల్‌ గాంధీని లోక్‌సభలో ప్రతిపక్ష నేతగా చేయాలంటూ ఏకగ్రీవంగా డిమాండ్‌ చేశారు. ఈ సమావేశంలో రాహుల్ గాంధీని లోక్‌సభలో పార్టీ నాయకుడిగా నియమించాలని కాంగ్రెస్ వర్కింగ్ కమిటీ సభ్యులు తీర్మానం చేశారు. లోక్‌సభలో ప్రతిపక్ష నాయకుడిగా తన పేరు ప్రతిపాదన ఆమోదం పొందిన తరువాత రాహుల్ గాంధీ కాంగ్రెస్ వర్కింగ్ కమిటీ సభ్యులను దాని గురించి ఆలోచించడానికి కొంత సమయం కోరారు.

కాంగ్రెస్ అధ్యక్షుడు మల్లికార్జున్ ఖర్గే తన ప్రారంభ వ్యాఖ్యలో.. భారత్ జోడో యాత్ర ఎక్కడికి వెళ్లినా కాంగ్రెస్ పార్టీకి ఓట్ల శాతం, సీట్ల సంఖ్య పెరిగింది అనే వాస్తవాన్ని మీ దృష్టికి ఆకర్షించాలనుకుంటున్నాను అన్నారు. లోక్‌సభ ఎన్నికల ఫలితాల తర్వాత ఈ CWC సమావేశం జరిగింది. ఈ సమావేశానికి పార్టీ చీఫ్ మల్లికార్జున్ ఖర్గే, సోనియా గాంధీ, రాహుల్ గాంధీ, ప్రియాంక గాంధీ వాద్రా, ఇతర పార్టీ ముఖ్య నేతలు హాజరయ్యారు.

Also Read: YCP Support to NDA Alliance : ఏన్డీఏకు వైసీపీ మద్దతు ..

లోక్‌సభలో కాంగ్రెస్ 99 సీట్లు గెలుచుకుంది

లోక్‌సభ ఎన్నికల్లో కాంగ్రెస్ తన పనితీరును మెరుగుపరుచుకుంది. దేశవ్యాప్తంగా 99 సీట్లు గెలుచుకుంది. అయితే ప్రస్తుతం కాంగ్రెస్ ఖాతాలో 98 సీట్లు ఉన్నాయి, ఎందుకంటే రాహుల్ గాంధీ వాయనాడ్, రాయ్ బరేలీ స్థానాల నుండి ఎన్నికల్లో విజయం సాధించారు. ఇప్పుడు ఆయన వాయనాడ్ స్థానానికి రాజీనామా చేశారు. ఇదే సమయంలో కాంగ్రెస్ నేతృత్వంలోని ఇండియా బ్లాక్ ఎన్నికల్లో 234 సీట్లు గెలుచుకుంది. అయితే బీజేపీ సొంతంగా 240 సీట్లు గెలుచుకుంది. అలాగే బీజేపీ నేతృత్వంలోని ఎన్డీయే కూటమి దేశవ్యాప్తంగా 293 సీట్లు గెలుచుకుంది.

లోక్‌సభలో రాహుల్ గాంధీని ప్రతిపక్ష నేతగా చేయాలని ఇండియా బ్లాక్ సమావేశంలో నిర్ణయించారు. గాంధీ కుటుంబంలో ప్రతిపక్ష నేతగా బాధ్యతలు స్వీకరించిన మూడో వ్యక్తి ఆయన. రాహుల్ కంటే ముందు ఆయన తల్లి సోనియా గాంధీ అక్టోబర్ 13, 1999 నుంచి ఫిబ్రవరి 06, 2004 వరకు ప్రతిపక్ష నేతగా ఉన్నారు. ఇదే సమయంలో సోనియాగాంధీ కంటే ముందు రాజీవ్ గాంధీ డిసెంబర్ 18, 1989 నుండి డిసెంబర్ 24, 1990 వరకు లోక్‌సభలో ప్రతిపక్ష నాయకుడిగా ఉన్నారు.