Military training : మహారాష్ట్ర విద్యారంగంలో సైనిక శిక్షణకు శ్రీకారం..చిన్నతనం నుంచే దేశభక్తికి బీజం
విద్యార్థుల్లో చిన్ననాటి నుంచే దేశభక్తి, క్రమశిక్షణ, శారీరక దృఢత్వం వంటి ముఖ్యమైన విలువలు పెంపొందించాలనే ఉద్దేశంతో ఈ కార్యక్రమాన్ని చేపట్టనున్నట్లు ఆయన తెలిపారు. ఈ శిక్షణతో విద్యార్థులు అత్యవసర పరిస్థితుల్లో ఎలా స్పందించాలో తెలుసుకునే అవగాహన కలుగుతుందని, ఇది భవిష్యత్తులో వారికి ఎంతో ఉపయోగపడుతుందని పేర్కొన్నారు.
- By Latha Suma Published Date - 01:02 PM, Tue - 3 June 25
Military training : మహారాష్ట్ర రాష్ట్ర ప్రభుత్వం ఓ కీలక నిర్ణయం తీసుకుంది. ఇకపై రాష్ట్రంలోని పాఠశాలల్లో మొదటి తరగతి నుంచే విద్యార్థులకు బేసిక్ మిలిటరీ శిక్షణను అందించబోతున్నట్లు అధికారికంగా ప్రకటించింది. ఈ విషయాన్ని రాష్ట్ర విద్యాశాఖ మంత్రి దాదా భూసే మీడియాతో పంచుకున్నారు. విద్యార్థుల్లో చిన్ననాటి నుంచే దేశభక్తి, క్రమశిక్షణ, శారీరక దృఢత్వం వంటి ముఖ్యమైన విలువలు పెంపొందించాలనే ఉద్దేశంతో ఈ కార్యక్రమాన్ని చేపట్టనున్నట్లు ఆయన తెలిపారు. ఈ శిక్షణతో విద్యార్థులు అత్యవసర పరిస్థితుల్లో ఎలా స్పందించాలో తెలుసుకునే అవగాహన కలుగుతుందని, ఇది భవిష్యత్తులో వారికి ఎంతో ఉపయోగపడుతుందని పేర్కొన్నారు. భూకంపాలు, అగ్ని ప్రమాదాలు, వరదలు, ఉగ్రదాడులు వంటి విపత్తుల సమయంలో సమర్థంగా స్పందించడానికి అవసరమైన ప్రాథమిక జ్ఞానాన్ని ఈ శిక్షణ ద్వారా విద్యార్థులకు అందిస్తామని తెలిపారు.
Read Also: Bangladesh: చైనాతో కలిసి పని చేస్తాం: మహమ్మద్ యూనస్
విద్యార్థులకు శిక్షణ ఇవ్వడంలో మాజీ సైనికుల సేవలను వినియోగించనున్నారు. రాష్ట్రవ్యాప్తంగా ఉన్న పాఠశాలల్లో నియమించబడ్డ మాజీ సైనికులు విద్యార్థులకు శిక్షణ ఇస్తారని భూసే వెల్లడించారు. ఈ కార్యక్రమంలో క్రీడా ఉపాధ్యాయులు, నేషనల్ క్యాడెట్ కార్ప్స్ (ఎన్‌సీసీ), స్కౌట్స్, గైడ్స్ వంటి సంస్థల సహకారంతో పాటు సుమారు 2.5 లక్షల మంది రిటైర్డ్ ఆర్మీ సిబ్బందిని శిక్షకులుగా వినియోగించనున్నారు. ఈ ప్రతిపాదనకు ముఖ్యమంత్రి దేవేంద్ర ఫడణవీస్ సానుకూలంగా స్పందించినట్టు భూసే వెల్లడించారు. విద్యార్థుల్లో దేశం పట్ల ప్రేమ, బాధ్యతార్హత పెరగాలన్నదే ఈ కార్యక్రమం వెనక ఉన్న ప్రధాన ఉద్దేశం అని పేర్కొన్నారు.
ఈ నిర్ణయం, ఇటీవల కాశ్మీర్‌లోని పహల్గాం వద్ద జరిగిన ఉగ్రదాడి నేపథ్యంలో తీసుకున్నదని ఆయన వివరించారు. ఏప్రిల్ 22న బైసరన్ లోయలో జరిగిన ఉగ్రదాడిలో 26 మంది అమాయక పర్యాటకులు ప్రాణాలు కోల్పోయిన ఘటన దేశవ్యాప్తంగా తీవ్ర కలకలం రేపింది. ఈ దాడికి ప్రతిస్పందనగా భారత ప్రభుత్వం పాక్‌పై దౌత్యపరమైన ఒత్తిడిని పెంచింది. అంతేకాకుండా, ప్రజల్లో విపత్తుల సమయంలో సురక్షితంగా ఉండే చైతన్యాన్ని పెంచేందుకు దేశవ్యాప్తంగా 259 చోట్ల మాక్ డ్రిల్స్‌ నిర్వహించింది. ఈ నేపథ్యంలో విద్యార్థులకు ప్రాథమిక స్థాయిలో మిలిటరీ శిక్షణ అవసరమని ప్రభుత్వం భావించింది. ఇది విద్యార్థుల భౌతిక స్థైర్యాన్ని మాత్రమే కాదు, మానసిక ధైర్యాన్ని కూడా పెంపొందించనుంది. ప్రస్తుత సామాజిక, భద్రతా పరిస్థితులను దృష్టిలో ఉంచుకుని మహారాష్ట్ర ప్రభుత్వం తీసుకున్న ఈ నిర్ణయం దేశవ్యాప్తంగా చర్చనీయాంశంగా మారే అవకాశం ఉంది.
Read Also: Microsoft : మరోసారి మైక్రోసాఫ్ట్‌లో లేఆఫ్‌లు.. 300 మంది తొలగింపు
