IT Act: ఈ నెలాఖరులోగా కొత్త ఐటీ రూల్స్

New IT Act: కేంద్ర ప్రభుత్వం ప్రతిపాదించిన కొత్త ఆదాయపు పన్ను చట్టం-2025 (Income Tax Act 2025) అమలు దిశగా అడుగులు పడుతున్నాయి. వచ్చే ఏడాది, అంటే ఏప్రిల్ 1, 2026 నుండి ఈ నూతన చట్టం అమల్లోకి రానున్న నేపథ్యంలో, ఈ ఫిబ్రవరి నెలాఖరు లోపు కొత్త ఐటీ రూల్స్ మరియు ఫారాలను విడుదల చేయనున్నట్లు కేంద్ర ప్రత్యక్ష పన్నుల బోర్డు (CBDT) ప్రకటించింది. పన్నుల వ్యవస్థను సరళీకృతం చేయడం, సామాన్య పన్ను చెల్లింపుదారులకు చట్టాన్ని సులభంగా అర్థమయ్యేలా చేయడమే లక్ష్యంగా ఆర్థిక మంత్రి నిర్మలా సీతారామన్ ఈ సంస్కరణలను బడ్జెట్‌లో ప్రతిపాదించారు. దీనికి సంబంధించి పన్ను చెల్లింపుదారుల్లో ఉన్న సందేహాలను నివృత్తి చేసేందుకు ఎఫ్ఏక్యూ (FAQs)లను కూడా ఐటీ శాఖ సిద్ధం చేస్తోంది.

కొత్త చట్టం అమలులోకి వచ్చిన ప్రారంభంలో, ముఖ్యంగా ఏప్రిల్-జూన్ 2026 త్రైమాసికంలో పన్ను చెల్లింపుదారులు మరియు అధికారుల నుంచి పెద్ద ఎత్తున ప్రశ్నలు వచ్చే అవకాశం ఉందని సీబీడీటీ అంచనా వేస్తోంది. అందుకే, రద్దీని దృష్టిలో ఉంచుకుని ముందుగానే స్పష్టమైన గైడ్‌లైన్స్‌ను, ప్రెజెంటేషన్లను రూపొందిస్తున్నట్లు సీబీడీటీ ఛైర్మన్ రవి అగర్వాల్ వెల్లడించారు. 2024 జూలై నుండి ప్రారంభమైన ఆదాయపు పన్ను చట్ట సమగ్ర సమీక్షలో భాగంగానే ఈ మార్పులు జరుగుతున్నాయని, దీనివల్ల పన్ను చెల్లింపు ప్రక్రియ మరింత పారదర్శకంగా మారుతుందని ఆయన ధీమా వ్యక్తం చేశారు. సంప్రదింపుల కోసం ఈ రూల్స్ ముందే అందుబాటులో ఉంచడం వల్ల భాగస్వామ్య పక్షాలకు తగిన సమయం దొరుకుతుంది.

ఇక పన్ను చెల్లింపుదారుల్లో ఉన్న అతిపెద్ద సందేహమైన ‘పాత పన్ను విధానం’ (Old Tax Regime) రద్దుపై ఐటీ శాఖ స్పష్టతనిచ్చింది. పాత పన్ను విధానాన్ని రద్దు చేసే ప్రతిపాదన ప్రస్తుతానికి ప్రభుత్వం వద్ద లేదని, అది కొనసాగుతుందని రవి అగర్వాల్ స్పష్టం చేశారు. సుమారు 88 శాతం మంది కొత్త పన్ను విధానానికి మారినప్పటికీ, సెక్షన్ 80C, 80D మరియు హెచ్‌ఆర్ఏ (HRA) వంటి మినహాయింపులు కోరుకునే వారికి పాత విధానమే లాభదాయకంగా ఉందని ప్రభుత్వం భావిస్తోంది. తద్వారా పన్ను చెల్లింపుదారులు తమ సౌలభ్యం మేరకు పాత లేదా కొత్త విధానాల్లో దేన్నైనా ఎంచుకునే వెసులుబాటు యథాతథంగా ఉండనుంది.

Follow us