Odisha: జూన్ 12న ఒడిశా గడ్డపై తొలిసారి బీజేపీ జెండా

Odisha: ఒడిశాలో తొలిసారి బీజేపీ ప్రభుత్వం ఏర్పాటు కానుంది. గత 24 ఏళ్లుగా అక్కడ నవీన పట్నాయక్ సీఎంగా ఉన్నారు. అయితే ఇటీవల జరిగిన ఎన్నికల్లో ఒడిశా గడ్డపై బీజేపీ విజయం సాధించింది. దీంతో తొలిసారి ఆ ప్రదేశంలో బీజేపీ జెండా ఎగురనుంది. అయితే ఒడిశా సీఎం ప్రమాణ స్వీకారోత్సవాన్ని జూన్ 10 నుంచి జూన్ 12 వరకు మార్చినట్లు ఆ పార్టీ నేతలు జతిన్ మొహంతి, విజయపాల్ సింగ్ తోమర్ తెలిపారు. ప్రధాని నరేంద్ర మోదీ బిజీ షెడ్యూల్ కారణంగానే వాయిదా పడిందని మొహంతి వివరించారు.

ప్రధాని నరేంద్ర మోడీ ఆదివారం తన ప్రమాణస్వీకారోత్సవం, మరుసటి రోజు పార్టీ ఎంపీలతో మోదీ భేటీ అవుతారు. అదనంగా కొత్తగా ఎన్నికైన సభ్యుల మొదటి లెజిస్లేచర్ పార్టీ సమావేశం జూన్ 11న జరగనుంది. జూన్ 10న ఒడిశాలో తొలి బీజేపీ ప్రభుత్వం ప్రమాణ స్వీకారం చేయనుందని ఎన్నికల ప్రచారం సందర్భంగా మోదీ చెప్పిన విషయం తెలిసిందే. అయితే తేదీని మార్చాలని ఆదివారం నిర్ణయం తీసుకున్నట్లు పార్టీ వర్గాలు తెలిపాయి.

ఇదిలావుండగా ఒడిశాలో బీజేపీ కొత్త ముఖ్యమంత్రిపై ఇంకా సస్పెన్స్ కొనసాగుతోంది. ఈ క్రమంలో సీనియర్ బిజెపి నాయకుడు సురేష్ పూజారి ఇప్పటికే న్యూఢిల్లీకి చేరుకున్నారు. అతను అత్యున్నత పదవికి ప్రధాన పోటీదారులలో ఒకడని ఊహాగానాలు వినిపిస్తున్నాయి. 2019 ఎన్నికల్లో బార్‌గఢ్ నుంచి లోక్‌సభకు ఎన్నికైన పూజారి ఇటీవలి ఎన్నికల్లో బ్రజరాజ్‌నగర్ అసెంబ్లీ నియోజకవర్గం నుంచి గెలుపొందారు. కేంద్ర నేతలతో చర్చించేందుకు ఆయనను న్యూఢిల్లీకి పిలిపించారని ఆయన మద్దతుదారులు భావిస్తున్నారు.

147 స్థానాలున్న అసెంబ్లీలో బీజేపీ 78 స్థానాలు గెలుచుకుని మెజారిటీ సాధించింది. ముఖ్యమంత్రి అభ్యర్థి పేరు చెప్పకుండానే మోడీ నాయకత్వంలో పార్టీ ఎన్నికలకు వెళ్లింది. మరోవైపు భువనేశ్వర్‌లోని జనతా మైదాన్‌లో ప్రమాణ స్వీకారోత్సవం నిర్వహించేందుకు సన్నాహాలు చేస్తున్నారు.

Also Read: North Korea : మళ్లీ ఉత్తర కొరియా చెత్త బెలూన్‌ల పంపుతోంది..!