Rahul : సెంచరీకి చేరువలో రాహుల్ అంటూ పరువు తీసిన బిజెపి

Rahul Vote Chori Haryana

దేశవ్యాప్తంగా ఐదు రాష్ట్రాల ఎన్నికల ఫలితాలు వెలువడుతున్న వేళ రాజకీయ విమర్శలు తారస్థాయికి చేరుకున్నాయి. ముఖ్యంగా కాంగ్రెస్ అగ్రనేత, లోక్‌సభలో ప్రతిపక్ష నాయకుడు రాహుల్ గాంధీని లక్ష్యంగా చేసుకుని బీజేపీ సోషల్ మీడియా వేదికగా చేసిన ‘సెంచరీ’ సెటైర్ ఇప్పుడు రాజకీయ వర్గాల్లో పెను దుమారం రేపుతోంది.

రాహుల్ ‘ఓటముల సెంచరీ’.. బీజేపీ వ్యంగ్యాస్త్రం

ఎన్నికల ఫలితాల సరళిని గమనిస్తున్న బీజేపీ, రాహుల్ గాంధీ నాయకత్వాన్ని ఎద్దేవా చేస్తూ ఒక ఆసక్తికరమైన ట్వీట్ చేసింది. గత రెండు దశాబ్దాలుగా జరిగిన వివిధ రాష్ట్రాల అసెంబ్లీ ఎన్నికలు, ఉప ఎన్నికల్లో కాంగ్రెస్ పార్టీ ఎదుర్కొన్న పరాజయాలను ప్రస్తావిస్తూ.. రాహుల్ గాంధీ 99 ఓటములతో సెంచరీకి చేరువలో ఉన్నారని బీజేపీ పేర్కొంది. “రాష్ట్రాలు మారినా, సంవత్సరాలు మారినా ఫలితం మాత్రం మారడం లేదు. వెల్ డన్ రాహుల్” అంటూ రాహుల్ పరువు తీసేలా బీజేపీ వ్యంగ్యాస్త్రాలు సంధించింది.

నినాదాలు మారినా మారని తలరాత

రాహుల్ గాంధీ ఎన్నికల ప్రచార శైలిని కూడా బీజేపీ తీవ్రంగా తప్పుబట్టింది. ఆర్భాటంగా ప్రచారాలు చేయడం, ఎప్పటికప్పుడు కొత్త కొత్త నినాదాలను తీసుకురావడం తప్ప, ప్రజల మనసు గెలవడంలో ఆయన విఫలమవుతున్నారని విమర్శించింది. ఎన్ని యాత్రలు చేసినా, ఎంతగా నినాదాలు మార్చినా అంతిమంగా వచ్చే ఫలితం మాత్రం ‘ఓటమి’ మాత్రమేనని బీజేపీ ఎద్దేవా చేసింది. కేరళ వంటి రాష్ట్రాల్లో కాంగ్రెస్ పుంజుకుంటున్నప్పటికీ, జాతీయ స్థాయిలో మాత్రం రాహుల్ గాంధీ నాయకత్వంపై ప్రజలకు నమ్మకం లేదన్నట్లుగా బీజేపీ తన ట్వీట్ ద్వారా సంకేతాలిచ్చింది.

ఫలితాల వేళ రాజుకున్న సోషల్ మీడియా వార్

బిజెపి చేసిన ఈ ట్వీట్ ఇప్పుడు కాంగ్రెస్ శ్రేణుల్లో ఆగ్రహాన్ని కలిగిస్తోంది. ఈశాన్య రాష్ట్రాల్లో మరియు బెంగాల్ వంటి ప్రాంతాల్లో కాంగ్రెస్ తన ఉనికిని చాటుకోవడానికి ప్రయత్నిస్తున్న సమయంలో బీజేపీ ఇలాంటి వ్యక్తిగత విమర్శలకు దిగడం సరైంది కాదని కాంగ్రెస్ నేతలు వాదిస్తున్నారు. మరోవైపు, బీజేపీ మద్దతుదారులు మాత్రం ఈ ట్వీట్‌ను వైరల్ చేస్తూ ‘పప్పు’ అంటూ మళ్లీ పాత విమర్శలను తెరపైకి తెస్తున్నారు. మొత్తానికి ఎన్నికల కౌంటింగ్ జరుగుతుండగానే, ఢిల్లీ వేదికగా సాగుతున్న ఈ సోషల్ మీడియా వార్ ఇప్పుడు హాట్ టాపిక్‌గా మారింది.

Follow us