వైట్ బ్రెడ్ వర్సెస్ బ్రౌన్ బ్రెడ్..నిజంగా ఆరోగ్యానికి ఏది మంచిది?

White bread vs. brown bread..which is really better for health?

. బ్రౌన్ బ్రెడ్ నిజంగా ఆరోగ్యకరమేనా?

. వైట్ బ్రెడ్‌ను తీసుకోవడం మంచిది కాదా ?

. సరైన బ్రౌన్ బ్రెడ్ ఎలా ఎంచుకోవాలి?

White Bread Vs Brown Bread : మన రోజువారీ ఆహారంలో బ్రెడ్ ఒక ముఖ్యమైన భాగంగా మారిపోయింది. ముఖ్యంగా పట్టణ జీవనశైలిలో బ్రెడ్ లేకుండా ఉదయం ప్రారంభమవుతుందంటే చాలామందికి అసాధ్యమే. ఉదయపు టీ లేదా కాఫీతో బ్రెడ్ తీసుకోవడం నుంచి, శాండ్‌విచ్‌లు, బ్రెడ్ ఆమ్లెట్, బ్రెడ్ అండ్ జామ్ వంటి వంటకాలు వరకు బ్రెడ్ అనేక రూపాల్లో మన ప్లేట్లో కనిపిస్తోంది. అలాగే జలుబు, జ్వరం వంటి స్వల్ప ఆరోగ్య సమస్యల సమయంలో సులభంగా జీర్ణమవుతుందని భావించి పాలతో బ్రెడ్ తీసుకునే అలవాటు కూడా చాలా మందిలో ఉంది. మార్కెట్‌లో బ్రెడ్ అనేక రుచులు, రకాలలో లభిస్తున్నప్పటికీ ఎక్కువగా అందుబాటులో ఉండేవి వైట్ బ్రెడ్, బ్రౌన్ బ్రెడ్. ఈ రెండు రకాల మధ్య ఏది ఆరోగ్యానికి మంచిది అనే సందేహం చాలాకాలంగా ప్రజల్లో ఉంది. ఈ విషయంపై పోషకాహార నిపుణులు కీలకమైన సూచనలు చేస్తున్నారు.

వైట్ బ్రెడ్‌ను ప్రధానంగా మైదా పిండితో తయారు చేస్తారు. మైదా తయారీ ప్రక్రియలో గోధుమలలో సహజంగా ఉండే ఫైబర్, విటమిన్లు, ఖనిజాలు ఎక్కువగా తొలగిపోతాయి. ఫలితంగా వైట్ బ్రెడ్ తినేటప్పుడు తక్షణ శక్తిని ఇస్తున్నట్లుగా అనిపించినా, దీర్ఘకాలంలో ఇది ఆరోగ్యానికి పెద్దగా మేలు చేయదు. ఫైబర్ తక్కువగా ఉండటం వల్ల జీర్ణక్రియ మందగించడం, ఆకలి త్వరగా వేయడం వంటి సమస్యలు ఎదురయ్యే అవకాశముంది. అందుకే నిత్యం వైట్ బ్రెడ్‌ను అధికంగా తీసుకోవడం మంచిదికాదని నిపుణులు హెచ్చరిస్తున్నారు.

సాధారణంగా బ్రౌన్ బ్రెడ్ అనగానే అది ఆరోగ్యానికి మంచిదనే అభిప్రాయం చాలామందిలో ఉంటుంది. కానీ కేవలం రంగును చూసి నిర్ణయం తీసుకోవడం సరైంది కాదని పోషకాహార నిపుణులు చెబుతున్నారు. మార్కెట్‌లో కొన్ని బ్రౌన్ బ్రెడ్‌లను కేవలం కారామెల్ రంగు లేదా ఇతర కలర్స్ కలిపి తయారు చేస్తున్నారు. ఇవి కనిపించడానికి బ్రౌన్‌గా ఉన్నప్పటికీ, పోషక విలువలు మాత్రం వైట్ బ్రెడ్‌లానే ఉంటాయి. అసలైన ఆరోగ్యకరమైన బ్రౌన్ బ్రెడ్ అంటే 100 శాతం గోధుమలు లేదా హోల్ గ్రెయిన్స్‌తో తయారు చేసినదే. అలాంటి బ్రెడ్‌లో ఫైబర్, విటమిన్లు, ఖనిజాలు సహజంగానే ఎక్కువగా ఉంటాయి.

బ్రౌన్ బ్రెడ్ కొనుగోలు చేసే సమయంలో లేబుల్‌ను తప్పకుండా చదవాలని నిపుణులు సూచిస్తున్నారు. “100% హోల్ వీట్”, “హోల్ గ్రెయిన్” వంటి పదాలు ఉన్నాయా లేదా అనే విషయం చూడాలి. మొదటి పదార్థంగా మైదా ఉంటే, అది నిజమైన బ్రౌన్ బ్రెడ్ కాదని అర్థం చేసుకోవాలి. గోధుమలు, హోల్ గ్రెయిన్స్‌తో చేసిన బ్రెడ్ తీసుకోవడం వల్ల పేగుల కదలికలు మెరుగుపడతాయి. పేగుల్లో మంచి బ్యాక్టీరియా పెరగడానికి ఇది సహకరిస్తుంది. దీని ద్వారా మొత్తం జీర్ణ ఆరోగ్యం మెరుగుపడుతుంది. కాబట్టి వైట్ బ్రెడ్ కంటే బ్రౌన్ బ్రెడ్ మెరుగైన ఎంపికే అయినప్పటికీ, అది నిజంగా గోధుమలతో తయారైనదేనా అనే విషయంలో జాగ్రత్త అవసరం. మార్కెటింగ్ మాటలకు మోసపోకుండా సరైన సమాచారం తెలుసుకుని బ్రెడ్‌ను ఎంచుకోవడమే ఆరోగ్యానికి మేలు చేస్తుందని పోషకాహార నిపుణులు స్పష్టం చేస్తున్నారు.

Follow us