Post Typhoid Caution : టైఫాయిడ్ ఫీవర్ తగ్గిన వారికి హెచ్చరిక.. ఇలాంటి పనులు అసలు చేయద్దు

Post Typhoid caution : టైఫాయిడ్ జ్వరం తగ్గిన తర్వాత మీరు వైద్యుల సలహాలు తీసుకోవడం చాలా ముఖ్యం. వెంటనే మద్యం, మాంసం తినకూడదు, ఎందుకంటే మళ్లీ ఇన్ఫెక్షన్ పెరిగే అవకాశం ఉంది. జ్వరం మళ్లీ వచ్చే అవకాశం కూడా ఉంది. కాబట్టి, దాదాపు ఒక నెల వరకు వాటికి దూరంగా ఉండాలి. టైఫాయిడ్ నుంచి కోలుకున్నాక, శరీరంలో రోగనిరోధక శక్తిని పెంచడానికి కొన్ని పద్ధతులు పాటించాలి. కొందరికి టైఫాయిడ్ పూర్తి తగ్గాక కూడా బాడీ మొత్తం వీక్ అయిపోతుంది. జీర్ణ సమస్యలు, నరాల బలహీనత ఉంటుంది. అటువంటి వారు వైద్యుల సలహా తీసుకోవాలి.

త్వరగా కోలుకోవాలంటే ఏం చేయాలి.?

టైఫాయిడ్ తగ్గినాక మన శరీరం చాలా బలహీనంగా ఉంటుంది. ఈ సమయంలో, ఆరోగ్యకరమైన ఆహారం తినడం చాలా ముఖ్యం. ముఖ్యంగా, మంచి పోషకాలు ఉన్న ఆహారాలు, పండ్లు, కూరగాయలు తినడం వల్ల శరీరానికి శక్తి లభిస్తుంది. సులభంగా జీర్ణమయ్యే ఆహారాలు తీసుకోవడం వల్ల జీర్ణవ్యవస్థపై భారం తగ్గుతుంది. పాలు, పెరుగు, కొబ్బరి నీరు, మజ్జిగ వంటివి తీసుకోవడం వల్ల శరీరం డీహైడ్రేషన్ బారిన పడకుండా ఉంటుంది. అలాగే, శుభ్రమైన నీరు ఎక్కువ తాగడం కూడా చాలా అవసరం.

ఎటువంటి విటమిన్లు తీసుకోవాలి.?

రోగనిరోధక శక్తిని పెంచడానికి, కొన్ని విటమిన్లు ఉన్న ఆహారాలు తీసుకోవాలి. విటమిన్ సి, విటమిన్ ఇ, జింక్ వంటివి రోగనిరోధక శక్తిని పెంచడానికి తోడ్పడతాయి. నారింజ, నిమ్మకాయ, జామ, పాలకూర, బాదం వంటివి మంచి ఆహారాలు. ఇవి శరీరానికి కావాల్సిన పోషకాలను అందిస్తాయి. వీటితోపాటు, టైఫాయిడ్ వచ్చినప్పుడు వాడిన మందుల వల్ల పేగులో మంచి బ్యాక్టీరియా తగ్గుతుంది, కాబట్టి పెరుగు, పాలు లాంటి ఆహారాలు తినడం వల్ల అది మళ్లీ సమతుల్యం అవుతుంది.

శారీరక శ్రమ చేయడం కూడా రోగనిరోధక శక్తిని పెంచుతుంది. అయితే, టైఫాయిడ్ నుంచి కోలుకున్న వెంటనే ఎక్కువ శ్రమపడకూడదు. తేలికపాటి వ్యాయామాలు, యోగా, నడక వంటివి మెల్లగా ప్రారంభించాలి. ఇవి శరీరానికి శక్తిని ఇవ్వడంతోపాటు మానసికంగా కూడా ఉపశమనం ఇస్తాయి. క్రమంగా, వ్యాయామం పెంచుకుంటూ పోతే శరీరం పూర్తిస్థాయిలో శక్తిని పుంజుకుంటుంది. తగినంత విశ్రాంతి తీసుకోవడం కూడా చాలా ముఖ్యం. ప్రతిరోజు 7-8 గంటలు నిద్రపోవడం వల్ల శరీరం త్వరగా కోలుకుంటుంది. నిద్రలేకపోతే రోగనిరోధక శక్తి తగ్గి వెనువెంటనే మళ్లీ టైఫాయిడ విజృంభించే అవకాశం లేకపోలేదు.

చివరగా, టైఫాయిడ్ నుంచి కోలుకునే సమయంలో వైద్యుల సలహాలు పాటించడం చాలా ముఖ్యం. వారు సూచించిన ఆహారం, మందులు తీసుకుంటూ, వారు చెప్పిన నియమాలను పాటించడం వల్ల మళ్లీ జ్వరం వచ్చే ప్రమాదం తగ్గుతుంది. ఈ జాగ్రత్తలు పాటిస్తే త్వరగా కోలుకోవచ్చు, రోగనిరోధక శక్తి కూడా పెరుగుతుంది. మీరు టైఫాయిడ్ నుండి పూర్తిగా కోలుకున్న తర్వాతే మెల్లిగా సాధారణ ఆహారం తీసుకోవడం మొదలుపెట్టండి.