Migraine : మైగ్రేన్ తలనొప్పితో బాధపడుతున్నారా? అయితే ఈ ఆసనాలను ట్రై చేయండి
మైగ్రేన్ అనేది నాడీ సంబంధిత సమస్య. ఇది తక్కువ నుంచి ఎక్కువ అయ్యే తీవ్ర తలనొప్పికి (Head Ache) కారణమవుతుంది.
- Author : Maheswara Rao Nadella
Date : 09-01-2023 - 5:00 IST
Published By : Hashtagu Telugu Desk
మైగ్రేన్ (Migraine) అనేది నాడీ సంబంధిత సమస్య. ఇది తక్కువ నుంచి ఎక్కువ అయ్యే తీవ్ర తలనొప్పికి కారణమవుతుంది. సాధారణంగా, ఇది తలలో సగం భాగాన్ని మాత్రమే ప్రభావితం చేస్తుంది. 2 గంటల నుండి 2 రోజుల కంటే ఎక్కువ సేపు ఉంటుంది. మైగ్రేన్ (Migraine) వచ్చినప్పుడు, వెలుతురు, సౌండ్ వస్తే తట్టుకోవడం కాస్తా కష్టంగా ఉంటుంది. వాంతులు, వికారం, తలనొప్పి వంటి సమస్యలు ఉంటాయి. అయితే ఇది తగ్గించేందుకు ఎలాంటి టిప్స్ పాటించాలి.. ట్రీట్మెంట్ ఏంటి?..కొన్ని రోజుల కొద్దీ మైగ్రేన్తో బాధపడుతుంటే.. మీ నొప్పిని అధిగమించేందుకు మందులు కాకుండా ఇతర మార్గాలు కూడా ఉన్నాయి. ఆర్టరీస్ సర్జరీ, మజిల్ సర్జరీ, ఆక్సిపిటల్ నెర్వ్ స్టిమ్యులేషన్, బొటాక్స్, బేటా బ్లాకర్స్, యాంటీ డిప్రజెంట్స్ అనేవి మైగ్రైన్కి ట్రీట్మెంట్స్.
కానీ, ఈ ట్రీట్మెంట్ పద్దతులతో కొన్నిసార్లు సైడ్ ఎఫెక్ట్స్ ఉంటాయి. ఈ పద్ధతుల్లో కొన్నింటి ద్వారా హైపోటెన్షన్, గుండెపోటులు, నిద్రలేమి, వికారం వంటి ప్రమాదాలు ఉంటాయి. కాబట్టి, సహజంగానే మైగ్రేన్ని తగ్గించుకునేందుకు కొన్నింటిని ఎంచుకోవచ్చు. అందులో ముందుగా ఉండేది యోగా. అవును.. ఆసనాలు చేయడం వల్ల మైగ్రేన్ (Migraine) చాలా వరకూ తగ్గుతుంది. అలాంటి 8 ఆసనాల గురించి చూద్దాం.
హస్తపాదాసన:
దీనినే ఇంగ్లీష్లో స్టాండింగ్ ఫార్వర్డ్ బెండ్ అంటారు. ఇది చేయడం వల్ల రక్త సరఫరా పెరిగి నాడీ వ్యవస్త ఉత్తేజమవుతుంది. మనస్సు ప్రశాంతంగా మారుతుంది.
ఎలా చేయాలంటే:
యోగా మ్యాట్పై ముందుగా నిలుచిని రెండు చేతులని మెల్లిగా కిందికి తీసుకొస్తూ వంగాలి. ఆ తర్వాత రెండు చేతులను మీ కాళ్ళకు రెండువైపులా పెట్టాలి. ఇలా కాసేపు ఉండి యథస్థానానికి రావాలి.
సేతు బంధాసన:
దీనినే ఇంగ్లీష్లో బ్రిడ్జ్ పోజ్ అంటారు. ఇది మీ బ్రెయిన్ని శాంత పరిచి రిలాక్స్ అయ్యేలా చేస్తుంది. మీ రక్తపోటును నియంత్రించి, ప్రశాంతతని ఇస్తుంది. ఇది చేసేటప్పుడు రక్తం మెదడుకి సరఫరా అయి నొప్పి తగ్గుతుంది.
ఎలా చేయాలంటే:
ముందుగా మ్యాట్పై పడుకుని కాళ్ళని మడవాలి. ఆ తర్వాత చేతులతో కాళ్ళని పట్టుకుని మీ నడుము భాగాన్ని పైకి లేపాలి.
శిశుఆసన:
దీనినే ఇంగ్లీష్లో చైల్డ్ పోజ్ అంటారు. ఇది చేయడం వల్ల నాడీ వ్యవస్థ శాంతపరిచి నొప్పి తగ్గుతుంది. ఒత్తిడి దూరమవుతుంది. నడుము, తొడలు, చీలమండలాన్ని సాగదీస్తం కాబట్టి మెదడు రిలాక్స్ అయి ఒత్తిడి, అలసట దూరమవుతుంది. దీని వల్ల నరాల పనితీరు కూడా మెరుగ్గా మారుతుంది.
ఎలా చేయాలంటే:
ముందుగా కాళ్ళను మడిచి కూర్చోవాలి. ఇప్పుడు మెల్లిగా బాడీని వంగి ముందువైపుకి బోర్లా పడుకోవాలి. చేతులని కాళ్ళకి ఇరువైపులా పెట్టాలి.
మార్జారి ఆసన:
ఇది చూడ్డానికి పిల్లిలా ఉంటుంది కాబట్టి. క్యాట్ స్ట్రెచ్ అంటారు. దీనిని చేయడం వల్ల మెదడు రిలాక్స్ అయి ఒత్తిడి దూరమవుతుంది. శ్వాస ప్రక్రియలు సరిగ్గా ఉంటాయి. కండరాల నొప్పి దూరమయ్యేందుకు ఇది సాయపడుతుంది.
ఎలా చేయాలంటే:
ముందుగా మోకాళ్ళని మడిచి కూర్చోవాలి. ఇప్పుడు చేతులని ముందుకు మడిచి ఫొటోలో ఉన్న విధంగా ఉండాలి. ఇదే పొజిషన్లో కాసేపు ఉండాలి. తిరిగి యథాస్థానానికి రావాలి.
పశ్చిమోత్తనాసన:
దీనినే ఇంగ్లీష్లో టూ లెగ్డ్ ఫార్వర్డ్ బెండ్ అంటారు. రెండు కాళ్ళు ముందుకు వచ్చే ఈ ఆసనం మెదడుని ప్రశాంతంగా ఉంచి, ఒత్తిడి, తలనొప్పి నుంచి ఉపశమనాన్ని ఇస్తుంది.
ఎలా చేయాలంటే:
ముందుగా కాళ్ళని చాపి కూర్చోవాలి. ఇప్పుడు తలభాగాన్ని ముందుకు వంచుతూ చేతులతో కాళ్ళని పట్టుకోవాలి.
అధోముఖ స్వానాసన:
దీనినే ఇంగ్లీష్లో డౌన్వార్డ్ ఫేసింగ్ డాగ్ పోజ్ అంటారు. దీనిని చేయడం వల్ల రక్తప్రసరణ మెరుగ్గా మారి తలనొప్పి తగ్గుతుంది.
ఎలా చేయాలంటే:
ముందుగా నిల్చోవాలి. ఇప్పుడు మెల్లిగా వంగుతూ చేతుల్ని నేలపైకి తాకించి మన శరీరం మొత్తం త్రిభుజం ఆకారంలో ఉండేలా చూసుకోండి.
పద్మాసన:
దీనినే లోటస్ పోజ్ అని కూడా అంటారు. ఇది చేయడం వల్ల మనసుకి ప్రశాంతంగా ఉండి తలనొప్పి తగ్గుతుంది.
ఎలా చేయాలంటే:
ముందుగా కాళ్ళు మడిచి కూర్చోవాలి. రెండు చేతులని రెండు కాళ్ళపై పెట్టి ఊపిరి తీస్తూ వదలాలి.
శవాసన:
దీనినే కార్పస్ పోజ్ అంటారు.శవాసనం చేయడం వల్ల ధ్యాన ముద్రలో శరీరం ఉంటుంది. దీని వల్ల శరీరానికి ఉత్తేజం అందుతుంది. ఈ ఆసనంతో యోగా చేయడం పూర్తైనట్లే.. అయితే, ఇవన్నీ మీకు మీరుగా కాకుండా నిపుణుల సలహాతో చేయడం ఉత్తమం. ఎందుకంటే కొన్ని భంగిమలు స్వతహాగా చేయడం అంత మంచిది కాదు.
Also Read: Apple Store : ముంబై ఢిల్లీలో ఆపిల్ స్టోర్.. ఉద్యోగుల కోసం నోటిఫికేషన్
Follow us
