డార్క్ షవరింగ్ అంటే ఏమిటి? దీనివల్ల ప్రయోజనాలు ఉన్నాయా?!

Dark Showering

Dark Showering: శరీరాన్ని శుభ్రంగా, తాజాగా ఉంచుకోవడానికి స్నానం చేయడం చాలా ముఖ్యం. సాధారణంగా అందరూ బాత్‌రూమ్‌లో లైట్లు ఆన్ చేసుకుని స్నానం చేస్తారు. కానీ ప్రస్తుతం సోషల్ మీడియాలో ‘డార్క్ షవరింగ్’ అనే కొత్త ట్రెండ్ నడుస్తోంది. బాత్‌రూమ్‌లో లైట్లు ఆర్పేసి చీకటిలో స్నానం చేయడాన్నే డార్క్ షవరింగ్ అంటారు. దీనివల్ల కలిగే ప్రయోజనాలు, ఇది నిద్రలేమి సమస్యను నిజంగానే తగ్గిస్తుందా అనే విషయాలు ఇప్పుడు తెలుసుకుందాం!

ఏమిటి ఈ డార్క్ షవరింగ్?

ఒక్కోసారి స్నానం చేసేటప్పుడు అకస్మాత్తుగా పవర్ పోతే మనం కొద్దిసేపు చీకటిలోనే ఉండాల్సి వస్తుంది. డార్క్ షవరింగ్ కూడా సరిగ్గా ఇలాగే ఉంటుంది. కాకపోతే ఇది మనం ఇష్టపూర్వక చేసేది. బాత్‌రూమ్ లైట్లు ఆర్పేసి ప్రశాంతంగా స్నానం చేయడమే దీని ప్రత్యేకత. దీనివల్ల నష్టం ఏమీ ఉండదు సరే కదా, కొన్ని లాభాలు కూడా ఉన్నాయని నిపుణులు చెబుతున్నారు.

Also Read: హెరిటేజ్ నాణ్యతపై భరోసా.. YCP అసత్య ప్రచారానికి ఢిల్లీ హైకోర్టు చెక్!

స్నానం చేసే సరైన పద్ధతి ఏమిటి?

‘ది గార్డియన్’ నివేదిక ప్రకారం.. ఈ ట్రెండ్ మన ఆరోగ్యానికి సంబంధించినది. ఇది రాత్రి నిద్రపోయే ముందు పాటించాల్సిన ఒక ఆయుర్వేద పద్ధతి లాంటిది. ఇది శరీరాన్ని మాత్రమే కాదు, మనస్సును కూడా శుద్ధి చేస్తుంది.

దీనివల్ల కలిగే ప్రయోజనాలు ఏమిటి?

శరీరంలోని నరాల వ్యవస్థను శాంతపరచడానికి, ధ్యానం చేయడానికి ఇది ఒక గొప్ప మార్గమని నమ్ముతారు. రోజంతా పడ్డ ఒత్తిడిని, ఆందోళనలను ఇది దూరం చేస్తుంది. అయితే పూర్తిగా కటిక చీకటిలో స్నానం చేయడం వల్ల బాత్‌రూమ్‌లో జారిపడే ప్రమాదం ఉంటుంది. కాబట్టి కొన్ని జాగ్రత్తలు తీసుకోవాలి.

సరైన వాతావరణం: పూర్తిగా చీకటిలో కాకుండా కిటికీ నుండి వచ్చే స్వల్ప వెలుతురులో లేదా బాత్‌రూమ్‌లో ఒక కొవ్వొత్తిని వెలిగించి స్నానం చేయవచ్చు. దీనివల్ల కలిగే ప్రయోజనాలు చూద్దాం..!

నిద్ర నాణ్యత మెరుగుపడుతుంది: చీకటిలో స్నానం చేయడం వల్ల శరీర ఉష్ణోగ్రతలో మార్పు వస్తుంది. ఇది త్వరగా, గాఢ నిద్ర పట్టేలా చేస్తుంది. చీకటి వల్ల శరీరంలో మెలటోనిన్ హార్మోన్ ఉత్పత్తి పెరిగి మెదడును ప్రశాంతపరుస్తుంది.

మానసిక ఆరోగ్యానికి మేలు: చీకటిలో స్నానం చేయడం వల్ల ఒత్తిడిని కలిగించే కార్టిసాల్ హార్మోన్ స్థాయిలు తగ్గుతాయి. కొవ్వొత్తుల వెలుతురులో స్నానం చేయడం వల్ల ఇంట్లోనే ‘స్పా ట్రీట్‌మెంట్’ తీసుకున్న అనుభూతి కలుగుతుంది. మన ఇంద్రియాలపై ఉండే ఒత్తిడిని తగ్గించడమే దీని ప్రధాన ఉద్దేశ్యం.

ఇది అద్భుతమైన చికిత్స ఏమీ కాదు.. డాక్టరును సంప్రదించండి!

డార్క్ షవరింగ్ అనేది నిద్రలేమి సమస్యకు శాశ్వత పరిష్కారం లేదా ఒక మంత్రం లాంటిది కాదు. ఒకవేళ మీరు ఏదైనా ఒత్తిడిలో ఉండి లేదా హడావిడిగా ఈ స్నానం చేస్తే ఎలాంటి లాభం ఉండదు. మీకు నిద్రకు సంబంధించిన తీవ్రమైన సమస్యలు ఉంటే తప్పనిసరిగా డాక్టరును సంప్రదించాలి. దీనిని కేవలం మనస్సును ప్రశాంతపరుచుకునే ఒక మార్గంగా మాత్రమే చూడాలి.

Follow us