రాత్రి నెయ్యితో పాలు తాగితే ఆరోగ్యానికి కలిగే అద్భుతమైన ప్రయోజనాలు..!

Amazing health benefits of drinking milk with ghee at night..!

. పోషకాల శోషణకు నెయ్యి–పాల మేళవింపు

. జీర్ణక్రియ, ఎముకలు, కీళ్లకు మేలు

. సరైన మోతాదు, సరైన సమయం కీలకం

Ghee With Milk : నెయ్యి మన భారతీయ ఆహార సంస్కృతిలో విడదీయరాని భాగం. వేల ఏళ్లుగా వంటల్లో, ఔషధాల్లో నెయ్యిని ఉపయోగిస్తూ వస్తున్నారు. అద్భుతమైన రుచితో పాటు అనేక ఆరోగ్య ప్రయోజనాలు కలిగిన నెయ్యిని ‘ద్రవ బంగారం’ అని కూడా పిలుస్తారు. ఆయుర్వేదంలో నెయ్యికి విశిష్ట స్థానం ఉంది. ఇందులో విటమిన్ ఎ, డి, ఇ, కెతో పాటు ఆరోగ్యకరమైన కొవ్వులు సమృద్ధిగా ఉంటాయి. సాధారణంగా మనం భోజనంలో నెయ్యిని కలుపుకుని తింటాం. అయితే గోరువెచ్చని పాలలో నెయ్యిని కలిపి తీసుకుంటే మరింత మేలు జరుగుతుందని ఆయుర్వేద వైద్యులు చెబుతున్నారు. ఈ కలయిక వల్ల శరీరానికి కలిగే లాభాలు తీసుకునే విధానం గురించి వారు వివరించారు. పాలు, నెయ్యి రెండింటిలోనూ కొవ్వులో కరిగే విటమిన్లు ఎ, డి, ఇ, కె ఉంటాయి. నెయ్యిని పాలతో కలిపి తీసుకుంటే ఈ విటమిన్లను శరీరం మరింత సమర్థంగా గ్రహిస్తుంది.

దీంతో విటమిన్ లోపాలు తగ్గుతాయి. అలాగే ఈ రెండింటిలో ఉండే ఆరోగ్యకరమైన కొవ్వులు శరీరానికి స్థిరమైన శక్తిని అందిస్తాయి. రోజువారీ కార్యకలాపాలు సజావుగా సాగేందుకు ఈ శక్తి ఎంతో అవసరం. అలసట, నీరసాన్ని దూరం చేయడంలో ఈ మిశ్రమం సహాయపడుతుందని నిపుణులు చెబుతున్నారు. నెయ్యి–పాలు కలిపి తీసుకోవడం వల్ల జీర్ణవ్యవస్థ బలోపేతం అవుతుంది. జీర్ణాశయంలో అవసరమైన స్రావాలు సక్రమంగా విడుదలై జీర్ణక్రియ సాఫీగా సాగుతుంది. మలబద్ధకం, అజీర్ణం వంటి సమస్యలతో బాధపడే వారికి ఇది ఉపశమనం ఇస్తుంది. మరోవైపు, పాలలోని క్యాల్షియం, విటమిన్ డి, నెయ్యిలోని పోషకాలు కలిసి ఎముకల ఆరోగ్యాన్ని మెరుగుపరుస్తాయి. నెయ్యి సహజ కందెనలా పనిచేసి కీళ్ల నొప్పులు, గట్టిదనం తగ్గించడంలో తోడ్పడుతుంది. వృద్ధులు, కీళ్ల సమస్యలతో బాధపడేవారికి ఇది ప్రయోజనకరంగా ఉంటుంది.

ఈ మిశ్రమాన్ని తీసుకునే విషయంలో మోతాదు చాలా ముఖ్యం. ప్రారంభ దశలో ఒక గ్లాస్ గోరువెచ్చని పాలలో ఒక టీ స్పూన్ నెయ్యి కలిపి తీసుకోవడం మంచిదని వైద్యులు సూచిస్తున్నారు. అవసరాన్ని బట్టి, శరీర స్థితిని బట్టి మోతాదును సర్దుబాటు చేసుకోవచ్చు. అయితే పాలు, నెయ్యి రెండింటిలోనూ క్యాలరీలు అధికంగా ఉండటంతో అధికంగా తీసుకోవడం మంచిది కాదు. ఉదయం తీసుకుంటే కడుపు నిండిన భావన కలిగి రోజంతా శక్తిగా ఉంటుంది. రాత్రి పడుకునే ముందు తీసుకుంటే నిద్ర నాణ్యత మెరుగుపడి నిద్రలేమి సమస్య తగ్గుతుంది. అలాగే జీవక్రియల వేగం పెరిగి బరువు నియంత్రణలో ఉండటానికి కూడా ఇది సహాయపడుతుంది. కాగా, నెయ్యి–పాలు సరైన మోతాదులో సరైన సమయంలో తీసుకుంటే శరీరానికి సంపూర్ణ ఆరోగ్య ప్రయోజనాలు లభిస్తాయని ఆయుర్వేద వైద్యులు స్పష్టం చేస్తున్నారు.

Follow us