Surya Grahan : ఆగస్టు 2న సూర్యగ్రహణం ?..అసలు నిజం ఏంటంటే?
అయితే అసలు నిజం ఏంటంటే, 2025 ఆగస్టు 2న ఎలాంటి సూర్యగ్రహణం జరగదు. కానీ అదే తేదీన రెండేళ్ల తర్వాత, అంటే 2027 ఆగస్టు 2న ఒక అరుదైన, అతి సుదీర్ఘమైన సంపూర్ణ సూర్యగ్రహణం జరగనుంది.
- By Latha Suma Published Date - 05:12 PM, Fri - 1 August 25
Surya Grahan : గత కొన్ని రోజులుగా సోషల్ మీడియాలో, కొన్ని వార్తా ఛానళ్లలో ఆగస్టు 2న సూర్యగ్రహణం ఏర్పడబోతుంది అనే వార్తలు గట్టిగా వినిపిస్తున్నాయి. ఇదివరకు కూడా ఇలాంటివే వదంతులుగా మారిన సందర్భాలు ఉన్నాయి. ఈసారి కూడా ప్రజల్లో గందరగోళం కలిగిస్తూ ఈరోజే గ్రహణం వస్తుందంట అనే తప్పుడు సమాచారం చక్కర్లు కొడుతోంది. అయితే అసలు నిజం ఏంటంటే, 2025 ఆగస్టు 2న ఎలాంటి సూర్యగ్రహణం జరగదు. కానీ అదే తేదీన రెండేళ్ల తర్వాత, అంటే 2027 ఆగస్టు 2న ఒక అరుదైన, అతి సుదీర్ఘమైన సంపూర్ణ సూర్యగ్రహణం జరగనుంది.
Read Also: Dharmasthala : 800 ఏళ్ల చరిత్ర కలిగిన శ్రీ మంజునాథ స్వామి ఆలయం.. ప్రత్యేకత ఏంటంటే!
ఈ గ్రహణం గురించి ఖగోళశాస్త్రజ్ఞులు చెబుతున్న వివరాల ప్రకారం, 100 సంవత్సరాలలోనే ఇది అత్యంత సుదీర్ఘమైన సూర్యగ్రహణం కానుంది. అప్పుడు భూమిపై కొన్ని ప్రాంతాల్లో కొన్ని నిమిషాల పాటు పూర్తిగా చీకటి కమ్ముకుంటుంది. ఈ గ్రహణం ఆఫ్రికా, యూరోప్, మధ్యప్రాచ్యం వంటి ప్రాంతాలలో స్పష్టంగా కనిపించనుంది. ముఖ్యంగా ట్యునీషియా, ఈజిప్ట్, సౌదీ అరేబియా, యెమెన్, సూడాన్, సోమాలియా, స్పెయిన్, ఒమన్ వంటి దేశాల్లో ఇది స్పష్టంగా కనిపించే అవకాశం ఉంది. ఈ గ్రహణం గురించి ఇప్పుడు పెరుగుతున్న చర్చ వాస్తవానికి దాని తేదీపై దృష్టి కేంద్రీకరించి, అసలు సంవత్సరాన్ని విస్మరించడం వల్లే తప్పుదోవ పట్టిస్తోంది. అంటే 2025లో జరిగేలా ప్రచారం జరుపుతున్నారు కానీ అది 2027లో మాత్రమే జరుగుతుంది.
ఇదిలా ఉంచితే, 2025లో చివరి సూర్యగ్రహణం సెప్టెంబర్ 21న ఏర్పడనుంది. ఇది పాక్షిక సూర్యగ్రహణం. అదీగాక, సర్వ పితృ అమావాస్య రోజున ఈ గ్రహణం జరగడం వల్ల కొన్ని జ్యోతిష్యపరమైన విశేషాలు కూడా దృష్టిలోకి వస్తున్నాయి. ఈ గ్రహణం భారతదేశంలో కనబడదు, కానీ ఇండోనేషియా, ఆస్ట్రేలియా, అలాగే దక్షిణ పసిఫిక్ మహాసముద్రంలోని కొన్ని భాగాల్లో మాత్రమే కనబడుతుంది. జ్యోతిష్య శాస్త్రం ప్రకారం, ఈ గ్రహణం ప్రభావం భారతదేశంలోని 12 రాశులపై పడుతుంది. ముఖ్యంగా మిథున రాశి వారికి ఇది శుభ పరిణామాలు చూపించదని నిపుణులు చెబుతున్నారు. ఈ సమయంలో మానసిక స్థితి అస్థిరంగా ఉండొచ్చు. అనవసర ఆలోచనలు, ఆందోళనలు పెరగొచ్చు. ప్రేమ సంబంధాల్లో మనస్పర్థలు, కుటుంబంలో ఆరోగ్య సమస్యలపై శ్రద్ధ అవసరం ఉంటుంది. ఇక, మిగతా రాశులపై ప్రభావం తక్కువగానే ఉంటుందన్న అభిప్రాయం ఉంది. అయితే ఎలాంటి గ్రహణమైనా జాగ్రత్తగా గమనిస్తూ, సరిగా అర్థం చేసుకోవడం ముఖ్యం. ఫేక్ న్యూస్‌ను పక్కనబెట్టి, ఖచ్చితమైన ఖగోళ సమాచారాన్ని ఆధారంగా చేసుకొని ముందుకెళ్లడమే ఉత్తమం.
Read Also: Free Current : ఫ్రీ కరెంట్ కు సీఎం చంద్రబాబు గ్రీన్ సిగ్నల్..ఇక వారికీ పండగే !!
