RC 16 Pooja Ceremony: మొదలైన రామ్ చరణ్ కొత్త మూవీ పనులు.. వీడియోస్ వైరల్?

టాలీవుడ్ హీరో రామ్ చరణ్ ప్రస్తుతం గేమ్ ఛేంజర్ సినిమాలో నటిస్తున్న విషయం తెలిసిందే. తమిళ దర్శకుడు శంకర్ దర్శకత్వం వహిస్తున్న ఈ మూవీ త్వరలోనే ప్రేక్షకుల ముందుకి రానుంది. ఇకపోతే రామ్ చరణ్ ఈ సినిమా తర్వాత బుచ్చిబాబు సనా దర్శకత్వంలో ఒక సినిమా చేయబోతున్న విషయం తెలిసిందే. rc16 వర్కింగ్ టైటిల్ తో రామ్ చరణ్, జాన్వీ కపూర్ జంటగా ఈ సినిమా తెరకెక్కనుంది. వృద్ధి సినిమాస్, మైత్రి మూవీ మేకర్స్, సుకుమార్ రైటింగ్స్ సంయుక్త నిర్మాణంలో ఈ సినిమాని నిర్మించబోతున్నారు.

కాగా తాజాగా నేడు RC16 సినిమా పూజా కార్యక్రమం హైదరాబాద్ లో ఘనంగా నిర్వహించారు మూవీ మేకర్స్. ఈ కార్యక్రమానికి రామ్ చరణ్, ఉపాసనతో పాటు వచ్చాడు. అలాగే ఈ జాన్వీ కపూర్ కూడా హాజరైంది. సుకుమార్ తో పాటు పలువురు సినీ ప్రముఖులు, మూవీ యూనిట్ ఈ కార్యక్రమానికి హాజరయ్యారు. ఇక చరణ్ పక్కన జాన్వీ కపూర్ కనపడటంతో వీడియోలు వైరల్ అవుతున్నాయి. అధికారికంగా ఈ కార్యక్రమం లైవ్ ఇవ్వలేదు. ఫోటోలు కూడా ఇంకా రిలీజ్ చేయకపోయినా అభిమానుల దగ్గర్నుంచి వీడియోలు లీక్ అవుతున్నాయి. జగదేకవీరుడు కొడుకు, అతిలోక సుందరి కూతుర్ని పక్కపక్కనే చూసి అభిమానులు సంతోషం వ్యక్తం చేస్తున్నారు.

ఉత్తరాంధ్ర బ్యాక్ డ్రాప్ లో ఈ సినిమాని భారీగా నిర్మించబోతున్నారు. ఈ సినిమాకి ఏ ఆర్ రహమాన్ సంగీతం ఇవ్వనున్నారు. ఈ సినిమాకి టైటిల్ ఇంకా ప్రకటించకపోయినా పెద్ది అనే టైటిల్ పెడతారని వార్తలు వినిపిస్తున్నాయి. ఆల్రెడీ RC16 ప్రీ ప్రొడక్షన్ వర్క్ పూర్తయింది. పూజా కార్యక్రమాలు అయినా గేమ్ ఛేంజర్ షూట్ మొత్తం పూర్తయ్యాకే RC16 షూట్ మొదలుపెడతారని బుచ్చిబాబు గతంలో తెలిపారు.