‘రాజాసాబ్’ ఫస్ట్ డే కలెక్షన్స్ రిపోర్ట్

Raajasabh Pre Release

• ఇండియా వ్యాప్తంగా సుమారు రూ. 45 కోట్ల నెట్ వసూళ్లు
• ప్రీమియర్ షోలతో కలుపుకుని రూ. 54 కోట్లు
• భారీ ఓపెనింగ్స్ వచ్చినప్పటికీ, సోషల్ మీడియాలో ఈ చిత్రంపై మిశ్రమ స్పందన

ప్రభాస్ కథానాయకుడిగా, మారుతి దర్శకత్వంలో అత్యంత భారీ అంచనాల మధ్య విడుదలైన ‘రాజాసాబ్’ బాక్సాఫీస్ వద్ద మొదటి రోజు భారీ వసూళ్లు సాధించింది. ప్రముఖ ట్రేడ్ అనలిస్ట్ సంస్థ ‘Sacnilk’ నివేదిక ప్రకారం, ఈ చిత్రం ఇండియా వ్యాప్తంగా సుమారు రూ. 45 కోట్ల నెట్ వసూళ్లను రాబట్టింది. ఇక ప్రీమియర్ షోలతో కలుపుకుని ఈ సంఖ్య రూ. 54 కోట్లకు చేరింది. ప్రపంచవ్యాప్తంగా చూసుకుంటే, దాదాపు రూ. 90 కోట్ల గ్రాస్ వసూళ్లను సాధించి ప్రభాస్ సత్తాను మరోసారి చాటింది. హారర్-కామెడీ జోనర్‌లో ఒక సినిమా ఈ స్థాయిలో ఓపెనింగ్స్ సాధించడం భారతీయ సినీ చరిత్రలో ఇదే మొదటిసారి అని విశ్లేషకులు భావిస్తున్నారు.

The Raja Saab Sequel

సినిమా వసూళ్లపై రెండు రాష్ట్రాల్లోని భిన్నమైన పరిస్థితులు ప్రభావం చూపాయి. ఆంధ్రప్రదేశ్‌లో ప్రభుత్వం అనుమతించిన టికెట్ల ధరల పెంపు కొనసాగుతుండటంతో అక్కడ వసూళ్లు ఆశాజనకంగా ఉన్నాయి. అయితే, తెలంగాణలో మాత్రం చిత్ర యూనిట్‌కు ఊహించని ఎదురుదెబ్బ తగిలింది. టికెట్ ధరల పెంపుకు సంబంధించి ప్రభుత్వం జారీ చేసిన మెమోను తెలంగాణ హైకోర్టు సస్పెండ్ చేయడంతో, అక్కడ సాధారణ ధరలకే టికెట్లు విక్రయించాల్సి వచ్చింది. ఈ పరిణామం నైజాం ఏరియాలో ఆశించిన స్థాయి కంటే కొంత తక్కువ వసూళ్లు నమోదు కావడానికి ప్రధాన కారణమైంది.

భారీ ఓపెనింగ్స్ వచ్చినప్పటికీ, సోషల్ మీడియాలో ఈ చిత్రంపై మిశ్రమ స్పందన కనిపిస్తోంది. ఒకవైపు ప్రభాస్ వింటేజ్ లుక్ మరియు కామెడీ టైమింగ్‌ను అభిమానులు ఎంజాయ్ చేస్తుంటే, మరోవైపు కథలో బలం లేదని కొందరు విమర్శిస్తున్నారు. సోషల్ మీడియాలో నెగిటివ్ ట్రెండింగ్ కూడా చిత్ర యూనిట్‌ను కొంత ఆందోళనకు గురిచేస్తోంది. వీకెండ్ వరకు వసూళ్లు నిలకడగా ఉండే అవకాశం ఉన్నా, లాంగ్ రన్‌లో ఈ సినిమా ఎంతవరకు నిలబడుతుందనేది సోమవారం నాటి వసూళ్లపై ఆధారపడి ఉంటుంది. ఏదేమైనా, ప్రభాస్ క్రేజ్ కారణంగా డిజాస్టర్ టాక్ వచ్చినా మినిమమ్ వసూళ్లు రావడం గ్యారెంటీ అని ట్రేడ్ వర్గాలు విశ్లేషిస్తున్నాయి.

Follow us