14 Reels : అప్పుల ఊబిలో అఖండ నిర్మాతలు.. మెడకు చుట్టుకున్న ఆ 90 కోట్లు!

Akhanda 2 : అఖండ 2 విడుదల ఫైనాన్షియల్ ఇబ్బందుల కారణంగా వాయిదా పడింది. మొదట నిర్మాతలు ఫైనాన్షియర్లకు సుమారు ₹70 కోట్లు బకాయిలు ఉన్నట్లు తెలిసినా తాజాగా ఆ మొత్తం వడ్డీలతో కలిసి ₹90 కోట్లకు చేరిందని సమాచారం. ఈ డబ్బులు చెల్లించే వరకు సినిమా విడుదలకు అనుమతి ఉండదని ఫైనాన్షియర్లు అడ్డుపడటం వల్ల డిసెంబర్ 5 రిలీజ్ రద్దైంది. పరిస్థితి క్లిష్టంగా ఉండటంతో డిసెంబర్‌లో విడుదల అసాధ్యమని ట్రేడ్ వర్గాలు చెబుతున్నాయి. జనవరి, ఫిబ్రవరి నెలల్లో కూడా పెద్ద సినిమాలు రావడంతో అఖండ 2 2026 సమ్మర్ వరకూ వాయిదా పడే అవకాశం ఉందని ప్రచారం జరుగుతోంది.

పాన్ ఇండియా స్థాయిలో భారీ అంచనాలు క్రియేట్ చేసిన నందమూరి బాలకృష్ణ , బోయపాటి శ్రీను కాంబినేషన్‌లో తెరకెక్కిన ‘ అఖండ 2 ’ విడుదల వాయిదా మరింత వివాదాస్పదంగా మారుతోంది. డిసెంబర్ 5న ప్రేక్షకుల ముందుకు రావాల్సిన ఈ మాస్ యాక్షన్ ఎంటర్‌టైనర్, చివరి నిమిషంలో ఫైనాన్షియల్ ఇబ్బందుల కారణంగా ఆగిపోవడం టాలీవుడ్‌లో హాట్ టాపిక్ అయింది. 14 రీల్స్ ప్లస్ సంస్థ నిర్మించిన ఈ చిత్రం బాలకృష్ణ కెరియర్‌లో అత్యంత భారీ బడ్జెట్ మూవీగా రూపొందుతుండటంతో అంచనాలు మరింత పెరిగాయి. అయితే నిర్మాతలకు ఉన్న ఆర్థిక సమస్యలు సినిమా విడుదలనే నిలిపివేశాయి.

అఖండ 2 కోసం ముగ్గురు ఫైనాన్షియర్ల నుంచి అధిక వడ్డీపై పెద్ద మొత్తంలో డబ్బులు తీసుకున్నట్లు సమాచారం. మొదట నిర్మాతలు చెల్లించాల్సిన మొత్తం సుమారు 70 కోట్లు అని ప్రచారం జరిగింది. ఈ మొత్తాన్ని పూర్తిగా చెల్లించే వరకు సినిమా విడుదలకు అనుమతి ప్రకటించబోమని ఫైనాన్షియర్లు స్పష్టంగా తెలిపారు. ఇదే కారణంగా బుకింగ్స్ ఆగిపోవడంతో పాటు మద్రాస్ హైకోర్టు కూడా సినిమా విడుదలపై స్టే విధించింది. అయితే తాజాగా బయటకు వస్తున్న విశ్వసనీయ సమాచారం ప్రకారం అసలు బకాయి మొత్తం 70 కాదు… 90 కోట్లు అని తెలుస్తోంది. నిర్మాతలు తీసుకున్న రుణాలపై వడ్డీలు పెరుగుతూ రావడంతో మొత్తం మొత్తం భారీ స్థాయికి చేరిందని పరిశ్రమ వర్గాలు చెబుతున్నాయి. ఈ లెక్కలు బయటకు రావడంతో అభిమానుల్లో కొత్త ఆందోళన మొదలైంది. ఇంత పెద్ద మొత్తాన్ని ఒక్కసారిగా క్లియర్ చేయడం నిర్మాతలకు చాలా కష్టమని, అందువల్ల సినిమా ఇప్పట్లో విడుదలయ్యే అవకాశం లేదని అంచనా వ్యక్తం చేస్తున్నారు.

ఈ పరిస్థితుల్లో డిసెంబర్ నెలలో అఖండ 2 విడుదల అవుతుందా? అన్న సందేహం పెరుగుతోంది. ప్రస్తుతం ఉన్న పరిస్థితిని దృష్టిలో పెట్టుకుంటే ఈ నెలలో సినిమా రిలీజ్ అవడం చాలా క్లిష్టమని ట్రేడ్ వర్గాలు అభిప్రాయపడుతున్నాయి. సకాలంలో డబ్బులు చెల్లించకపోతే సినిమా విడుదల కొంతకాలం వాయిదా పడే అవకాశముంది. ఇదే సమయంలో సంక్రాంతి సీజన్‌కి ఇప్పటికే స్టార్ హీరోల సినిమాలు లైనప్ కావడంతో జనవరిలో విడుదల అవ్వడం కూడా అసాధ్యంగా కనిపిస్తోంది. ఫిబ్రవరి, మార్చి నెలలలో కూడా పెద్ద సినిమాల రిలీజ్ ఉండటంతో ‘అఖండ 2’కి సరైన విండో దొరకడం కష్టమనిపిస్తోంది. ఈ నేపథ్యంలో కొన్ని ట్రేడ్ ఊహాగానాల ప్రకారం సినిమా 2026 సమ్మర్‌లోనే విడుదల కావచ్చని చెబుతున్నాయి. విడుదల తేదీ ఇంత దూరంగా వెళ్లే అవకాశమే అభిమానులను మరింత కలవరపెడుతోంది.

బాలకృష్ణ కెరియర్‌లో ఇది 110వ సినిమా, అంతేకాకుండా బాలయ్య మొదటి పాన్ ఇండియా ప్రాజెక్ట్ కావడంతో ‘అఖండ 2’పై అభిమానులు భారీ అంచనాలు పెట్టుకున్నారు. అయితే ఇంత భారీ సినిమా ఇలాంటి ఆర్థిక వివాదాల్లో ఇరుక్కుపోవడంతో అభిమానులు నిర్మాణ సంస్థపై తీవ్ర ఆగ్రహం వ్యక్తం చేస్తున్నారు. అన్ని సమస్యలు పరిష్కారమై అఖండ 2 త్వరగా ప్రేక్షకుల ముందుకు రావాలని అందరూ కోరుకుంటున్నారు.