నవీన్ పోలిశెట్టి అనగనగా ఒక రాజు మూవీ రివ్యూ

Anaganaga Oka Raju Movie Review

Naveen Polishetty టాలీవుడ్‌లో ఉన్న కుర్ర హీరోల్లో స్క్రీన్ మీద చాలా ఎనర్జిటిక్‌గా కనిపించే వాళ్లలో నవీన్ పొలిశెట్టి ఒకరు. ముఖ్యంగా ఆయన కామెడీ టైమింగ్ అదిరిపోతుంది. ఏజెంట్ సాయి శ్రీనివాస ఆత్రేయ, జాతిరత్నాలు సినిమాల్లో నవీన్ చేసిన కామెడీ ఆడియన్స్‌కి విపరీతంగా నచ్చింది.

ఇక ‘మిస్ శెట్టి మిస్టర్ పొలిశెట్టి’ అనే డీసెంట్ హిట్ తర్వాత మూడేళ్లకి ఇలా ‘అనగనగా ఒక రాజు’ సినిమాతో సంక్రాంతి బరిలోకి దిగాడు నవీన్. ట్రైలర్, సాంగ్స్‌తోనే ఇది పక్కా పండగ ఎంటర్‌టైనర్ అనే క్లారిటీ మూవీ టీమ్ ఇచ్చింది. మరి ఆ అంచనాలన్ని థియేటర్లో నవీన్ అందుకున్నాడా? జాతిరత్నాలు లాంటి మరో హిట్ కొట్టాడా? అనేది రివ్యూలో చూద్దాం.

కథ ఇదేనండి ఆయ్
గౌరవపురం జమీందారు గోపరాజు మనవడు రాజు (నవీన్ పొలిశెట్టి)కి ఊరిలో పెద్ద పేరు ఉంటుంది కానీ చెప్పుకోవడానికి ఆస్తులేం ఉండవు. ఎందుకంటే వాళ్ల తాత పేరుకే గోపరాజు కానీ పెద్ద రసికరాజు. దీంతో అప్పట్లోనే ఉన్న ఆస్తులన్నీ దొబ్బెడతాడు. ఇక తాత ఆస్తులు ఎలాగూ ఇవ్వలేదూ కనీసం జమీందారు అనే ట్యాగ్ అయినా ఉంది కాబట్టి పెళ్లి చేసుకొని అయినా కోటీశ్వరుడు అయిపోదామని రాజు అనుకుంటాడు.

ఆ ప్రయత్నాల్లో పెద్దిపాలెం భూపతి రాజు (రావు రమేష్) ఒక్కగానొక్క కూతురు చారు (మీనాక్షి చౌదరి)ని చూసి రాజు ఇష్టపడతాడు. పైగా వాళ్లకి కోట్లకి కోట్లు ఆస్తులు ఉన్నాయని తెలిసి ఎలాగైనా ఆమెని ముగ్గులోకి దింపాలని ‘ఆపరేషన్ చారు’ అంటూ పెద్ద స్కెచ్ వేస్తాడు. అన్నీ అనుకున్నట్లే జరిగి భూపతి రాజు కూడా తన కూతురికి రాజుకి అటు ఏడు తరాలు ఇటు ఏడు తరాలు గుర్తుండిపోయేలా గ్రాండ్‌గా పెళ్లి చేస్తాడు.

ఇక్కడివరకూ కథ బానే ఉంటుంది అయితే ఫస్ట్ నైట్ రోజు రాజు చేతికి వాళ్ల మావయ్య భూపతి రాసిన లెటర్ అందుతుంది. అది చూసి రాజుకి బుర్ర తిరిగిపోద్ది. మరి ఆ లెటర్‌లో ఏముంది? అసలు పెళ్లితో కోటీశ్వరుడు అయిపోదామనుకున్న రాజుకి తగిలిన షాకేంటి? పెద్దిపాలెం ప్రెసిడెంట్ ఎలక్షన్‌లో నిలబడిన ఎర్రిబాబు (తారక్ పొన్నప్ప)కి పోటీగా రాజు ఎందుకు నామినేషన్ వేశాడు? ప్రెసిడెంట్ ఎన్నికల్లో రాజు గెలిచాడా? అనేది మిగిలిన కథ.

నవ్వుల రైడ్
నవీన్ పోలిశెట్టి సినిమా అనగానే నవ్వించాడా? అని అడిగేవాళ్ల కంటే ఎంత నవ్వించాడు అని అడిగేవాళ్లే ఎక్కువమంది ఉంటారు. ఎందుకంటే నవ్వించడంపై నవీన్‌కి అంత కమాండ్ ఉంది. ఇప్పుడున్న కుర్ర హీరోల్లో ఈ రేంజ్ కామెడీ టైమింగ్ ఉన్న వాళ్లు చాలా తక్కువ. ముఖ్యంగా నవీన్ నటుడే కాకుండా మంచి రైటర్ కూడా కావడంతో అది స్క్రీన్ మీద ఇంకా బాగా తెలుస్తుంది. ఈ సినిమాకి కూడా నవీన్ డైలాగ్స్, స్క్రీన్‌ప్లే రాశాడు.

విలేజ్ బ్యాక్‌డ్రాప్‌లో పక్కా నవ్వుల రైడ్‌గా సినిమా ఉంది. తాను రిచ్చే రిచ్చు అంటూ నవీన్ పోలిశెట్టి ఇచ్చే బిల్డప్‌లు, కవరింగ్‌లతో మొదలైన ఈ నవ్వులు.. హీరోయిన్‌ని పడేయడానికి మొదలైన ఆపరేషన్ చారుతో ఇంకా రెట్టింపు అయ్యాయి. ముఖ్యంగా పెద్దిపాలెం బీచ్‌ని గోవాగా మార్చిన సీన్.. హీరోయిన్‌తో కలిసి చేసి పారా గ్లైడింగ్ సీన్‌ థియేటర్లో నవ్వులు పూయించాయి. ఆ సీన్లలో నవీన్ కామెడీ అదిరిపోయింది. ఇక పెళ్లి అయిన తర్వాత హీరోకి ఒక నిజం తెలియడంతో నవీన్‌కి షాక్.. ఆడియన్స్‌కి బ్రేక్ అంటూ ఇంటర్వెల్‌కి మంచి బ్యాంగ్ ఇచ్చారు.

ఇక సెకండాఫ్ మొత్తం ప్రెసిడెంట్ ఎన్నికల ప్రచారం.. ప్రజా సమస్యలు అంటూ నవీన్ చేసిన కామెడీ హంగామా కూడా ఎక్కడా బ్రేక్ లేకుండా ప్రేక్షకుల్ని నవ్విస్తుంది. ముఖ్యంగా సినిమా మొదలైనప్పటి నుంచి చివరి వరకూ ఎక్కడా కామెడీ డోస్ తగ్గకుండా జాగ్రత్తప్పడ్డారు. ఇక ప్రీ క్లైమాక్స్‌లో ఇచ్చిన ఎమోషనల్ టర్న్ కూడా సినిమాకి ప్లస్ అయింది. అప్పటివరకూ కామెడీగా సాగిన కథని చిన్న ఎమోషనల్ టర్న్‌తో సీరియస్‌గా మార్చారు. కానీ చివరిలో మళ్లీ నవ్వులతోనే శుభం కార్డు వేశారు.

నవ్వుల నవీన్
సినిమా మొత్తం ఎక్కడా నవ్వులకి బ్రేక్ రాకుండా చాలా బాగా ఎంటర్‌టైన్ చేశాడు నవీన్. ముఖ్యంగా నవీన్ ఒన్ లైనర్లు, పంచులు బాగానే పేలాయి. స్క్రీన్ మీద ఎప్పటిలానే చాలా ఎనర్జిటిక్‌గా నవీన్ యాక్ట్ చేశాడు. ఇక మీనాక్షి చౌదరి గత ఏడాదికి సంక్రాంతికి వస్తున్నాం అంటూ భారీ హిట్ కొట్టింది. ఇక ఈ ఏడాది కూడా పండగకి పలకరించింది. చారు పాత్రలో మీనాక్షి కూడా బాగానే నటించింది. ఇక కనిపించింది కాసేపే అయినా రావు రమేష్ కూడా తన పాత్రతో బాగానే ఎంటర్‌టైన్ చేశారు.

ఇక మహేష్ ఆచంట, ముక్కు అవినాష్, ఝాన్సీ సహా మిగిలిన పాత్రలు అక్కడక్కడా నవ్వించాయి. విలన్ పాత్రలో కనిపించిన తారక్ పొన్నప్ప బానే యాక్ట్ చేశాడు. అయితే నవీన్ మాత్రం ఒన్ మ్యాన్ షో కింద మొత్తం ఎంటర్‌టైన్‌మెంట్ బాధ్యతని తన భుజాలపై వేసుకున్నాడు. మిక్కీ జే మేయర్ ఇచ్చిన సాంగ్స్‌లో భీమవరం బాల్మా సాంగ్ బావుంది. బ్యాక్ గ్రౌండ్ స్కోర్ కూడా ఫర్వాలేదు. ఓవరాల్‌గా ఈ సంక్రాంతికి నవీన్ నవ్వులు పంచడం ఖాయం.

సింపుల్‌గా చెప్పాలంటే అనగనగా ఒక రాజు.. సంక్రాంతికి నవీన్ నవ్వుల రైడ్

Follow us