Yellamma: ఎల్ల‌మ్మ సినిమాపై దిల్ రాజు కీల‌క ప్ర‌క‌ట‌న‌.. కాస్టింగ్ గందరగోళానికి తెర?

Yellamma

Yellamma: ప్ర‌ముఖ‌ నిర్మాత దిల్ రాజు ప్రతిష్టాత్మకంగా నిర్మించ తలపెట్టిన ఎల్ల‌మ్మ‌ (Yellamma) చిత్రం మరోసారి వార్తల్లో నిలిచింది. ‘బలగం’ వంటి బ్లాక్‌బస్టర్ సినిమాతో దర్శకుడిగా తన సత్తా చాటుకున్న వేణు యెల్దండి దర్శకత్వంలో ఈ ప్రాజెక్ట్ రూపుదిద్దుకోనుంది. అయితే ఈ సినిమాకు సంబంధించిన కాస్టింగ్ విషయంలో గత కొంతకాలంగా నెలకొన్న అనిశ్చితి, పుకార్ల కారణంగా ఈ ప్రాజెక్ట్ ఆలస్యం అవుతూ వచ్చింది.

వివిధ సందర్భాలలో ప్రముఖ నటులు నాని, నితిన్, కీర్తి సురేష్, సాయి పల్లవి వంటి అగ్ర తారల పేర్లు ఈ సినిమాతో ముడిపడ్డాయి. కానీ ఆ ఊహాగానాలు ఏవీ కార్యరూపం దాల్చకపోవడంతో ఎల్లమ్మ కాస్టింగ్ ఒక పెద్ద సవాలుగా మారింది. సరైన నటీనటులను ఎంపిక చేయడంలో బృందానికి ఊహించిన దానికంటే ఎక్కువ సమయం పట్టిందని ఈ పరిణామాలు స్పష్టం చేస్తున్నాయి.

తాజా సమాచారం ప్రకారం.. ప్రముఖ సంగీత దర్శకుడు దేవి శ్రీ ప్రసాద్ ఇందులో ప్రధాన పాత్ర పోషించనున్నట్లు గుసగుసలు వినిపిస్తున్నాయి. అయితే దీనిపై కూడా అధికారిక ధృవీకరణ రావాల్సి ఉంది.

Also Read: Donald Trump: అమెరికా అధ్యక్షుడు ట్రంప్ మ‌రో సంచ‌ల‌న నిర్ణ‌యం!

దిల్ రాజు కీలక ప్రకటన

సినిమా కాస్టింగ్ చుట్టూ ఇంత గందరగోళం నెలకొన్నప్పటికీ నిర్మాత దిల్ రాజు ఇటీవల ఈ ప్రాజెక్ట్‌పై ఒక కీలక ప్రకటన చేశారు. గోవాలో జరిగిన IFFI 2025 ఈవెంట్‌ను సందర్శించిన సందర్భంగా ఆయన మీడియాతో మాట్లాడుతూ.. ఎల్లమ్మకు సంబంధించిన అధికారిక ప్రకటన పది రోజుల్లో వెలువడుతుందని తెలిపారు.

ఒక టైమ్‌లైన్‌ను దిల్ రాజు ప్రకటించడం ఇదే మొదటిసారి కావడంతో ఇకపై ఎల్లమ్మ ప్రాజెక్ట్‌కు సంబంధించిన కాస్టింగ్, ఇతర వివరాలపై స్పష్టత వస్తుందని చిత్ర పరిశ్రమ వర్గాలు ఆశిస్తున్నాయి. ఈ చిత్రం 2026లో విడుదల చేయాలని లక్ష్యంగా పెట్టుకున్నట్లు కూడా దిల్ రాజు వెల్లడించారు. దిల్ రాజు ప్రకటనతో ఎల్లమ్మ చుట్టూ అల్లుకున్న అన్ని ఊహాగానాలకు తెరపడే అవకాశం ఉంది. కాస్టింగ్ గందరగోళం తొలగి, ప్రాజెక్ట్ పరుగులు తీయడానికి సిద్ధంగా ఉందని సినీ అభిమానులు భావిస్తున్నారు. ఈ ప్రకటన విడుదలైన తర్వాత ఎల్లమ్మలో ప్రధాన పాత్రలు ఎవరు పోషిస్తారు? కథాంశం ఏమిటి వంటి వివరాలు వెల్లడయ్యే అవకాశం ఉంది.

Follow us