Chiranjeevi : మీసాల పిల్ల పాట రిలీజ్ చేసి అనిల్ రావిపూడి తప్పు చేశారా?

చిరంజీవి, నయనతార కాంబినేషన్ లో వస్తున్న సినిమా ‘ మన శంకర వరప్రసాద్ గారు ‘. అనిల్ రావిపూడి దర్శకత్వంలో ఈ చిత్రం తెరకెక్కుతోంది. పండక్కి వస్తున్నాడు అనే ట్యాగ్ లైన్ తో సంక్రాంతికి రిలీజ్ చెయ్యాలనే టార్గెట్ గా పెట్టుకుని షూటింగ్ చేస్తున్నారు. సెట్స్ పైకి తీసుకెళ్లినప్పటి నుంచే ప్రమోషన్స్ కూడా స్టార్ట్ చేశారు. తరచుగా ఏదొక అప్డేట్ అందిస్తూ సినిమాపై జనాల్లో ఇంట్రెస్ట్ క్రియేట్ చేస్తూ వస్తున్నారు. ఇందులో భాగంగా రీసెంట్ గా ‘మీసాల పిల్ల’ అనే ఫస్ట్ సింగిల్ లాంచ్ చేశారు. అయితే ఈ పాట వదిలి అనిల్ రావిపూడి పెద్ద తప్పు చేశారని మెగా అభిమానులు భావిస్తున్నారు.

‘సంక్రాంతికి వస్తున్నాం’ వంటి బ్లాక్ బస్టర్ తర్వాత అనిల్ రావిపూడి నుంచి రాబోతున్న సినిమా కావడంతో ముందు నుంచే ‘మన శంకర వరప్రసాద్ గారు’పై మంచి అంచనాలున్నాయి. అది కూడా చిరంజీవితో చేస్తున్న సినిమా అవ్వడం, నయన్ హీరోయిన్, విక్టరీ వెంకటేష్ స్పెషల్ రోల్ చేస్తుండటంతో అందరిలో ఆసక్తి నెలకొంది. భీమ్స్ సిసిరీలియో మ్యూజిక్ పైనా జనాల్లో అంచనాలు ఏర్పడ్డాయి. ‘గోదారి గట్టు మీద రామ చిలకవే’ రేంజ్ లో ఒక్క వైరల్ సాంగ్ పడినా చాలని ఫ్యాన్స్ అనుకున్నారు. దానికి తగ్గట్టుగానే ‘మీసాల పిల్ల’ పాటను రిలీజ్ చేశారు .

 

గతంలో చిరంజీవికి చార్ట్ బస్టర్ సాంగ్స్ పాడిన సీనియర్ సింగర్ ఉదిత్ నారాయణ్ ను తీసుకొచ్చి ‘మీసాల పిల్ల’ పాట పాడించారు. చిరు, నయనతారపై చిత్రీకరించిన ఈ గీతానికి మిక్స్డ్ రెస్పాన్స్ వచ్చింది. మెగా అభిమానుల వరకు ఎంజాయ్ చేస్తున్నారు కానీ.. నార్మల్ ఆడియన్స్ నుంచి మాత్రం కాస్త డివైడ్ టాక్ వస్తోంది. యాంటీ ఫ్యాన్స్ గురించి ఇంక చెప్పాల్సిన పనిలేదు. ప్రోమో వచ్చినప్పుడే ట్రోలింగ్ మొదలు పెట్టారు. సాంగ్ సెటప్, మెగాస్టార్ లుక్స్, విజువల్స్ పై విమర్శలు చేస్తున్నారు. ఈ సంగతి అటుంచితే ఫస్ట్ సింగిల్ గా ఈ పాట రిలీజ్ చేయకుండా ఉండాల్సిందనే అభిప్రాయాలు ఫ్యాన్స్ గ్రూప్స్ లో వ్యక్తమవుతున్నాయి.

 

‘మీసాల పిల్ల’ పాటలో చిరంజీవి, నయన్ భార్యాభర్తలుగా కనిపించారు. అయితే ఈ పాటలోనే కథ ఏంటి? అనేది కాస్త హింట్ ఇచ్చారు అనిల్ రావిపూడి. ‘రాజీ పడదామంటే రావేం మాజీ ఇల్లాలా.. నువ్వు రోజు పెట్టే నరకంలోకి మళ్ళీ దూకాలా.. అబ్బా పాతవన్నీ తొడాలా? నా అంతు ఏదో చూడాలా??’ అంటూ మొగుడు పెళ్లాల మధ్య గొడవలు వచ్చి విడిపోయారని, మళ్లీ తన భార్యతో కలవడానికి శంకర వరప్రసాద్ గారు ప్రయత్నిస్తున్నారనే విషయాలు అర్థమైపోయాయి. ఇలా ఒక్క సాంగ్ తో కంటెంట్ ఏంటనేది చెప్పేయడాన్ని మెగా ఫ్యాన్స్ తట్టుకోలేకపోతున్నారు.

 

చిరంజీవి, సిమ్రాన్ కలిసి నటించిన ‘డాడీ’.. నయనతార గతంలో హీరోయిన్ గా చేసిన ‘విశ్వాసం’, ‘తులసి’ వంటి చిత్రాలని మిక్స్ చేసిన కథతో ‘మన శంకర వరప్రసాద్ గారు’ సినిమా రెడీ అవుతుందేమో అని నెటిజన్లు సందేహాలు వ్యక్తం చేస్తున్నారు. ‘మీసాల పిల్ల’ పాటపై ట్రోల్స్ ఓవైపు, మరోవైపు పాత చింతకాయ పచ్చడిలాంటి కథ ఇదనే కామెంట్స్ మెగా అభిమానులను తెగ ఇబ్బంది పెడుతున్నాయి. మామూలుగానే అనిల్ రావిపూడి సినిమాలు అంటే క్రింజ్ స్టఫ్ ఉంటుందనే విమర్శలు వస్తుంటాయి. ఇప్పుడు పాటతోనే స్టోరీ లైన్ చెప్పేయడంతో, అది సినిమాకి ఇంట్రెస్ట్ తగ్గిస్తుందని ఫ్యాన్స్ భావిస్తున్నారు.

 

అయితే ఇలా స్టోరీ లైన్ చూచాయగా చెప్పేయడం ప్రచార వ్యూహంలో భాగమేనా అనే చర్చ కూడా నడుస్తోంది. సినిమా కథ ఏంటనేది ముందే చెప్పేసి, పండక్కి ఫ్యామిలీ అంతా కలిసి చూసే కంటెంట్ తో రాబోతున్నామని ఆడియన్స్ ని ప్రిపేర్ చేస్తున్నారా? అనే డౌట్లు కూడా వస్తున్నాయి. అనిల్ రావిపూడికి సంక్రాంతి సెంటిమెంట్ ఉంది. ఎన్ని ట్రోల్స్ వచ్చినా సరే, పండక్కి వచ్చాడంటే బొమ్మ బ్లాక్ బస్టరరే. ఈసారి కూడా అదే మ్యూజిక్ రిపీట్ అవుతుందని విశ్లేషకులు భావిస్తున్నారు. ఏ స్థాయి విజయం సాధిస్తుందనేది రాబోయే రోజుల్లో విడుదల చేసే ప్రమోషనల్ కంటెంట్ మీది ఆధారపడి ఉంటుందని కామెంట్స్ చేస్తున్నారు.