కార్తీతో బోయపాటి శ్రీను క్రేజీ ప్రాజెక్ట్?

Boyapati Srinu

Boyapati Srinu: టాలీవుడ్ మాస్ డైరెక్టర్ బోయపాటి శ్రీను ప్రస్తుతం తన తదుపరి సినిమా కోసం కొత్త కథను సిద్ధం చేసే పనిలో పడ్డారు. భారీ అంచనాల మధ్య విడుదలైన అఖండ 2 బాక్సాఫీస్ వద్ద ఆశించిన ఫలితాన్ని ఇవ్వలేకపోయింది. ఈ ఫ్లాప్ తర్వాత బోయపాటి తన తర్వాతి ప్రాజెక్ట్‌ను ఎలాగైనా హిట్ చేయాలనే పట్టుదలతో ఉన్నారు. తాజాగా వినిపిస్తున్న వార్తల ప్రకారం.. సింహా దర్శకుడు ఈసారి కోలీవుడ్ స్టార్ హీరో కార్తీతో చేతులు కలపాలని ఆలోచిస్తున్నట్లు తెలుస్తోంది.

పలువురు హీరోలతో ప్రయత్నాలు

అఖండ 2 తర్వాత బోయపాటి శ్రీను తొలుత ఐకాన్ స్టార్ అల్లు అర్జున్‌తో సినిమా చేయాలని ప్రయత్నించారు. గతంలో వీరిద్దరి కాంబినేషన్‌లో వచ్చిన సరైనోడు బ్లాక్‌బస్టర్ కావడంతో మళ్లీ అటువంటి సినిమా వస్తుందని అభిమానులు ఆశించారు. కానీ కొన్ని కారణాల వల్ల ఈ ప్రాజెక్ట్ కార్యరూపం దాల్చలేదు. ఆ తర్వాత బోయపాటి ఒక బాలీవుడ్ హీరోతో సినిమా చేయబోతున్నారనే ఊహాగానాలు కూడా వచ్చాయి. అయితే ఈ వార్తల్లో కూడా వాస్తవం లేదని తేలిపోయింది.

Also Read: కొత్త సిలిండర్ బుకింగ్ రూల్స్.. మే 1 నుండి మారనున్న నిబంధనలు?

కార్తీతో కొత్త ప్రయోగం

ప్రస్తుతం అందుతున్న సమాచారం ప్రకారం.. విభిన్న కథలను ఎంచుకుంటూ తెలుగు ప్రేక్షకులకు కూడా చేరువైన కార్తీపై బోయపాటి ఆసక్తి చూపిస్తున్నారు. కార్తీకి తెలుగులో మంచి మార్కెట్ ఉండటం, ఆయన నటనలో ఉన్న వైవిధ్యం బోయపాటిని ఆకర్షించినట్లు తెలుస్తోంది. బోయపాటి మార్క్ మాస్ యాక్షన్ ఎలిమెంట్స్ కార్తీ ఇమేజ్‌కు తోడైతే ఫలితం ఎలా ఉంటుందనేది ఇప్పుడు ఇండస్ట్రీలో ఆసక్తికరంగా మారింది.

స్క్రిప్ట్- అంచనాలు

ఒకవేళ ఈ కాంబినేషన్ కుదిరితే మాస్ యాక్షన్ సినిమాలకు కేరాఫ్ అడ్రస్‌గా నిలిచే బోయపాటి సాఫ్ట్, సీరియస్ రోల్స్‌ను అద్భుతంగా పండించే కార్తీ కోసం ఎటువంటి కథను డిజైన్ చేస్తారనేది ఉత్కంఠ రేపుతోంది. కార్తీ గతంలో ఖైదీ, సర్దార్ వంటి చిత్రాలతో మాస్ యాక్షన్ వైపు అడుగులు వేసినప్పటికీ బోయపాటి చూపించే ఊరమాస్ స్టైల్ పూర్తిగా భిన్నంగా ఉంటుంది. ఈ క్రేజీ కాంబో గురించి అధికారిక ప్రకటన వస్తే తప్ప అసలు విషయం తెలియదు. ఏదేమైనా అఖండ 2 ఫ్లాప్ తర్వాత బోయపాటి గట్టి కమ్‌బ్యాక్ కోసం సిద్ధమవుతున్నట్లు స్పష్టమవుతోంది.

Follow us