Drug Peddler: కేర‌ళ‌లో ప‌ట్టుబ‌డిన మ‌హిళా డ్ర‌గ్ స్మ‌గ్ల‌ర్‌.. కాంటాక్ట్ లిస్ట్‌లో ప్ర‌ముఖ న‌టుడు?

Drug Peddler: కేరళ ఎక్సైజ్ అధికారులు ఇక మహిళా డ్రగ్ స్మగ్లర్‌ను (Drug Peddler) ఆమె సహచరుడితో సహా అరెస్టు చేశారు. వారి వద్ద నుంచి 2 కోట్ల రూపాయల విలువైన గంజాయిని కూడా స్వాధీనం చేసుకున్నారు. అయితే అధికారులు చెప్పిన ప్రకారం.. మహిళ ఫోన్‌లో పలువురు సినీ ప్రముఖుల వాట్సాప్ చాట్‌లు కూడా బయటపడ్డాయి. అధికారులు విడుదల చేసిన ప్రకటన ప్రకారం.. ఒక రహస్య సమాచారం ఆధారంగా వారు చాలా కాలంగా ఈ మహిళపై నిఘా ఉంచారు. బుధవారం ఒమనపుజా కోస్టల్ రోడ్ నుంచి మహిళా డ్రగ్ స్మగ్లర్ తస్లీమా సుల్తానా, ఆమె సహచరుడు ఫిరోజ్‌ను అరెస్టు చేశారు. వారి వద్ద నుంచి మూడు ప్యాకెట్లలో ఉన్న 2 కోట్ల రూపాయల విలువైన గంజాయిని స్వాధీనం చేసుకున్నట్లు ప్ర‌కటించారు.

మ‌రో అధికారి తెలిపిన వివరాల ప్రకారం.. తస్లీమా చెన్నైకి చెందినది. డ్రగ్స్ మార్కెట్‌లో ఆమె క్రిస్టీనా పేరుతో పిలువబడుతుంది. ఆమె ప్రధానంగా కొచ్చి నుంచి తన డ్రగ్ వ్యాపారాన్ని నిర్వహిస్తుంది. మహిళ తాను పలువురు ప్రముఖ సినీ తారలకు డ్రగ్స్ సరఫరా చేస్తున్నట్లు పేర్కొంది. కొంతమంది సినీ ప్రముఖుల పేర్లను కూడా వెల్లడించింది. మహిళ ఫోన్‌లో పలువురు సినీ ప్రముఖుల వాట్సాప్ చాట్‌లు కూడా లభ్యమయ్యాయి. ఈ నేపథ్యంలో ఈ కేసును మరింత విస్తృతంగా విచారించి తదుపరి చర్యలు తీసుకోనున్నారు. అయితే ఈ మ‌హిళా డ్ర‌గ్ స్మ‌గ్ల‌ర్‌తో మలయాళ నటులు షైన్ టామ్ చాకో, శ్రీనాథ్ భాసికి సంబంధాలు ఉన్న‌ట్లు స‌మాచారం. ఈ విష‌యంపై ఉన్న‌తాధికారులు మ‌రింత ద‌ర్యాప్తు చేస్తున్న‌ట్లు తెలుస్తోంది.

Also Read: BCCI : ఉప్పల్ స్టేడియంపై బీసీసీఐ చిన్న చూపు

షైన్ టామ్ చాకో ఒక భారతీయ నటుడు. ప్రధానంగా మలయాళ సినిమాల్లో పనిచేస్తాడు. తన సినీ ప్రస్థానాన్ని సహాయ దర్శకుడిగా ప్రారంభించిన షైన్, ప్రముఖ దర్శకుడు కమల్‌తో సుమారు 9 సంవత్సరాలు పనిచేశాడు. 2011లో “గద్దామ” చిత్రంతో నటుడిగా అడుగుపెట్టాడు. మలయాళంతో పాటు, షైన్ తమిళ, తెలుగు, హిందీ చిత్రాల్లో కూడా నటించాడు. 2022లో విజయ్ నటించిన “బీస్ట్” చిత్రంతో తమిళంలో అడుగుపెట్టాడు. ఇది బాక్సాఫీస్ వద్ద 300 కోట్లకు పైగా వసూలు చేసింది. తెలుగులో “దసరా” (2023) చిత్రంలో విలన్‌గా నటించి గుర్తింపు పొందాడు. అతని ఇటీవలి చిత్రాల్లో “జిగర్తండ డబుల్ ఎక్స్” (2023), “లిటిల్ హార్ట్స్” (2024) ఉన్నాయి. షైన్ 2015లో డ్రగ్స్ కేసులో అరెస్టయ్యాడు. కానీ 2025లో ఎర్నాకులం కోర్టు అతన్ని నిర్దోషిగా ప్రకటించింది.