EVERTA: భారత EV మార్కెట్‌లో సంచలనం సృష్టించనున్న EVERTA.. 2025లోనే ఫాస్ట్ ఛార్జర్ లాంచ్.!

EVERTA: భారతదేశంలో ఎలక్ట్రిక్ కార్ల డిమాండ్ వేగంగా పెరుగుతున్న నేపథ్యంలో, ఎలక్ట్రిక్ వాహన (EV) ఛార్జర్ తయారీ కంపెనీ EVERTA తన తొలి DC ఫాస్ట్ ఛార్జర్ రేంజ్‌ను 2025 డిసెంబర్ నాటికి ప్రారంభించనున్నట్లు ప్రకటించింది. సంస్థ వచ్చే రెండేళ్లలో ₹250 కోట్ల పెట్టుబడి పెట్టి, 2027 నాటికి బెంగళూరులోని తయారీ యూనిట్‌లో సంవత్సరానికి 3,000 DC ఛార్జర్ల తయారీ సామర్థ్యాన్ని పెంచే లక్ష్యాన్ని పెట్టుకుంది.

2030 నాటికి 15% మార్కెట్ షేర్ లక్ష్యం

EVERTA 2030 నాటికి భారత DC ఛార్జింగ్ మార్కెట్‌లో 15% వాటాను సంపాదించాలనుకుంటోంది. ఈ మార్కెట్ మొత్తం సైజు వచ్చే 10 సంవత్సరాల్లో సుమారు 8 లక్షల ఛార్జర్లకు చేరుతుందని అంచనా. సంస్థ మేనేజింగ్ డైరెక్టర్ బెనీ పరిహార్ మాట్లాడుతూ, “2030 నాటికి DC ఛార్జర్ రంగంలో 15% మార్కెట్ షేర్ సాధించడం మా ప్రధాన టార్గెట్,” అని తెలిపారు.

ఈవీ ఛార్జింగ్ సులభతరం చేయడమే లక్ష్యం

ప్రారంభ దశలో, సంస్థ 60 కిలోవాట్ల నుండి 320 కిలోవాట్ల వరకు శక్తివంతమైన DC ఛార్జర్లను ఎలక్ట్రిక్ కార్లు, బస్సులు, ట్రక్కులు కోసం అందించనుంది. మొదటగా, CPOలు (చార్జింగ్ పాయింట్ ఆపరేటర్లు), ఫ్లీట్ ఆపరేటర్లు, బస్ డిపోలు, ఆటోమోటివ్ OEMలు లక్ష్యంగా తీసుకొని సేవలు అందించనుంది. ఈ రంగాల్లో వ్యూహాత్మక భాగస్వామ్యాల కోసం ఇప్పటికే చర్చలు జరుపుతోంది.

ప్రధాని ఈ-బస్ సేవా పథకం ప్రభావం

ప్రభుత్వ ప్రోత్సాహాల వల్ల ఎలక్ట్రిక్ బస్ సెగ్మెంట్‌లో EV ఛార్జింగ్ రంగం వేగంగా ఆకర్షణీయంగా మారుతోందని EVERTA భావిస్తోంది. ప్రధాని ఈ-బస్ సేవా పథకం కింద భారీ పరిశ్రమల మంత్రిత్వ శాఖ దేశవ్యాప్తంగా 72,300 పబ్లిక్ EV ఛార్జర్లు ఏర్పాటు చేయడానికి ₹2,000 కోట్లు కేటాయించింది. వీటిలో 1,800 ఛార్జర్లు ప్రత్యేకంగా ఎలక్ట్రిక్ బస్సుల కోసం ఉంటాయి.

స్టార్ ఛార్జ్‌తో భాగస్వామ్యం

2024లో ₹10,900 కోట్లతో ప్రారంభమైన పీఎం ఈ-డ్రైవ్ పథకం నగర ప్రాంతాల్లో ఎలక్ట్రిక్ మొబిలిటీని వేగంగా విస్తరించడానికి ఉద్దేశించబడింది. ఇందులో ₹4,391 కోట్లు ఈ-బస్సుల కొనుగోలు కోసం కేటాయించగా, 1,800 ఫాస్ట్ ఛార్జర్లను ఏర్పాటు చేసే ప్రణాళిక కూడా ఉంది.

EVERTA, ప్రపంచవ్యాప్తంగా 60 దేశాల్లో 20 లక్షలకుపైగా ఛార్జర్లు ఏర్పాటు చేసిన స్టార్ ఛార్జ్ కంపెనీతో వ్యూహాత్మక ఒప్పందం కుదుర్చుకుంది. ఈ భాగస్వామ్యం ద్వారా EVERTA భారత్‌లో తన DC ఛార్జర్ల తయారీ, ఇన్‌స్టాలేషన్, సర్వీస్‌లను మరింత విస్తరించనుంది.