PSU Banks : ప్రభుత్వ రంగ బ్యాంకుల పై కేంద్రం షాకింగ్ కుదేలైన అన్ని షేర్లు!

ప్రభుత్వ రంగ బ్యాంక్ షేర్లు.. బుధవారం సెషన్‌లో తీవ్రంగా కుదేలయ్యాయి. దాదాపు అన్ని పీఎస్‌యూ బ్యాంకుల షేర్లు పతనం అయ్యాయి. కేంద్ర ఆర్థిక మంత్రిత్వ శాఖ ఒక్క ప్రకటనతో ఇలా జరగడం గమనార్హం. ప్రభుత్వ రంగ బ్యాంకుల్లో.. ఎఫ్‌డీఐ పరిమితిని 49 శాతానికి పెంచే ప్రతిపాదన లేదని చెప్పగా స్టాక్స్ పతనం అవుతున్నాయి.

దేశీయ స్టాక్ మార్కెట్ సూచీలు బుధవారం సెషన్‌లో ఒడుదొడుకుల్లో ట్రేడవుతున్నాయి. సెషన్ ఆరంభంలో బొంబాయి స్టాక్ ఎక్స్చేంజి సూచీ సెన్సెక్స్ 200 పాయింట్లకుపైగా పడిపోగా.. ఇప్పుడు కాస్త కోలుకున్నాయి. ప్రస్తుతం వార్త రాస్తున్న సమయంలో మధ్యాహ్నం 12.30 గంటలకు సెన్సెక్స్ 150 పాయింట్ల పతనంతో 84,980 స్థాయిలో ఉంది. నిఫ్టీ 70 పాయింట్ల నష్టంతో 25,960 స్థాయిలో కదలాడుతోంది. అయితే.. ఇక్కడ నిఫ్టీ పీఎస్‌యూ బ్యాంక్ ఇండెక్స్ ఏకంగా 3 శాతానికిపైగా కుదేలైంది. అంటే ప్రభుత్వ రంగ బ్యాంకుల స్టాక్స్ భారీగా పడిపోవడంతో ఇలా జరిగింది. దాదాపు అన్ని ప్రభుత్వ రంగ బ్యాంకుల షేర్లు నష్టాల్లోనే ట్రేడవుతున్నాయి. కేంద్ర ప్రభుత్వం నుంచి ఒక్క ప్రకటనతోనే ఇలా జరిగింది.

ప్రస్తుత ప్రభుత్వ రంగ బ్యాంకుల్లో విదేశీ ప్రత్యక్ష పెట్టుబడుల పరిమితి 20 శాతంగా ఉండగా.. దీనిని 49 శాతానికి పెంచేందుకు కేంద్రం యోచిస్తుందని కొంతకాలంగా ఊహాగానాలు వచ్చాయి. రాయిటర్స్ రిపోర్ట్ కూడా ఇటీవల నివేదించింది. ఈ క్రమంలోనే.. ఆ సమయంలో ప్రభుత్వ రంగ బ్యాంకుల షేర్లు భారీగా దూసుకెళ్లి రికార్డు గరిష్టాలకు చేరాయి.

ఇప్పుడు దీనిపై కేంద్ర ప్రభుత్వం నుంచి ప్రకటన వచ్చింది. ప్రభుత్వ బ్యాంకుల్లో ఎఫ్‌డీఐ పరిమితిని 49 శాతానికి పెంచే ప్రతిపాదన ఏదీ ప్రస్తుతానికి ప్రభుత్వం దగ్గర లేదని కేంద్ర ఆర్థిక శాఖ సహాయ మంత్రి పంకజ్ చౌదరీ పార్లమెంటులో స్పష్టం చేశారు. రాజ్యసభలో మంగళవారం రోజు లిఖితపూర్వకంగా ఇచ్చిన సమాధానంలో ఆయన ఈ విషయాల గురించి ప్రస్తావించారు. ప్రస్తుతం ప్రభుత్వ బ్యాంకుల్లో ఎఫ్‌డీఐ పరిమితి 20 శాతం, ప్రైవేట్ బ్యాంకుల్లో 74 శాతం వరకు ఉందని ఆయన వెల్లడించారు. ప్రైవేట్ బ్యాంకుల్లోనూ ఆటోమేటిక్‌గా 49 శాతం వరకు.. ఆపైన కూడా ప్రభుత్వ అనుమతితోనే విదేశీ పెట్టుబడులు సాధ్యమని స్పష్టం చేశారు.

ఈ క్రమంలోనే ఇన్వెస్టర్లు బుధవారం సెషన్‌లో బ్యాంకింగ్ స్టాక్స్ విక్రయిస్తున్నారు. తీవ్ర అమ్మకాల ఒత్తిడి నేపథ్యంలో షేర్ ధరలు భారీగా పడిపోతున్నాయి. ప్రస్తుతం వార్త రాస్తున్న సమయంలో ఇండియన్ బ్యాంక్ షేర్ 6 శాతానికిపైగా నష్టంతో రూ. 805 స్థాయిలో ఉంది. పంజాబ్ నేషనల్ బ్యాంక్ షేరు 4 శాతానికిపైగా పతనమైంది. బ్యాంక్ ఆఫ్ ఇండియా షేర్ ధర 4 శాతం వరకు తగ్గింది. కెనరా బ్యాంక్, బ్యాంక్ ఆఫ్ బరోడా షేర్లు 3 శాతానికిపైగా తగ్గాయి. యూకో బ్యాంక్, సెంట్రల్ బ్యాంక్ ఆఫ్ ఇండియా, పంజాబ్ అండ్ సింద్ బ్యాంక్, యూనియన్ బ్యాంక్ ఆఫ్ ఇండియా షేర్లు 2 శాతం వరకు పడిపోగా.. ఎస్బీఐ షేరు కూడా ఒక శాతానికిపైగా తగ్గింది.