ప్ర‌ధాని మోదీ కారు ప్ర‌త్యేక‌తలు ఇవే!

Modi Range Rover

Modi Range Rover: గణతంత్ర దినోత్సవం 2026 సందర్భంగా ప్రధానమంత్రి నరేంద్ర మోదీ కర్తవ్య పథ్‌కు చేరుకున్నప్పుడు, అక్కడ జరిగిన పరేడ్ మాత్రమే కాకుండా, ఆయన భద్రత కోసం ఉపయోగించిన ప్రత్యేక వాహనం కూడా ప్రజల్లో చర్చనీయాంశమైంది. ప్రధానమంత్రి అధికారిక వాహనం రేంజ్ రోవర్ సెంటినెల్ SUV కేవలం చూడటానికి రాజసంగా ఉండటమే కాకుండా, దాని భద్రత, సాంకేతికత ఈ వాహనాన్ని ప్రపంచంలోని అత్యంత సురక్షితమైన కార్లలో ఒకటిగా నిలబెట్టాయి.

కర్తవ్య పథ్‌పై కట్టుదిట్టమైన భద్రత జనవరి 26, 2026న ప్రధాని మోదీ కర్తవ్య పథ్‌లోకి అత్యంత కట్టుదిట్టమైన భద్రతా వలయం మధ్య ప్రవేశించారు. ఇండియా గేట్ వద్ద ఉన్న భద్రతా ఏర్పాట్లలో ‘రేంజ్ రోవర్ సెంటినెల్’ కీలక పాత్ర పోషించింది. దీనిని ప్రత్యేకంగా వీవీఐపీల భద్రతను దృష్టిలో ఉంచుకుని అన్ని స్థాయిలలో రూపొందించారు.

శక్తివంతమైన ఇంజిన్, పెర్ఫార్మెన్స్

రేంజ్ రోవర్ సెంటినెల్‌లో 5.0 లీటర్ సూపర్ ఛార్జ్డ్ V8 ఇంజిన్ అమర్చబడింది. ఇది 380 హార్స్‌పవర్ శక్తిని ఉత్పత్తి చేస్తుంది. దాదాపు 4.4 టన్నుల కంటే ఎక్కువ బరువు ఉన్నప్పటికీ ఈ SUV కేవలం 10.4 సెకన్లలోనే 0 నుండి 100 కి.మీ వేగాన్ని అందుకుంటుంది. దీని గరిష్ట వేగం గంటకు 193 కి.మీ. ఇది అత్యవసర పరిస్థితుల్లో వేగంగా ప్రయాణించడానికి సహాయపడుతుంది.

అత్యున్నత స్థాయి బుల్లెట్ ప్రూఫ్ రక్షణ

ఈ SUV సాధారణ రేంజ్ రోవర్ ప్రత్యేక ఆర్మర్డ్ (కవచం కలిగిన) వెర్షన్. ఇందులో VR8 స్థాయి బాలిస్టిక్ ప్రొటెక్షన్ ఉంది. ఇది 7.62 మిమీ ఆర్మర్-పియర్సింగ్ బుల్లెట్లను సైతం అడ్డుకోగలదు. అంతేకాకుండా ఈ వాహనం 15 కిలోల TNT పేలుడును, వాహనం పైన లేదా కింద జరిగే గ్రెనేడ్ దాడులను కూడా తట్టుకోగలదు.

Also Read: ప‌సిపిల్ల‌ల‌కు ఆవు పాలు ఎప్పుడు ఇవ్వాలో తెలుసా?!

అత్యవసర పరిస్థితుల కోసం ప్రత్యేక ఏర్పాట్లు

సెంటినెల్ SUVలో బుల్లెట్ ప్రూఫ్ బాడీ మాత్రమే కాకుండా అనేక ఆధునిక సేఫ్టీ ఫీచర్లు ఉన్నాయి. మంటలను ఆర్పే ‘ఫైర్ సప్రెషన్ సిస్టమ్’, పొగ లేదా గ్యాస్ దాడుల నుండి రక్షించడానికి ప్రత్యేక ఆక్సిజన్ సప్లై, అత్యవసర సమయంలో బయటి వ్యక్తులతో కమ్యూనికేట్ చేయడానికి ‘పబ్లిక్ అడ్రస్ సిస్టమ్’ వంటివి ఇందులో ఉన్నాయి.

లగ్జరీ- టెక్నాలజీ కలయిక

భద్రతతో పాటు ఈ SUV లోపల లగ్జరీకి కూడా ప్రాధాన్యత ఇచ్చారు. క్యాబిన్‌లో ల్యాండ్ రోవర్ ‘టచ్ ప్రో డ్యూయో’ ఇన్ఫోటైన్‌మెంట్ సిస్టమ్ ఉంటుంది. ఇందులో రెండు 10-అంగుళాల హై-రిజల్యూషన్ టచ్‌స్క్రీన్లు ఉంటాయి. వీటి ద్వారా నావిగేషన్, మ్యూజిక్, క్లైమేట్ కంట్రోల్‌ను సులభంగా ఆపరేట్ చేయవచ్చు.

ప్రధాని SUV ఎందుకు ప్రత్యేకం?

రేంజ్ రోవర్ సెంటినెల్ కేవలం ఒక కారు మాత్రమే కాదు అది ప్రధానమంత్రి భద్రతకు ఒక బలమైన కవచం. శక్తివంతమైన ఇంజిన్, బుల్లెట్ ప్రూఫ్ టెక్నాలజీ, బ్లాస్ట్ రెసిస్టెన్స్, విలాసవంతమైన ఇంటీరియర్.. ఇవన్నీ కలిసి దీనిని ప్రపంచంలోని అత్యంత సురక్షితమైన, నమ్మదగిన వీవీఐపీ SUVలలో ఒకటిగా మార్చాయి.

Follow us