Kumki Elephant: మే 21న విధానసౌధలో ఏపీకి కుంకి ఏనుగుల హస్తాంతరణ

Kumki Elephant: కర్ణాటక-ఆంధ్రప్రదేశ్ రాష్ట్రాల మధ్య మానవ-ఏనుగు ఘర్షణ సమస్యకు పరిష్కారం కలిగించే ప్రయత్నంలో భాగంగా, కుంకి ఏనుగులను ఆంధ్రప్రదేశ్ ప్రభుత్వానికి మే 21న అధికారికంగా అప్పగించనున్నారు. ఈ కార్యక్రమం బెంగళూరులోని విధానసౌధ మెట్లపై ఘనంగా నిర్వహించబడనుంది.

కర్ణాటక ముఖ్యమంత్రి శ్రీ సిద్ధరామయ్య, ఉప ముఖ్యమంత్రి శ్రీ డీకే శివకుమార్ ఈ కుంకి ఏనుగులను ఆంధ్రప్రదేశ్ ఉప ముఖ్యమంత్రి మరియు అటవీ శాఖ మంత్రి శ్రీ పవన్ కల్యాణ్‌కు అందజేస్తారు. ఈ మేరకు అటవీ, జీవశాస్త్ర మరియు పర్యావరణ శాఖ మంత్రి శ్రీ ఏశ్వర్ బీ ఖాండ్రే ఒక ప్రకటనలో వెల్లడించారు.

2023 ఆగస్టులో బెంగళూరులో నిర్వహించిన అంతర్జాతీయ మానవ-ఏనుగు ఘర్షణ సదస్సులో కర్ణాటక, ఆంధ్రప్రదేశ్, తెలంగాణ, కేరళ రాష్ట్రాలు ఉత్తమ చర్యల మార్పిడి కోసం ఒక అవగాహన ఒప్పందం చేసుకున్నాయి. దానిలో  భాగంగా ఈ ఏనుగుల అప్పగింత జరుగుతోంది.

గత సంవత్సరం ఆగస్టు 8న పవన్ కల్యాణ్ బెంగళూరులోని మంత్రి ఖాండ్రేను కలిసి, ఆంధ్రప్రదేశ్‌లోని వేటగాళ్లను పట్టుకునేందుకు మరియు అటవీ సిబ్బందికి శిక్షణ ఇవ్వడానికి కుంకి ఏనుగులు ఇవ్వాలని విజ్ఞప్తి చేశారు. అనంతరం, సెప్టెంబర్ 27న విజయవాడలో జరిగిన సమావేశంలో రెండు రాష్ట్రాల మధ్య అధికారికంగా ఒప్పందం కుదిరింది. ఈ ఒప్పందాన్ని అమలు చేస్తూ మే 21న ఏనుగుల హస్తాంతరణ జరగనుంది.

సరిహద్దు జిల్లాలకు లాభం

చిత్తూరు సరిహద్దులోని కర్నాటకకు చెందిన కొలార్ జిల్లాలోనూ మానవ-ఏనుగు ఘర్షణలు పెరుగుతున్న నేపథ్యంలో, ఆంధ్రప్రదేశ్‌ చేపట్టనున్న ఏనుగు పట్టే చర్యలు, వేటగాళ్ల నియంత్రణలో కర్నాటకకు కూడా లాభం కలిగే అవకాశం ఉందని మంత్రి ఖాండ్రే తెలిపారు.

దసరా ఏనుగులకు సంబంధం లేదని స్పష్టీకరణ

ఈ సందర్భంగా, దసరా ఉత్సవాల్లో పాల్గొనే ఏనుగులు లేదా ఇప్పటికే దసరా కోసం ఎంపికైన ఏనుగులను ఏపీకి అప్పగించడంలేదని స్పష్టంగా చెప్పారు. కేవలం ప్రత్యేకంగా తరిగించిన కుంకి ఏనుగులనే అందజేస్తున్నామని వెల్లడించారు. ఈ చర్య రెండు రాష్ట్రాల మధ్య సహకారాన్ని పెంపొందించడమే కాకుండా, అటవీ పరిరక్షణ రంగంలో పరస్పర సంబంధాలను మరింత బలపరచగలదని అంచనా.