CM Chandrababu: బీసీలకు ఏపీ ప్రభుత్వం గుడ్ న్యూస్..

Good news from the AP government for BCs...

పునరుత్పాదక ఇంధన వాడకాన్ని ప్రోత్సహించడంతో పాటు పేద, మధ్యతరగతి కుటుంబాలపై విద్యుత్ బిల్లుల భారాన్ని తగ్గించేందుకు ఉద్దేశించిన ‘పీఎం సూర్యఘర్ ముఫ్త్ బిజిలీ యోజన’ (PM Surya Ghar Muft Bijli Yojana) అమలులో ఆంధ్రప్రదేశ్ ప్రభుత్వం కీలక నిర్ణయం తీసుకుంది. ఈ పథకం కింద ఇళ్లపై 2 కిలోవాట్ల (2 kW) సామర్థ్యం గల సోలార్ రూఫ్‌టాప్ ప్యానెళ్లను ఏర్పాటు చేసుకునే లబ్ధిదారులకు కేంద్ర ప్రభుత్వం ఇప్పటికే రూ. 60,000 వరకు భారీ సబ్సిడీని అందిస్తోంది. అయితే, వెనుకబడిన తరగతుల (BC) వర్గాలకు మరింత ఆర్థిక ఊరటనిచ్చేలా.. రాష్ట్ర ప్రభుత్వం తన వంతుగా అదనంగా మరో రూ. 20,000 లబ్ధిని చేకూర్చాలని నిర్ణయించింది. కేంద్ర, రాష్ట్ర ప్రభుత్వాల సబ్సిడీలు రెండు కలిపి బీసీ వర్గాలకు ఇప్పుడు ఏకంగా రూ. 80,000 వరకు మొత్తం రాయితీ లభించనుంది. దీనివల్ల సోలార్ ప్యానెళ్ల ఏర్పాటుకు అయ్యే ప్రాథమిక పెట్టుబడి వ్యయం గణనీయంగా తగ్గనుంది.

రాష్ట్ర ప్రభుత్వ నిబంధనల ప్రకారం, నెలకు 200 యూనిట్ల వరకు విద్యుత్‌ను వినియోగించే బీసీ కుటుంబాలకు మాత్రమే ఈ అదనపు రూ. 20 వేల రాయితీ వర్తించనుంది. తక్కువ విద్యుత్ వాడుతూ ఆర్థికంగా వెనుకబడిన వర్గాలకు ప్రాధాన్యత ఇవ్వాలనే ఉద్దేశంతోనే ఈ పరిమితిని విధించారు. ఏపీ ప్రభుత్వ తాజా నిర్ణయం వల్ల రాష్ట్రవ్యాప్తంగా దాదాపు 27.2 లక్షల మంది బీసీ వినియోగదారులకు నేరుగా ప్రయోజనం చేకూరనుంది. ఇళ్లపై సోలార్ యూనిట్లు ఏర్పాటు కావడం వల్ల ఆయా కుటుంబాలకు ఉచితంగా విద్యుత్ అందడమే కాకుండా, మిగిలిన అదనపు విద్యుత్‌ను గ్రిడ్‌కు సరఫరా చేయడం ద్వారా భవిష్యత్తులో ఆదాయాన్ని పొందే అవకాశం కూడా లభిస్తుంది. ఈ నిర్ణయం రాష్ట్రంలో సౌర విద్యుత్ రంగాన్ని విప్లవాత్మకంగా మార్చడమే కాకుండా బీసీల ఆర్థిక సాధికారతకు దోహదపడనుంది.

Follow us