ఎర్నాకుళం ఎక్స్‌ప్రెస్‌లో అగ్నిప్రమాదం, విజయవాడ వ్యక్తి సజీవ దహనం

Fire Accident Tata–ernakula

• ఎలమంచిలి రైల్వే స్టేషన్ సమీపంలో ఎర్నాకుళం ఎక్స్‌ప్రెస్‌లో మంటలు
• చంద్రశేఖర్ సుందర్ అనే వ్యక్తి మంటల్లో చిక్కుకుని సజీవదహనం
• మంటలు వేగంగా వ్యాపించడంతో రైలును వెంటనే ఎలమంచిలి స్టేషన్‌లో నిలిపివేత

విశాఖపట్నం జిల్లా ఎలమంచిలి రైల్వే స్టేషన్ సమీపంలో అర్ధరాత్రి వేళ ఎర్నాకుళం ఎక్స్‌ప్రెస్‌లో ఘోర అగ్నిప్రమాదం సంభవించింది. రైలు ప్రయాణిస్తున్న సమయంలో అకస్మాత్తుగా B1 ఏసీ బోగీలో మంటలు చెలరేగడంతో ప్రయాణికులంతా తీవ్ర భయాందోళనలకు గురయ్యారు. గాఢ నిద్రలో ఉన్న సమయంలో మంటలు వ్యాపించడంతో ఏం జరుగుతుందో అర్థం కాక ప్రయాణికులు హాహాకారాలు చేస్తూ బయటకు పరుగులు తీశారు. అయితే, దురదృష్టవశాత్తూ ఈ ప్రమాదంలో విజయవాడకు చెందిన చంద్రశేఖర్ సుందర్ అనే వ్యక్తి మంటల్లో చిక్కుకుని సజీవ దహనమయ్యారు. మృతుడిని పోలీసులు ప్రాథమికంగా గుర్తించి, సమాచారాన్ని కుటుంబ సభ్యులకు చేరవేశారు.

 

ప్రమాదం జరిగిన సమయంలో సంబంధిత బోగీలతో పాటు పక్కనే ఉన్న మరో కోచ్‌లో కలిపి మొత్తం 150 మందికి పైగా ప్రయాణికులు ఉన్నట్లు సమాచారం. మంటలు వేగంగా వ్యాపించడంతో రైలును వెంటనే ఎలమంచిలి స్టేషన్‌లో నిలిపివేసి, రైల్వే సిబ్బంది మరియు స్థానిక పోలీసులు సహాయక చర్యలు చేపట్టారు. ప్రయాణికులందరినీ సురక్షితంగా కిందికి దించగలిగినప్పటికీ, దట్టమైన పొగ మరియు మంటల కారణంగా చంద్రశేఖర్ బయటకు రాలేకపోయారని ప్రత్యక్ష సాక్షులు తెలిపారు. అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తెచ్చారు.

ఈ ప్రమాదం కారణంగా ఆ మార్గంలో రైళ్ల రాకపోకలకు తీవ్ర అంతరాయం ఏర్పడింది. రైలు ప్రయాణం నిలిచిపోవడంతో ఇబ్బంది పడుతున్న మిగిలిన 150 మంది ప్రయాణికులను వారి గమ్యస్థానమైన ఎర్నాకుళం చేర్చేందుకు రైల్వే అధికారులు ప్రత్యామ్నాయ ఏర్పాట్లు చేశారు. ప్రత్యేక బస్సుల ద్వారా వారిని పంపించే ప్రక్రియను ప్రారంభించారు. కాగా, ఈ ప్రమాదానికి గల ఖచ్చితమైన కారణాలు ఇంకా తెలియరాలేదు. షార్ట్ సర్క్యూట్ వల్ల మంటలు అంటుకున్నాయా లేదా మరేదైనా కారణం ఉందా అనే కోణంలో రైల్వే భద్రతా విభాగం అధికారులు లోతైన దర్యాప్తు జరుపుతున్నారు.

Follow us