విద్యలో జ్ఞానంతో పాటు విలువలు ముఖ్యం: కలెక్టర్ల సదస్సులో సీఎం చంద్రబాబు

CM Chandrababu Naidu participated in the Collectors' Conference on the second day

. ప్రైవేటు విద్యాసంస్థల్లోనూ ‘ముస్తాబు’ కార్యక్రమాన్ని అమలు
. ఖర్చు పెట్టే ప్రతి పైసాకు చక్కని ఫలితం ఉండాలి
. నూతన ఆలోచనలతో కొత్త ఆవిష్కరణలు చేయొచ్చు

Collectors Conference : విద్యార్థులు కేవలం పుస్తక జ్ఞానంతోనే కాకుండా మంచి విలువలు, నైతికత, సామాజిక బాధ్యతను కూడా అలవర్చుకోవాల్సిన అవసరం ఉందని ముఖ్యమంత్రి నారా చంద్రబాబు నాయుడు స్పష్టం చేశారు. రెండో రోజు నిర్వహించిన కలెక్టర్ల సదస్సులో ఆయన విస్తృతంగా మాట్లాడారు. భవిష్యత్‌ భారతాన్ని నిర్మించేది నేటి విద్యార్థులేనని, అందుకే వారి సమగ్ర అభివృద్ధిపై ప్రభుత్వం ప్రత్యేక దృష్టి పెట్టిందని తెలిపారు. రాష్ట్రంలో అమలవుతున్న ‘ముస్తాబు’ కార్యక్రమాన్ని ఇంటర్మీడియట్‌ వరకు విస్తరించాలని సీఎం సూచించారు. ప్రభుత్వ విద్యాసంస్థలతో పాటు ప్రైవేటు విద్యాసంస్థల్లోనూ ఈ కార్యక్రమాన్ని అమలు చేయాల్సిన అవసరం ఉందని అన్నారు. విద్యా ప్రమాణాలు పెరగాలంటే ప్రభుత్వ, ప్రైవేటు రంగాల మధ్య సమన్వయం చాలా కీలకమని పేర్కొన్నారు.

‘ముస్తాబు’ ద్వారా విద్యార్థుల్లో ఆత్మవిశ్వాసం, క్రమశిక్షణ, సృజనాత్మకత పెరుగుతుందని అభిప్రాయపడ్డారు. ఈ కార్యక్రమాన్ని మరింత సమర్థవంతంగా ముందుకు తీసుకెళ్లేందుకు అధికార యంత్రాంగం కొత్త ఆలోచనలతో పని చేయాలని చంద్రబాబు దిశానిర్దేశం చేశారు. ఒక విధానం విజయవంతమైతే దాన్ని ఇతర జిల్లాలకు విస్తరించడంలో వెనుకాడకూడదన్నారు. విద్యా రంగంలో ప్రయోగాలు చేయడం, అవసరమైన చోట మార్పులు తీసుకురావడం ద్వారానే ఆశించిన ఫలితాలు సాధ్యమవుతాయని తెలిపారు. ‘ముస్తాబు’ కార్యక్రమంపై సమగ్ర ప్రజెంటేషన్ ఇచ్చిన పార్వతీపురం మన్యం జిల్లా కలెక్టర్ ప్రభాకరరెడ్డిని ముఖ్యమంత్రి ప్రత్యేకంగా అభినందించారు. తక్కువ ఖర్చుతో మంచి ఫలితాలు సాధించే విధంగా ఈ కార్యక్రమాన్ని రూపొందించడం అభినందనీయమని అన్నారు. ఇలాంటి సృజనాత్మక ఆలోచనలు అన్ని జిల్లాల్లోనూ రావాలని ఆకాంక్షించారు.

ప్రభుత్వం ఖర్చు చేసే ప్రతి రూపాయికి స్పష్టమైన ప్రయోజనం కనిపించాలన్నదే తన లక్ష్యమని చంద్రబాబు స్పష్టం చేశారు. ప్రజల పన్నుల డబ్బు వృథా కాకుండా, దీర్ఘకాలిక ఫలితాలు ఇచ్చే విధానాలకే ప్రాధాన్యం ఇవ్వాలన్నారు. విద్య, ఆరోగ్యం, ఉపాధి వంటి కీలక రంగాల్లో పెట్టుబడులు పెట్టడం ద్వారా రాష్ట్ర భవిష్యత్తును బలంగా నిర్మించవచ్చని పేర్కొన్నారు. విద్యా వ్యవస్థలో మార్పులు తీసుకురావాలంటే ఉపాధ్యాయులు, తల్లిదండ్రులు, అధికారులు అందరూ కలిసి పనిచేయాలని సీఎం పిలుపునిచ్చారు. విద్యార్థుల్లో విలువలు పెంపొందించడమే లక్ష్యంగా కార్యక్రమాలు రూపొందిస్తే సమాజంలో సానుకూల మార్పు వస్తుందన్నారు. రాబోయే రోజుల్లో ‘ముస్తాబు’ వంటి కార్యక్రమాలు రాష్ట్రవ్యాప్తంగా ఆదర్శంగా నిలవాలని ఆకాంక్షిస్తూ తన ప్రసంగాన్ని ముగించారు.

Follow us