AP Free Gas Cylinders: ఉచిత గ్యాస్ సీలిండర్లపై సీఎం చంద్రబాబు కీలక ప్రకటన..
- Author : Vamsi Chowdary Korata
Date : 25-10-2024 - 1:09 IST
Published By : Hashtagu Telugu Desk
AP Free Gas Cylinders: ఆంధ్రప్రదేశ్ అసెంబ్లీ ఎన్నికల సందర్భంగా టీడీపీ, జనసేన, బీజేపీ కూటమి తమ అధికారంలోకి వస్తే సూపర్ సిక్స్ పథకాలను అమలు చేస్తామంటూ ప్రకటించింది. ప్రస్తుతం అధికారంలోకి వచ్చిన తర్వాత, ఈ పథకాలను ఒక్కొక్కటిగా అమలు చేస్తూ వస్తోంది.
ఈ క్రమంలో, ఎన్నికల సమయంలో ప్రకటించిన ఉచిత సిలిండర్ల పథకాన్ని దీపావళి పండగ నుంచి ప్రారంభించాలని చంద్రబాబు ప్రభుత్వం ఇప్పటికే ప్రకటించింది. దీనిలో భాగంగా, ప్రతీ ఏడాది దీపావళి నుంచి 3 ఉచిత గ్యాస్ సిలిండర్లను ఇవ్వడం ప్రారంభిస్తున్నట్లు సీఎం చంద్రబాబు తెలిపారు. బుధవారం జరిగిన కేబినెట్ భేటీలో మంత్రివర్గం ఈ నిర్ణయంపై సమీక్షించింది.
ఆంధ్రప్రదేశ్లో మహిళల వంట గ్యాస్ సమస్యలను పరిష్కరించడానికి సూపర్ సిక్స్ హామీలలో భాగంగా, ఈనెల 31వ తేదీ నుంచి ఏడాదికి 3 గ్యాస్ సిలిండర్ల పథకాన్ని అమలుకు తేనుందని సీఎం చంద్రబాబు తెలిపారు. ఈ క్రమంలో, ఈ నెల 31కు 3-4 రోజులు ముందే ఈ ఉచిత సిలిండర్ల బుకింగ్స్ ప్రారంభం అవుతాయని ఆయన వెల్లడించారు.
ఈ 3 ఉచిత గ్యాస్ సిలిండర్లను ఎప్పుడు తీసుకోవాలనే విషయాన్ని కూడా చంద్రబాబు స్పష్టం చేశారు. ప్రతీ నాలుగు నెలలకు ఒక సిలిండర్ను ఉచితంగా పొందవచ్చని ఆయన చెప్పారు. గ్యాస్ సిలిండర్ బుక్ చేసుకుని డెలివరీ పొందిన 24 గంటల్లోనే, సబ్సిడీ డబ్బును లబ్దిదారుల ఖాతాల్లో జమ చేయనున్నట్లు ఆయన పేర్కొన్నారు. రాష్ట్రానికి ఉన్న ఆర్థిక ఇబ్బందులు ఉన్నా, ఏడాదికి రూ. 2,684 కోట్లతో ఈ ఉచిత గ్యాస్ సిలిండర్ల పథకాన్ని ప్రారంభిస్తున్నట్లు చంద్రబాబు స్పష్టం చేశారు.
ప్రస్తుతం మాత్రం అక్టోబర్ 31వ తేదీ నుంచి వచ్చే ఏడాది మార్చి చివరి వరకు ఒక సిలిండర్ పొందవచ్చని ముఖ్యమంత్రి చంద్రబాబు పేర్కొన్నారు. ఆ తర్వాత, 2025 ఏప్రిల్ 1వ తేదీ నుంచి జూలై చివరి వరకు మొదటి గ్యాస్ సిలిండర్ అందించబడుతుంది. అలాగే, ఆగస్ట్ 1వ తేదీ నుంచి నవంబర్ చివరి వరకు రెండో సిలిండర్, డిసెంబర్ 1వ తేదీ నుంచి 2026 మార్చి చివరి వరకు మూడో సిలిండర్ ఉచితంగా అందించనున్నారు.
ఈ విధంగా, ప్రతి ఏడాది ఆర్థిక సంవత్సరానికి అనుగుణంగా, 4 నెలలకు ఒక సిలిండర్ చొప్పున మొత్తం 3 ఉచిత సిలిండర్లను పంపిణీ చేయనున్నట్లు ఆంధ్రప్రదేశ్ ప్రభుత్వం తెలిపింది.
Follow us
