WAR: మరోసారి ఉద్రిక్తతలు.. అమెరికా, ఇరాన్ మధ్య కాల్పులు

Donald Trump

Donald Trump అమెరికా, ఇరాన్ మధ్య ఉద్రిక్తతలు మరోసారి తీవ్రస్థాయికి చేరాయి. హర్మూజ్ జలసంధిలో ప్రయాణిస్తున్న తమ మూడు యుద్ధనౌకలపై ఇరాన్ దాడి చేసిందని అమెరికా అధ్యక్షుడు డొనాల్డ్ ట్రంప్ గురువారం సంచలన ఆరోపణలు చేశారు. శాంతి ఒప్పందంపై ఇరాన్ వెంటనే నిర్ణయం తీసుకోకపోతే భవిష్యత్తులో మరింత హింసాత్మకంగా, తీవ్రంగా బదులిస్తామని హెచ్చరించారు.

ఇరాన్‌తో ఫలప్రదమైన చర్చలు జరిగాయని ట్రంప్ ప్రకటించిన 24 గంటల్లోనే ఈ ఘటన చోటుచేసుకోవడం గమనార్హం. హర్మూజ్ జలసంధిలో ఇరాన్ క్షిపణులు, డ్రోన్లు, చిన్న పడవలతో దాడికి ప్రయత్నించిందని, అయితే తమ నౌకలకు ఎలాంటి నష్టం జరగలేదని ట్రంప్ తెలిపారు. అమెరికా బలగాలు జరిపిన ప్రతిదాడిలో ఇరాన్ దళాలు పూర్తిగా ధ్వంసమయ్యాయని ఆయన పేర్కొన్నారు. “ఒప్పందంపై త్వరగా తేల్చకపోతే భవిష్యత్తులో వారిని మరింత తీవ్రంగా దెబ్బతీస్తాం” అని ట్రంప్ హెచ్చరించారు.

అయితే, ఈ దాడిని “మృదు స్పర్శ (లవ్ ట్యాప్)” అని అభివర్ణించడం గందరగోళానికి దారితీసింది. ఇరాన్‌తో కాల్పుల విరమణ ఇప్పటికీ అమల్లో ఉందని ఆయన చెప్పడం గమనార్హం.

మరోవైపు, అమెరికా ఆరోపణలను ఇరాన్ ఖండించింది. అమెరికానే కాల్పుల విరమణను ఉల్లంఘించి తమ నూనె ట్యాంకర్ సహా రెండు నౌకలపై దాడి చేసిందని ఇరాన్ ఆరోపించింది. దానికి ప్రతిస్పందనగానే తాము అమెరికా నౌకలను లక్ష్యంగా చేసుకున్నామని ఇరాన్ రివల్యూషనరీ గార్డ్స్ తెలిపారు. ఈ పరిణామాల నేపథ్యంలో టెహ్రాన్, బందర్ అబ్బాస్ వంటి నగరాల్లో పేలుళ్ల శబ్దాలు వినిపించినట్లు స్థానిక మీడియా పేర్కొంది. దీంతో ఇరు దేశాల మధ్య నెలకొన్న తాత్కాలిక ప్రశాంతతకు తెరపడి, యుద్ధ వాతావరణం నెలకొంది.

Follow us