Tariff: 25 శాతం టారిఫ్.. భారత ప్రభుత్వం తొలి స్పంద‌న ఇదే!
అమెరికా అధ్యక్షుడు డొనాల్డ్ ట్రంప్ తన 'ట్రూత్ సోషల్' ప్లాట్‌ఫామ్‌లో భారత్‌పై 25 శాతం టారిఫ్ విధించనున్నట్లు ప్రకటించారు.
- By Gopichand Published Date - 10:08 PM, Wed - 30 July 25
Tariff: అమెరికా అధ్యక్షుడు డొనాల్డ్ ట్రంప్ భారత్‌పై 25 శాతం టారిఫ్‌ను (Tariff) విధించనున్నట్లు ఏకపక్షంగా ప్రకటించిన నేపథ్యంలో భారత ప్రభుత్వం దీనిపై తొలిసారి స్పందించింది. ట్రంప్ ప్రకటనను లోతుగా అధ్యయనం చేస్తున్నామని, దేశ ప్రయోజనాలను కాపాడేందుకు అన్ని చర్యలు తీసుకుంటామని భారత్ స్పష్టం చేసింది.
భారత్ స్పందనలోని ముఖ్యాంశాలు
అధ్యయనం: ట్రంప్ చేసిన ప్రకటనను భారత ప్రభుత్వం జాగ్రత్తగా పరిశీలిస్తోంది. దేశానికి సంబంధించిన అంశాలపై ఎలాంటి ప్రతికూల ప్రభావం పడకుండా ఉండేందుకు తీసుకోవాల్సిన చర్యలను విశ్లేషిస్తోంది.
జాతీయ ప్రయోజనాల రక్షణ: దేశంలోని రైతులు, వ్యాపారవేత్తలు, ఎంఎస్ఎంఈ (MSME) సంస్థల ప్రయోజనాలను కాపాడటమే తమ అత్యంత ముఖ్యమైన బాధ్యత అని ప్రభుత్వం పేర్కొంది. ఈ లక్ష్యాన్ని సాధించేందుకు అవసరమైన అన్ని చర్యలు తీసుకుంటామని హామీ ఇచ్చింది.
ద్వైపాక్షిక వాణిజ్య ఒప్పందం: భారత్ గత కొన్ని నెలలుగా అమెరికాతో న్యాయమైన, ఉభయ ప్రయోజనకరమైన వాణిజ్య ఒప్పందం కోసం చర్చలు జరుపుతోంది. ఈ ప్రక్రియకు భారత్ కట్టుబడి ఉందని, సానుకూల సంభాషణ ద్వారా సమస్యలను పరిష్కరించడానికి కృషి చేస్తోందని తెలిపింది.
ఒత్తిడికి లొంగేది లేదు: ఏ రకమైన ఒత్తిడికి లొంగే ప్రసక్తే లేదని భారత్ మరోసారి స్పష్టం చేసింది. దేశ ప్రయోజనాల విషయంలో కచ్చితమైన వైఖరితో ఉంటుందని తెలిపింది.
ట్రంప్ ప్రకటన నేపథ్యం
అమెరికా అధ్యక్షుడు డొనాల్డ్ ట్రంప్ తన ‘ట్రూత్ సోషల్’ ప్లాట్‌ఫామ్‌లో భారత్‌పై 25 శాతం టారిఫ్ విధించనున్నట్లు ప్రకటించారు. భారత్ ప్రపంచంలోనే అత్యధిక టారిఫ్‌లు వసూలు చేస్తోందని, అందుకే ఆగస్టు 1 నుంచి 25 శాతం టారిఫ్, జరిమానా చెల్లించాలని ట్రంప్ పేర్కొన్నారు. ఈ ప్రకటన ఇరు దేశాల మధ్య వాణిజ్య సంబంధాలపై ఎలాంటి ప్రభావం చూపుతుందో చూడాలి.
Also Read: APPSC: ఏపీ ప్రభుత్వం కీల‌క నిర్ణ‌యం.. ఇకపై ప్రతి ఉద్యోగానికి ప్రిలిమ్స్, మెయిన్స్ అవ‌స‌రం లేదు!
