Trump Tariffs : అంతలేదు.. ఇండియా టారిఫ్స్ చెల్లిస్తుంది – ట్రంప్ స్పష్టం

US Tariffs

Trump Tariffs : అమెరికా సుప్రీంకోర్టు టారిఫ్స్‌కు వ్యతిరేకంగా తీర్పు ఇచ్చినప్పటికీ, భారత్‌తో కుదుర్చుకున్న వాణిజ్య ఒప్పందంపై దాని ప్రభావం ఉండదని డొనాల్డ్ ట్రంప్ కుండబద్దలు కొట్టారు. తన తాజా ప్రెస్ మీట్‌లో ఆయన భారత్‌తో జరిగిన డీల్ గురించి ప్రస్తావిస్తూ, భారత ప్రభుత్వం అమెరికాకు సుంకాలు చెల్లించడానికి అంగీకరించిందని పునరుద్ఘాటించారు. ఈ ఒప్పందంలో ఎలాంటి మార్పులు ఉండబోవని, అమెరికా ఖజానాకు భారత్ నుండి రావాల్సిన నిధులు వస్తాయని ఆయన ధీమా వ్యక్తం చేశారు. గతంలో అమెరికా ఉత్పత్తులపై భారత్ భారీగా పన్నులు విధించేదని, ఇప్పుడు ఆ పరిస్థితి మారిందని ఆయన చెప్పుకొచ్చారు.

భారత ప్రధాని నరేంద్ర మోదీ గురించి ట్రంప్ ఆసక్తికర వ్యాఖ్యలు చేశారు. “మోదీ ఒక గొప్ప జెంటిల్మన్ మరియు తన ప్రత్యర్థుల కంటే చాలా తెలివైన వ్యక్తి” అని ప్రశంసిస్తూనే, వాణిజ్యపరంగా ఆయన అమెరికాను ఇన్నాళ్లూ “మోసం” చేస్తూ వచ్చారని ఘాటుగా విమర్శించారు. మోదీ తన దేశ ప్రయోజనాల కోసం చాలా చాకచక్యంగా వ్యవహరిస్తారని, అందుకే తాను చర్చలు జరిపి కఠినమైన ఒప్పందాన్ని కుదుర్చుకున్నానని ట్రంప్ వివరించారు. ఈ ఒప్పందం ప్రకారం, అమెరికా వస్తువులకు భారత్ పన్ను మినహాయింపులు ఇవ్వడమే కాకుండా, కొన్ని సందర్భాల్లో అమెరికాకు టారిఫ్లు చెల్లించాల్సి ఉంటుందని ఆయన పేర్కొన్నారు.

అయితే ఈ వాణిజ్య ఒప్పందం పూర్తిగా అమెరికాకు అనుకూలంగా ఉందనే సంకేతాలను ట్రంప్ ఇచ్చారు. “ఇండియా మనకు టారిఫ్లు చెల్లిస్తుంది, కానీ మనం ఇండియాకు చెల్లించము” అని ఆయన వ్యాఖ్యానించడం గమనార్హం. ఇది ‘వన్ వే ట్రాఫిక్’ లాంటి ఒప్పందమని ఆయన అభివర్ణించారు. సుప్రీంకోర్టు అడ్డుకట్ట వేయాలని చూసినా, ఇతర దేశాలతో తాను చేసుకున్న ద్వైపాక్షిక ఒప్పందాల ద్వారా అమెరికా ఆర్థిక ప్రయోజనాలను కాపాడతానని ట్రంప్ భరోసా ఇచ్చారు. ఈ పరిణామాలు భారత్-అమెరికా మధ్య భవిష్యత్తు వాణిజ్య సంబంధాలు ఎంత కఠినంగా ఉండబోతున్నాయో సూచిస్తున్నాయి.

Follow us