CM Revanth Reddy : సీఎం రేవంత్ రెడ్డి బెంగళూరు పర్యటన రద్దు

CM Revanth

CM Revanth Reddy : భారత్-పాకిస్థాన్ మధ్య నెలకొన్న తాజా ఉద్రిక్తతల నేపథ్యంలో ముఖ్యమంత్రి బెంగళూరు పర్యటనను రద్దు చేసుకున్నారు. బెంగళూరులో నిర్వహించాల్సిన ఓ కీలక కాన్క్లేవ్‌ కార్యక్రమానికి ముఖ్యమంత్రి హాజరుకావాల్సి ఉండగా, ఆ కార్యక్రమానికి హాజరుకావడాన్ని తాత్కాలికంగా విరమించుకున్నారు. పెరుగుతున్న భద్రతా ఆందోళనల దృష్ట్యా ఈ నిర్ణయం తీసుకున్నట్లు ప్రభుత్వ వర్గాలు పేర్కొన్నాయి. దేశ రాజధాని ఢిల్లీతో పాటు ఇతర కీలక నగరాల్లోనూ భద్రతా చర్యలు ముమ్మరం చేయడం, విమాన ప్రయాణాలపైనా ప్రభావం చూపుతుండటం గమనార్హం. ఇటీవల కేంద్ర పౌర విమానయాన మంత్రిత్వ శాఖ కీలక ఆదేశాలు విడుదల చేసింది. దేశంలోని అన్ని విమానాశ్రయాల్లో భద్రతను బలోపేతం చేయాలని సూచిస్తూ, బ్యూరో ఆఫ్ సివిల్ ఏవియేషన్ సెక్యూరిటీ (BCAS) అధికారులను అలర్ట్ చేసింది. ప్రయాణికుల భద్రత కోసం సెకండరీ లాడర్ పాయింట్ చెక్ తప్పనిసరిగా నిర్వహించాలని స్పష్టం చేసింది. అంతేకాకుండా, విమానాశ్రయ టెర్మినల్ భవనాల్లోకి సందర్శకులను అనుమతించరాదని కఠిన ఆదేశాలు జారీ చేసింది.

Read Also: India – Pakistan War : భారత్ దెబ్బకు అడుక్కోవాల్సిన పరిస్థితికి వచ్చిన పాకిస్థాన్

ప్రయాణికుల సౌకర్యార్థం చెక్-ఇన్, బోర్డింగ్ ప్రక్రియలు సజావుగా కొనసాగేలా అవసరమైన ఏర్పాట్లు చేయాలని అన్ని ఎయిర్‌లైన్లకు, విమానాశ్రయ అధికారులకు ఆదేశాలు జారీ అయ్యాయి. షెడ్యూల్ చేయబడిన విమానాలు బయలుదేరే సమయానికి కనీసం మూడు గంటల ముందు ప్రయాణికులు ఎయిర్‌పోర్ట్‌కు చేరుకోవాలని సూచించారు. అంతేకాక, ప్రయాణికుల చెక్-ఇన్ ప్రక్రియ విమానం బయలుదేరే 75 నిమిషాల ముందుగానే ముగించాల్సిందిగా స్పష్టం చేశారు. ఈ పరిణామాల నేపథ్యంలో ప్రయాణికులు ముందస్తుగా తమ యాత్ర ప్రణాళికలు రూపొందించుకోవాలని అధికారులు సూచిస్తున్నారు. ముఖ్యంగా అంతర్జాతీయ ప్రయాణికుల సంఖ్య పెరిగే వేసవి కాలంలో ఈ మార్పులు ప్రయాణాలపై ప్రభావం చూపే అవకాశముంది. భద్రతే ప్రధానం అనే దృష్టితో తీసుకున్న ఈ చర్యలు దేశవ్యాప్తంగా ప్రయాణ అనుభవాన్ని మరింత సురక్షితంగా మలచనున్నాయి.

Read Also: Delhi High Alert : దేశ రాజధాని ఢిల్లీలో హై అలర్ట్‌..ప్రభుత్వ ఉద్యోగుల సెలవులు రద్దు

Follow us