NIMS : నిమ్స్ వైద్యుల అరుదైన ఘనత.. వృద్ధుడికి ఛాతీపై కోత లేకుండా పేస్‌మేకర్

Nims

NIMS : హైదరాబాద్ వైద్యరంగంలో మరో మైలురాయి నమోదు అయింది. నగరంలోని నందమూరి తారక రామారావు ఇన్స్టిట్యూట్ ఆఫ్ మెడికల్ సైన్సెస్ (నిమ్స్) వైద్యులు అరుదైన వైద్య ఘనతను సాధించారు. గుండె వేగం గణనీయంగా పడిపోయి ప్రాణాపాయం ఎదుర్కొంటున్న ఓ వృద్ధుడికి ఎలాంటి శస్త్రచికిత్సా కోత లేకుండా, అత్యాధునిక “లెడ్‌లెస్ పేస్‌మేకర్” విజయవంతంగా అమర్చారు. ‘బుల్లెట్ పేస్‌మేకర్’గా పిలవబడే ఈ సరికొత్త పరికరాన్ని ఉపయోగించి చేసిన చికిత్స తెలంగాణ ప్రభుత్వ ఆసుపత్రుల్లో ఇదే తొలిసారి జరగడం విశేషం. నాంపల్లి ప్రాంతానికి చెందిన 77 ఏళ్ల సుందరరావు కొంతకాలంగా గుండె బ్లాక్ కారణంగా ఇబ్బందులు ఎదుర్కొంటున్నారు. సాధారణ పరిస్థితుల్లో గుండె నిమిషానికి సుమారు 60 సార్లు కొట్టుకోవాలి. అయితే ఆయన గుండె వేగం కేవలం 40 సార్లకే పరిమితమైంది. గుండె స్పందనలు తగ్గిపోవడంతో తరచూ తల తిరగడం, కళ్లు తిరిగి పడిపోవడం వంటి సమస్యలు రావడంతో కుటుంబ సభ్యులు ఆయనను నిమ్స్ ఆసుపత్రిలో చేర్పించారు.

Amaravati : రూ.904 కోట్లతో అమరావతిలో మౌలిక వసతులు

వైద్య పరీక్షల్లో గుండె స్పందన తీవ్రంగా తగ్గిపోవడంతో కార్డియాలజీ విభాగం వైద్యులు పేస్‌మేకర్ అమర్చాల్సిన అవసరముందని తేల్చారు. కానీ సాధారణంగా ఛాతీపై కోత పెట్టి పరికరం అమర్చే సంప్రదాయ పద్ధతికి సుందరరావు భయపడి అంగీకరించలేదు. దీంతో వైద్యులు కొత్త టెక్నాలజీ వైపు దృష్టి సారించారు. ఈ సరికొత్త పరికరాన్ని రోగి తొడలోని సిర ద్వారా నేరుగా గుండె కవాటానికి పంపి అమర్చడం ప్రత్యేకత. బుల్లెట్ ఆకారంలో ఉండే ఈ పరికరం గుండె కండరానికి రెండు చిన్న పిన్‌ల సహాయంతో అతుక్కుపోతుంది. దీంట్లో బయట కనపడే వైర్లు లేవు, ప్రత్యేక బ్యాటరీ కూడా ఉండదు. దీంతో ఇన్‌ఫెక్షన్ల ప్రమాదం చాలా తక్కువగా ఉంటుందని, రోగి త్వరగా కోలుకుంటారని వైద్య బృందంలోని డాక్టర్ ఉమాదేవి కరూరు వివరించారు.

సాధారణంగా ప్రైవేటు ఆసుపత్రులలో ఈ విధమైన చికిత్సకు రూ. 15 లక్షల నుంచి రూ. 20 లక్షల వరకు ఖర్చవుతుంది. కానీ నిమ్స్‌లో మాత్రం పరికర ఖరీదు రూ. 8 లక్షలు, అదనపు ఛార్జీలు రూ. 6 వేల రూపాయలతోనే ఈ ఆధునిక ప్రక్రియను పూర్తి చేశారు. సాధారణ ప్రజలకు కూడా అందుబాటులో ఉండేలా ఇంత తక్కువ ఖర్చుతో సేవలు అందించడం వైద్యరంగంలో ఒక ముఖ్యమైన పరిణామమని నిపుణులు అభిప్రాయపడుతున్నారు.

కార్డియాలజీ విభాగాధిపతి డాక్టర్ ఎన్. రామకుమారి ఆధ్వర్యంలో డాక్టర్లు న్యూషా, ఉమాదేవి, సదానంద్, మెహరున్నిసా సయ్యద్‌లతో కూడిన బృందం ఈ అరుదైన ప్రొసీజర్‌ను విజయవంతంగా పూర్తి చేసింది. ఈ వైద్య ఘనతపై నిమ్స్ డైరెక్టర్ నగరి బీరప్ప ప్రత్యేకంగా అభినందనలు తెలిపారు. ఛాతీపై కోత లేకుండా అత్యాధునిక పేస్‌మేకర్ అమర్చడం వైద్యరంగానికి కొత్త దిశ చూపిందని నిపుణులు అంటున్నారు. దీని ద్వారా రోగులు మరింత సురక్షితంగా, తక్కువ సమయంలోనే ఆరోగ్యవంతులవుతారని వారు విశ్లేషిస్తున్నారు. నిమ్స్ వైద్యుల ఈ విజయవంతమైన ప్రయత్నం దేశవ్యాప్తంగా ఇతర ప్రభుత్వ ఆసుపత్రులకు కూడా ప్రేరణగా నిలిచే అవకాశం ఉందని భావిస్తున్నారు.

Amaravati : రూ.904 కోట్లతో అమరావతిలో మౌలిక వసతులు

Follow us