TG TET-2026: టీజీ టెట్-2026 అభ్యర్థులకు గుడ్‌న్యూస్.. నేటి నుండి..!
T-SAT సీఈవో బోదనపల్లి వేణుగోపాల్ రెడ్డి ఈ సందర్భంగా మాట్లాడుతూ... ముఖ్యమంత్రి రేవంత్ రెడ్డి విద్యాశాఖకు మెరుగైన వసతులు కల్పిస్తూ, 11 వేలకు పైగా ఉపాధ్యాయ నియామకాలను రికార్డు కాలంలో పూర్తి చేశారని గుర్తుచేశారు.
- By Gopichand Published Date - 05:02 PM, Tue - 18 November 25
TG TET-2026: తెలంగాణ రాష్ట్రంలో ఉపాధ్యాయ అర్హత పరీక్ష (TG TET-2026)కు సిద్ధమవుతున్న అభ్యర్థులకు రాష్ట్ర ఐటీ శాఖ మంత్రి దుద్దిళ్ల శ్రీధర్ బాబు శుభవార్త అందించారు. డాక్టర్ బి.ఆర్. అంబేడ్కర్ సచివాలయంలో మంత్రి శ్రీధర్ బాబు ఈరోజు (నవంబర్ 18) T-SAT నెట్‌వర్క్ ద్వారా ప్రసారం చేయనున్న ‘టీజీ టెట్-2026 డిజిటల్ కోచింగ్’ పోస్టర్‌ను ఆవిష్కరించారు.
మంత్రి శ్రీధర్ బాబు అభినందనలు
పోస్టర్ ఆవిష్కరణ సందర్భంగా మంత్రి శ్రీధర్ బాబు మాట్లాడుతూ.. పోటీ పరీక్షలకు సిద్ధమయ్యే అభ్యర్థులకు నాణ్యమైన కంటెంట్ అందిస్తున్న T-SAT నెట్‌వర్క్‌ను అభినందించారు. ఉపాధ్యాయ ఉద్యోగ పరీక్ష అయిన డీఎస్సీ (DSC)కి టెట్ (TET) అర్హత తప్పనిసరి అయినందున, అభ్యర్థులందరూ T-SAT అందించే డిజిటల్ కంటెంట్ ద్వారా చక్కగా సంసిద్ధులు కావాలని సూచించారు. తెలంగాణ ప్రజా ప్రభుత్వం ప్రతి ఏటా రెండు సీజన్లలో ఉపాధ్యాయ అర్హత పరీక్షలు నిర్వహిస్తోందని, నిత్యం అందుబాటులో ఉండే T-SAT కంటెంట్ అన్ని స్థాయిల్లోని అభ్యర్థులకు ఎంతగానో ఉపయోగపడుతుందని మంత్రి గుర్తుచేశారు.
Also Read: Andre Russell: ఐపీఎల్‌లో ఆండ్రీ రసెల్ కోసం రెండు జ‌ట్ల మ‌ధ్య పోటీ?!
44 రోజుల్లో 200 ఎపిసోడ్‌ల డిజిటల్ కోచింగ్
T-SAT సీఈవో బోదనపల్లి వేణుగోపాల్ రెడ్డి ఈ సందర్భంగా మాట్లాడుతూ… ముఖ్యమంత్రి రేవంత్ రెడ్డి విద్యాశాఖకు మెరుగైన వసతులు కల్పిస్తూ, 11 వేలకు పైగా ఉపాధ్యాయ నియామకాలను రికార్డు కాలంలో పూర్తి చేశారని గుర్తుచేశారు. జనవరి 2026లో నిర్వహించనున్న టెట్ పరీక్ష కోసం T-SAT నెట్‌వర్క్ ప్రత్యేక డిజిటల్ కంటెంట్‌ను అందిస్తోందని సీఈవో తెలిపారు. ప్రసార వివరాలు ఇలా ఉన్నాయి.
ప్రత్యేక లైవ్ ఓరియంటేషన్: నవంబర్ 18 (మంగళవారం), 19 (బుధవారం) తేదీలలో రెండు రోజుల పాటు లైవ్ ఓరియంటేషన్ ఉంటుంది.
డిజిటల్ కంటెంట్ ప్రసారాలు: తదుపరి 44 రోజుల పాటు 200 ఎపిసోడ్‌లు ప్రసారం చేయబడతాయి.
ప్రసార సమయాలు (ప్రతి రోజు 4 గంట లు)
ఉదయం: విద్య ఛానల్‌లో ఉదయం 5 గంటల నుండి 7 గంటల వరకు.
సాయంత్రం: నిపుణ ఛానల్‌లో సాయంత్రం 5 గంటల నుండి 7 గంటల వరకు.
ప్రత్యేక కంటెంట్ వివరాలు
టెట్ పేపర్-1, పేపర్-2 పరీక్షలకు అవసరమైన ముఖ్యమైన సబ్జెక్టులైన చైల్డ్ డెవలప్‌మెంట్ అండ్ సైకాలజీ, ఫిజికల్ అండ్ బయాలాజికల్ సైన్స్, మ్యాథ్స్, సోషల్ స్టడీస్, ఇంగ్లీష్, తెలుగుతో సహా ఇతర సబ్జెక్టులకు సంబంధించిన డిజిటల్ లెసన్స్ ప్రసారం కానున్నాయి. T-SAT నెట్‌వర్క్ ప్రసారం చేసే ఈ ప్రత్యేక కంటెంట్ ఉపగ్రహ ఛానళ్లతో పాటు T-SAT యాప్, యూట్యూబ్‌లో కూడా అభ్యర్థులకు అందుబాటులో ఉంటుందని సీఈవో వేణుగోపాల్ రెడ్డి తెలిపారు. టెట్ పరీక్షకు హాజరయ్యే అభ్యర్థులు ఈ అవకాశాన్ని సద్వినియోగం చేసుకోవాలని ఆయన కోరారు. ఈ పోస్టర్ ఆవిష్కరణ కార్యక్రమంలో T-SAT ఎగ్జిక్యూటివ్ డైరెక్టర్ సాధిక్ పాల్గొన్నారు.
