అసెంబ్లీ నుంచి వెళ్లిపోయిన కేసీఆర్

Kcr Telangana Assembly

• తెలంగాణ అసెంబ్లీ శీతాకాల సమావేశాలు ప్రారంభం
• సమావేశాలకు హాజరైన కేసీఆర్
• కేసీఆర్ ను పలకరించిన సీఎం రేవంత్

తెలంగాణ అసెంబ్లీ శీతాకాల సమావేశాలు సోమవారం ఆసక్తికరమైన పరిణామాల మధ్య ప్రారంభమయ్యాయి. చాలా కాలం తర్వాత అసెంబ్లీకి విచ్చేసిన బీఆర్ఎస్ అధినేత, ప్రతిపక్ష నేత కల్వకుంట్ల చంద్రశేఖర్ రావు (కేసీఆర్) నేరుగా సభ్యుల అటెండెన్స్ రిజిస్టర్‌లో సంతకం చేసి సభలోకి ప్రవేశించారు. సభ ప్రారంభమైన తర్వాత జాతీయ గీతాలాపన ముగియగానే, ఆయన నందినగర్‌లోని తన నివాసానికి బయలుదేరి వెళ్లారు. అయితే, ఆయన సభలో ఉన్న కొద్ది సమయంలోనే ముఖ్యమంత్రి రేవంత్ రెడ్డి స్వయంగా కేసీఆర్ వద్దకు వెళ్లి షేక్ హ్యాండ్ ఇచ్చి పలకరించడం విశేషం. కేసీఆర్ ఆరోగ్య పరిస్థితిపై ఆరా తీసిన సీఎం, ఆయనతో కొద్దిసేపు ఆత్మీయంగా మాట్లాడారు. ఈ సందర్భంగా పలువురు మంత్రులు, అధికార, ప్రతిపక్ష ఎమ్మెల్యేలు కూడా కేసీఆర్‌ను కలిసి కుశల ప్రశ్నలు వేశారు.

Tg Assembly

అసెంబ్లీ సమావేశాల అజెండా విషయానికి వస్తే.. తొలిరోజు సభలో దివంగత మాజీ సభ్యులకు సంతాపం ప్రకటించనున్నారు. అనంతరం ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్కతో పాటు ఇతర మంత్రులు పలు కీలక బిల్లులను సభలో ప్రవేశపెట్టనున్నారు. సభ ఎన్ని రోజులు నిర్వహించాలనే అంశంపై బిజినెస్ అడ్వైజరీ కమిటీ (BAC) సమావేశమై తుది నిర్ణయం తీసుకోనుంది. ప్రభుత్వం ఇప్పటికే షెడ్యూల్ ప్రకారం జనవరి 2వ తేదీన కృష్ణా నదీ జలాలపై, జనవరి 3వ తేదీన గోదావరి బేసిన్ జలాలపై ప్రత్యేక చర్చకు సిద్ధమైంది. రాష్ట్ర ప్రయోజనాలకు సంబంధించి ఈ రెండు అంశాలపై సుదీర్ఘ చర్చ జరగనుందని అధికార వర్గాలు వెల్లడించాయి.

మరోవైపు, అసెంబ్లీ సమావేశాల నిర్వహణపై అధికార, ప్రతిపక్షాల మధ్య భిన్నాభిప్రాయాలు వ్యక్తమవుతున్నాయి. ప్రజా సమస్యలపై సమగ్రంగా చర్చించేందుకు కనీసం 15 రోజుల పాటు సమావేశాలు నిర్వహించాలని బీఆర్ఎస్ గట్టిగా పట్టుబడుతోంది. రైతు రుణమాఫీ, ధాన్యం కొనుగోళ్లు, ఇతర సంక్షేమ పథకాల అమలుపై ప్రభుత్వాన్ని నిలదీసేందుకు ప్రతిపక్షం సిద్ధమవుతుండగా, ప్రభుత్వం కూడా డేటా మరియు లెక్కలతో సమాధానం చెప్పేందుకు సమాయత్తమైంది. సభ సాఫీగా సాగేలా చూడాలని స్పీకర్ గడ్డం ప్రసాద్ కుమార్ ఇప్పటికే సభ్యులకు విజ్ఞప్తి చేశారు. రాబోయే రెండు వారాల పాటు సాగనున్న ఈ సమావేశాలు తెలంగాణ రాజకీయాల్లో కీలకంగా మారనున్నాయి.

Follow us