Telangana : కాళేశ్వరం అవకతవకలపై ఘోష్ కమిషన్ నివేదికకు స్టే లేదన్న హైకోర్టు

Telangana : కాళేశ్వరం ప్రాజెక్టు నిర్మాణంలో జరిగిన అవకతవకలపై న్యాయమూర్తి పీసీ ఘోష్ నేతృత్వంలో ఏర్పాటైన కమిషన్ రూపొందించిన నివేదికపై స్టే ఇవ్వాలని కోరుతూ దాఖలైన పిటిషన్‌ను తెలంగాణ హైకోర్టు బుధవారం తిరస్కరించింది. ఈ నివేదికపై తక్షణంగా స్టే ఇవ్వలేమని స్పష్టంగా పేర్కొంది. ఈ కేసులో పిటిషనర్‌గా వ్యవహరించిన రిటైర్డ్ ఐఏఎస్ అధికారి, నీటిపారుదల శాఖ మాజీ ముఖ్య కార్యదర్శి ఎస్కే జోషి గతంలో బీఆర్ఎస్ ప్రభుత్వం హయాంలో కాళేశ్వరం ప్రాజెక్టుతో సంబంధం కలిగిన కీలక పదవుల్లో ఉన్నారు. ఆయన తన పిటిషన్‌లో కమిషన్ తుది నివేదిక తన వ్యక్తిగత హక్కులకు భంగం కలిగించేలా ఉందని ఆరోపించారు. విచారణ సమయంలో కమిషన్ తనను కేవలం ఒక సాక్షిగా మాత్రమే పిలిచి, తుది నివేదికలో మాత్రం ఆరోపణలు చేయడం సరికాదని చెప్పారు.

Read Also: Kavitha Press Meet : హరీష్ రావు …రేవంత్ కాళ్లు పట్టుకొని సరెండర్ అయ్యారు – కవిత

ఈ పిటిషన్‌పై అత్యవసర విచారణ చేపట్టాల్సిందిగా జోషి అభ్యర్థించగా, తెలంగాణ హైకోర్టు ప్రధాన న్యాయమూర్తి జస్టిస్ ఏకే సింగ్, జస్టిస్ మొహియుద్దీన్‌లతో కూడిన ధర్మాసనం విచారణ చేపట్టింది. వాదనలు విన్న తర్వాత, నివేదికపై తక్షణ స్టే ఇవ్వాల్సిన అవసరం లేదని ధర్మాసనం అభిప్రాయపడింది. అంతేకాకుండా, ఈ వ్యవహారంపై పూర్తి వివరాలతో అఫిడవిట్‌ను దాఖలు చేయాలని ఎస్కే జోషికి ఆదేశించింది. తదుపరి విచారణను సెప్టెంబరు 11న జరపాలని నిర్ణయించింది. విచారణలో న్యాయస్థానం కీలకంగా “మీకు ఈ నివేదిక ఎలా లభించింది?” అని పిటిషనర్‌ను ప్రశ్నించింది. సాధారణంగా గోప్యంగా ఉండాల్సిన నివేదిక మీడియా గదిలో ఎందుకు ప్రస్తావించబడిందన్న కోణాన్ని కూడా పరిగణలోకి తీసుకుంది.

జోషి తన పిటిషన్‌లో పేర్కొన్న ప్రకారం, కమిషన్ తుది నివేదిక తయారు చేసే ముందు తనకు నోటీసు ఇవ్వలేదని, తన వాదనను వినే అవకాశం కల్పించకుండా క్రాస్ ఎగ్జామినేషన్ లేకుండానే తుది అభిప్రాయాలను నివేదికలో పొందుపరచడం సహజ న్యాయ సూత్రాలకు విరుద్ధమని పేర్కొన్నారు. దీంతో, ప్రభుత్వం ఈ నివేదిక ఆధారంగా తనపై ఎటువంటి చర్యలు తీసుకోకుండా హైకోర్టు తాత్కాలిక ఉత్తర్వులు ఇవ్వాలని కోరారు. ఇక, ఈ నివేదికలోని అంశాలను జులై 31న మీడియా సమావేశంలో ప్రభుత్వం ప్రకటించిందని జోషి అభిప్రాయపడ్డారు. ఈ ప్రకటన తన వ్యక్తిగత ప్రతిష్ఠను దెబ్బతీసిందని, తనపై అనవసరంగా తీవ్ర విమర్శలు వెల్లువెత్తేలా చేసినట్టు తెలిపారు. కమిషన్ నివేదిక గోప్యంగా ఉండాల్సిన సమయంలోనే దాని సమాచారం బహిర్గతమైందని, ఇది అధికార పరమైన విచారణల నైతిక విలువలను కించపరిచేలా ఉందన్న అభిప్రాయాలు పలువురు న్యాయవాదుల నుంచి వ్యక్తమయ్యాయి. మరి, ఈ అంశంపై హైకోర్టు తుది తీర్పు ఎలా ఉండనుందన్నది సెప్టెంబర్ 11న జరగనున్న తదుపరి విచారణలో వెల్లడవుతుంది.

Read Also: Kavitha : కవిత సంచలన వ్యాఖ్యలు..నాపై దుష్ప్రచారం, బీసీల కోసం పోరాడినందుకే సస్పెండ్..!