Telangana: సూడాన్‌ నుంచి భారత్ చేరుకున్న 14 మంది తెలంగాణ వాసులు

అల్లర్లతో అట్టుడుకుతున్న సూడాన్‌ (Sudan)లో చిక్కుకుపోయిన తెలంగాణ (Telangana)రాష్ట్రానికి చెందిన 14 మంది వ్యక్తులు జెడ్డా మీదుగా విమానంలో గురువారం ముంబై చేరుకున్నారు. తెలంగాణ ప్రభుత్వం కోసం తరలింపు కార్యకలాపాలను సమన్వయం చేసే బృందంలో భాగమైన వరంగల్ మాజీ కలెక్టర్ బి. గోపి ప్రకారం.. ముంబై చేరుకున్న మొత్తం 14 మంది హైదరాబాద్‌కు చెందినవారు.

వారు గురువారం సాయంత్రం ముంబై విమానాశ్రయానికి చేరుకున్నారు. రాత్రికి ముంబైలో రాష్ట్ర ప్రభుత్వం వారికి వసతి, ఆహారాన్ని అందించింది. శుక్రవారం వారు హైదరాబాద్‌కు చేరుకుంటారు. వీరిలో ఐదుగురు శుక్రవారం ఉదయం విమానంలో హైదరాబాద్‌కు వస్తారని, మిగిలిన తొమ్మిది మందికి టిక్కెట్లు బుక్ అవుతున్నాయని, వారు కూడా శుక్రవారం సాయంత్రంలోగా నగరానికి చేరుకుంటారని అధికారులు చెప్పారు.

Also Read: Jagan : అవినాష్ రెడ్డికి చెక్, తెర‌పైకి జ‌గ‌న్ మ‌రో బ్ర‌ద‌ర్

ఢిల్లీలోని తెలంగాణ భవన్‌లోని కంట్రోల్ రూమ్‌తో పాటు, సూడాన్ నుండి తిరిగి వచ్చే వారికి సహాయం చేయడానికి ఢిల్లీ, ముంబై విమానాశ్రయాలలో రాష్ట్ర ప్రభుత్వం హెల్ప్ డెస్క్‌లను ఏర్పాటు చేసిందని గోపి తెలిపారు. సుడాన్‌లో చిక్కుకుపోయిన తెలంగాణ ప్రజలను స్వదేశానికి తీసుకురావడానికి రాష్ట్ర ప్రభుత్వం విదేశాంగ మంత్రిత్వ శాఖతో సమన్వయం చేసుకుంటోంది. 10 రోజుల క్రితం దేశ సైన్యం, పారామిలటరీ బలగాల మధ్య వివాదం చెలరేగడంతో సుమారు 3,000 మంది భారతీయులు సూడాన్‌లో చిక్కుకుపోయినట్లు సమాచారం.

సూడాన్‌లో చిక్కుకున్న తెలంగాణ ప్రజల వివరాల కోసం తెలంగాణ భవన్ రెసిడెంట్ కమిషనర్ గౌరవ్ ఉప్పల్ ఢిల్లీలోని విదేశీ వ్యవహారాల మంత్రిత్వ శాఖతో సమన్వయం చేస్తున్నారు. ఉక్రెయిన్ నుంచి వచ్చిన వారిని రాష్ట్రానికి పంపిన విధంగానే ఈ విమానాశ్రయాలకు చేరుకునే వారిని తిరిగి తెలంగాణకు పంపించడానికి రాష్ట్ర ప్రభుత్వం.. ఢిల్లీ, ముంబైలలో ఏర్పాట్లు చేస్తున్నట్లు అధికారులు తెలిపారు.