కిరాయి ఉంటున్న ఇంట్లో గంజాయి మొక్కపెంపకం

Ganja Plant

Telangana : సిద్దిపేట జిల్లాలో పోలీసులు చేపట్టిన డ్రగ్స్ నిఘాలో ఓ విస్తుపోయే నిజం బయటపడింది. పక్క రాష్ట్రం నుంచి వచ్చి ఇక్కడ కూలీగా పనిచేస్తున్న ఓ వ్యక్తి తాను అద్దెకు ఉంటున్న ఇంటి పెరట్లోనే గంజాయి మొక్కను పెంచుతూ పోలీసులకు దొరికిపోయాడు. స్థానికుల అనుమానంతో రంగంలోకి దిగిన పోలీసులు అతడి ఇంటి వెనుక దాచిన గంజాయితో పాటు మొక్కను స్వాధీనం చేసుకున్నారు.

• ఇంటి వెనకాలే గంజాయి తోట
• బెంగాల్ యువకుడి గుట్టురట్టు
• సిద్దిపేట పోలీసుల మెరుపు దాడి

మాదకద్రవ్యాల నిరోధమే లక్ష్యంగా పోలీసులు సాగిస్తున్న నిఘాలో ఓ విస్తుపోయే నిజం వెలుగులోకి వచ్చింది. పక్క రాష్ట్రం నుంచి వచ్చి సిద్దిపేట జిల్లాలో ఉపాధి పొందుతున్న ఓ వ్యక్తి.. ఏకంగా తాను నివసిస్తున్న కిరాయి ఇంటి ఆవరణలోనే గంజాయి మొక్కను పెంచుతూ పోలీసులకు చిక్కాడు. బుధవారం తొగుట సీఐ లతీఫ్, కుకునూరుపల్లి ఎస్సై శ్రీనివాస్‌ ఈ కేసుకు సంబంధించిన వివరాలను మీడియాకు వెల్లడించారు.

పశ్చిమ బెంగాల్‌ రాష్ట్రం ముర్షీదాబాద్‌కు చెందిన ఎస్‌.కె.రాకిబుల్‌ బతుకుదెరువు కోసం సిద్దిపేట జిల్లాకు వలస వచ్చాడు. కుకునూరుపల్లి మండలం లకుడారం గ్రామంలోని సీహెచ్‌ మంగవ్వ అనే మహిళ ఇంట్లో కిరాయికి ఉంటున్నాడు. నాలుగు నెలల క్రితం హైదరాబాద్‌లో ఒక గుర్తుతెలియని వ్యక్తి నుంచి గంజాయి విత్తనాలు సేకరించిన రాకిబుల్ వాటిని తన ఇంటి పెరట్లో నాటాడు.

ప్రస్తుతం అతను సింగాటం గ్రామంలో పనులు చేస్తున్నప్పటికీ.. రెండు రోజులకోసారి లకుడారంలోని తన గదికి వచ్చేవాడు. ఆ గంజాయి మొక్కకు నీళ్లు పోసి అది పెరిగిన తర్వాత దాని ఆకులను తెంపి ఎండబెట్టేవాడు. అలా ఎండబెట్టిన గంజాయిని సిగరెట్లలో నింపుకొని ధూమపానం చేస్తూ వ్యసనానికి బానిసయ్యాడు. నిందితుడి కదలికలపై అనుమానం వచ్చిన స్థానికుల నుంచి అందిన సమాచారంతో కుకునూరుపల్లి పోలీసులు రంగంలోకి దిగారు. లకుడారంలోని నిందితుడి నివాసంపై ఆకస్మిక దాడి చేసిన పోలీసులు ఇంటి వెనకాల పెరుగుతున్న గంజాయి మొక్కను చూసి అవాక్కయ్యారు. అక్కడ ఎండబెట్టిన 140 గ్రాముల గంజాయితో పాటు సాగులో ఉన్న మొక్కను స్వాధీనం చేసుకున్నారు. అనంతరం లకుడారం బస్టాండు వద్ద మాటువేసి నిందితుడిని అదుపులోకి తీసుకున్నారు.

ఈ సందర్భంగా పోలీసులు ఇంటి యజమానులకు కీలక సూచనలు చేశారు. బయటి వ్యక్తులకు లేదా ఇతర రాష్ట్రాల వారికి ఇళ్లు కిరాయికి ఇచ్చేటప్పుడు వారి ఆధార్ కార్డులు, పూర్తి వివరాలు సేకరించాలన్నారు. గంజాయి వంటి నిషేధిత మొక్కలను పెంచడం లేదా డ్రగ్స్ విక్రయించడం వంటి చట్టవిరుద్ధ కార్యకలాపాలకు పాల్పడితే, కఠిన చర్యలు తప్పవని హెచ్చరించారు. ప్రస్తుతం నిందితుడిపై ఎన్డీపీఎస్ (NDPS) యాక్ట్ కింద కేసు నమోదు చేసి రిమాండ్‌కు తరలించారు.

Follow us