HYDRA : హైడ్రా చర్యతో దశాబ్దాలుగా కొనసాగుతున్న భూ వివాదానికి తెర

Av Ranganath

HYDRA : రంగారెడ్డి జిల్లా, బండ్లగూడ జాగీర్‌లో దశాబ్దాలుగా కొనసాగుతున్న భూకబ్జాకు ముగింపు పలికింది. అత్యంత విలువైన పార్కు స్థలాన్ని కొందరు వ్యక్తులు అక్రమంగా ఆక్రమించుకుని యథేచ్ఛగా వినియోగిస్తున్న పరిస్థితి ఇటీవల వరకు కొనసాగింది. అయితే, స్థానికుల ఫిర్యాదుతో హైడ్రా అధికారులు రంగంలోకి దిగి, భారీ బందోబస్తుతో ఆక్రమణలను తొలగించి భూమిని ప్రభుత్వ అధీనంలోకి తీసుకున్నారు. బండ్లగూడ జాగీర్ సర్వే నంబర్లు 96/2, 96/3, 52/12/E పరిధిలో ఏర్పాటు చేసిన లేఅవుట్‌లో మొత్తం 582 ప్లాట్లు ఉన్నాయి. ప్రజల సౌకర్యార్థం ఈ లేఅవుట్‌లో రెండు చోట్ల పార్కుల కోసం స్థలాలను కేటాయించారు. ఒకటి 1,200 చదరపు గజాలు, మరొకటి 3,200 చదరపు గజాల విస్తీర్ణం కలిగి ఉండగా, కలిపి 4,400 చదరపు గజాల భూభాగం పార్కు అభివృద్ధికి ప్రత్యేకంగా కేటాయించబడింది.

కానీ, కొందరు వ్యక్తులు ఈ స్థలాలను తమ ఆధీనంలోకి తీసుకుని సంవత్సరాలుగా అక్రమంగా కట్టడాలు నిర్మించుకున్నారు. ఫలితంగా ప్రజలకు ఉపయోగపడాల్సిన పార్కు స్థలాలు నిరుపయోగంగా మారి, అభివృద్ధి పనులు జరగకుండా పోయాయి. మునిసిపల్ అధికారులు గతంలో ఈ భూములను రక్షించేందుకు కంచె వేసే ప్రయత్నం చేశారు. కానీ, కబ్జాదారులు అడ్డుపడటంతో ఆ ప్రయత్నాలు విఫలమయ్యాయి. దీంతో సమస్య ఇంకా సుదీర్ఘమై, ఏళ్ల తరబడి పరిష్కారం లేకుండా కొనసాగింది.

Ajit Pawar : వివాదంలో అజిత్‌ పవార్‌.. మహిళా ఐపీఎస్ అధికారిణిపై అనుచిత వ్యాఖ్యలు

ఈ సమస్యను ఇటీవల కొందరు స్థానికులు ‘ప్రజావాణి’ కార్యక్రమంలో జిల్లా ఉన్నతాధికారుల దృష్టికి తీసుకువెళ్లారు. వారి ఫిర్యాదుపై అధికారులు వెంటనే స్పందించారు. హైడ్రా, రెవెన్యూ, మునిసిపల్ శాఖలు సంయుక్తంగా పరిశీలన జరిపాయి. రికార్డులు పరిశీలించగా, ఆ స్థలం నిజంగానే పార్కు కోసం కేటాయించబడినదని నిర్ధారణ అయింది. దీంతో గురువారం ఉదయం భారీ బందోబస్తుతో అధికారులు అక్కడికి చేరుకున్నారు. అక్రమ నిర్మాణాలను కూల్చివేసి, మొత్తం 4,400 చదరపు గజాల స్థలాన్ని స్వాధీనం చేసుకున్నారు. అనంతరం ఆ స్థలానికి చుట్టూ కంచె వేసి, “ఈ పార్కు స్థలాన్ని హైడ్రా కాపాడింది” అనే బోర్డులను ఏర్పాటు చేశారు.

దశాబ్దాలుగా ఎదురుచూస్తున్న సమస్య చివరకు పరిష్కారమైందని స్థానికులు ఆనందం వ్యక్తం చేస్తున్నారు. “ఇన్నాళ్లూ మాకు పార్కు లేకపోవడంతో పిల్లలు ఆడుకోవడానికి, వృద్ధులు విశ్రాంతి కోసం కూర్చోవడానికి సదుపాయం లేకపోయింది. ఇప్పుడు స్థలాన్ని తిరిగి పొందడం చాలా సంతోషంగా ఉంది. త్వరలో ఇక్కడ పార్కు అభివృద్ధి చేస్తారని ఆశిస్తున్నాం” అని స్థానికులు తెలిపారు. ఈ ఘటనతో, ప్రభుత్వ ఆస్తులను రక్షించడంలో అధికారుల దృఢ సంకల్పం మరోసారి రుజువైందని నిపుణులు పేర్కొంటున్నారు.

AP : దేవాదాయ శాఖలో వివాదం..అసిస్టెంట్ కమిషనర్ పై వేటుకు రంగం సిద్ధం!

Follow us