Allu Arjun : ‘పుష్ప 2’ తొక్కిసలాట ఘటనలో కోర్టుకు హాజరుకాని అల్లు అర్జున్

సంధ్యా థియేటర్ తొక్కిసలాట కేసులో నటుడు అల్లు అర్జున్ ఈ రోజు కోర్టుకు హాజ‌రుకాలేదు. వ్యక్తిగత హాజరు నుండి మినహాయింపు ఇవ్వాలని, భవిష్యత్ విచారణలకు వర్చువల్ విధానంలో హాజరయ్యేందుకు అనుమతి ఇవ్వాలని కోరుతూ ఆయన తరపు న్యాయవాది పిటిషన్ దాఖలు చేశారు. దీంతో కోర్టు ఈ కేసును జూలై 6వ తేదీకి వాయిదా వేసింది. ఈ కేసులో మిగిలిన నిందితులందరూ కోర్టుకు హాజరయ్యారు. 11వ నిందితుడిగా పేర్కొనబడిన అల్లు అర్జున్, ప్రస్తుతం ఒక సినిమా షూటింగ్ కోసం ముంబైలో ఉన్నట్లు సమాచారం.

డిసెంబర్ 4, 2024న ‘పుష్ప 2: ది రూల్’ చిత్రం ప్రీమియర్ సందర్భంగా సంధ్య 70MM థియేటర్ వద్ద జరిగిన తొక్కిసలాట ఘటనకు సంబంధించి ఈ కేసు నమోదైంది. ఆ సమయంలో నటుడిని చూసేందుకు భారీ సంఖ్యలో జనం అక్కడ గుమిగూడారు. ఈ ఘటనలో రేవతి (39) అనే మహిళ మరణించగా, ఆమె ఎనిమిదేళ్ల కుమారుడు తీవ్రంగా గాయపడ్డాడు. చిక్కడపల్లి పోలీసులు డిసెంబర్ 2025 చివరి వారంలో 23 మంది నిందితులపై ఎఫ్‌ఐఆర్ (FIR) నమోదు చేసి, ఛార్జ్‌షీట్ దాఖలు చేశారు. థియేటర్ యజమాని, భాగస్వాములు, మేనేజర్, లోయర్ బాల్కనీ ఇన్‌ఛార్జ్, గేట్‌కీపర్లను నిందితులు 1 నుండి 10 వరకు ఉన్నవారిగా పేర్కొన్నారు.

మరణించిన మహిళ కుటుంబ సభ్యులు ఇచ్చిన ఫిర్యాదు ఆధారంగా.. అల్లు అర్జున్, అతని భద్రతా సిబ్బంది, థియేటర్ యాజమాన్య సభ్యులపై BNS లోని వివిధ సెక్షన్ల కింద కేసులు నమోదు చేశారు. ఛార్జ్‌షీట్‌ను పరిశీలించిన తర్వాత.. నిందితులందరూ కోర్టుకు హాజరు కావాలని ఆదేశిస్తూ కోర్టు సమన్లు ​​జారీ చేసింది.

Follow us