Wrestling Federation Of India: భారత రెజ్లింగ్ సమాఖ్యపై సస్పెన్షన్ ఎత్తివేత

Wrestling Federation Of India: దేశవ్యాప్తంగా ఉన్న రెజ్లర్లకు శుభవార్త. భారత రెజ్లింగ్ సమాఖ్య (Wrestling Federation Of India)పై సస్పెన్షన్‌ను క్రీడా మంత్రిత్వ శాఖ ఉపసంహరించుకుంది. ఫెడరేషన్ స్థితి NSFగా పునరుద్ధరించబడింది. దేశీయ, అంతర్జాతీయ టోర్నీలకు జాతీయ జట్ల ఎంపికకు మార్గం సుగమం చేస్తూ క్రీడా మంత్రిత్వ శాఖ మంగళవారం సస్పెన్షన్‌ను ఎత్తివేసింది. అండర్-15 (U-15) మరియు అండర్-20 (U-20) జాతీయ ఛాంపియన్‌షిప్‌లను హడావిడిగా ప్రకటించడంపై కోపంతో క్రీడా మంత్రిత్వ శాఖ 24 డిసెంబర్ 2023న WFIని సస్పెండ్ చేసిన విష‌యం తెలిసిందే. అయితే ఇప్పుడు అది పునరుద్ధరించబడింది.

ఆగ్రహం వ్యక్తం చేసి కేంద్ర ప్ర‌భుత్వం సస్పెండ్ చేసింది

హిందుస్థాన్ టైమ్స్ నివేదిక ప్రకారం.. డిసెంబర్ 21, 2023న జరిగిన ఎన్నికలలో సంజయ్ సింగ్ నేతృత్వంలోని ప్యానెల్ గెలిచింది. అయితే WFI మాజీ చీఫ్ బ్రిజ్ భూషణ్ శరణ్ సింగ్ బలమైన కోట అయిన గోండాలోని నందిని నగర్ జాతీయ ఛాంపియన్‌షిప్‌కు వేదిక కావడం పట్ల ప్రభుత్వం అసంతృప్తిగా ఉన్నందున WFI సస్పెండ్ చేసింది. WFI తన పనిని.. వ్యవస్థను మెరుగుపరిచిందని, అందుకే సస్పెన్షన్‌ను ఎత్తివేయాలని నిర్ణయించినట్లు ఇప్పుడు మంత్రిత్వ శాఖ తన ఆర్డర్‌లో తెలిపింది. దీని వల్ల రెజ్లర్లు ఎంతో ప్రయోజనం పొందుతారు. సీనియర్ రెజ్లర్లు అంతర్జాతీయ టోర్నీలకు ట్రయల్స్ ఇవ్వగలుగుతారు. జూనియర్ రెజ్లర్లు రాష్ట్ర స్థాయిలో ఆడేందుకు ట్రయల్స్ ఇవ్వగలరు.

Also Read: Champions Trophy Final: ఛాంపియన్స్ ట్రోఫీ ఫైనల్ సమయంలో పీసీబీ చీఫ్‌ ఎందుకు లేరు?

ఫెడరేషన్ మాజీ అధిపతి బ్రిజ్ భూషణ్ శరణ్ సింగ్ 7 మంది మహిళా రెజ్లర్లను లైంగికంగా వేధించార‌ని ఆరోప‌ణ‌లు వ‌చ్చిన విష‌యం తెలిసిందే. నిందితులను అరెస్టు చేయాలంటూ జంతర్‌మంతర్‌ వద్ద రెజ్ల‌ర్లు ఆందోళనకు దిగారు. ఈ కాలంలో జరిగిన గందరగోళాన్ని యావత్ దేశం, ప్రపంచం చూసింది. ఈ ఘటనపై దేశవ్యాప్తంగా, ప్రపంచవ్యాప్తంగా తీవ్ర నిరసన వ్యక్తమైంది. బ్రిజ్ భూషణ్‌ను ఆ పదవి నుంచి తప్పించాలని డిమాండ్‌ చేశారు. 2023 డిసెంబర్‌లో జరిగిన ఫెడరేషన్ ఎన్నికలను రద్దు చేయాలని, కొత్త నియామకాలు చట్టవిరుద్ధమని ప్రకటించాలని హైకోర్టులో పిటిషన్ దాఖలైంది. దీని తరువాత, 21 డిసెంబర్ 2023న తిరిగి ఎన్నికలు నిర్వహించబడ్డాయి. బ్రిజ్ భూషణ్ సహచరుడు సంజయ్ సింగ్‌ను చీఫ్‌గా నియమించారు.