Messi : మెస్సీ తో ఆడేందుకు సీఎం రేవంత్ సిద్ధం

అర్జెంటీనా ఫుట్‌బాల్ సూపర్‌స్టార్ లియోనల్ మెస్సీ తన ఇండియా టూర్‌లో భాగంగా హైదరాబాద్‌ను జోడించడం తెలంగాణ రాష్ట్రంలో క్రీడాభిమానుల్లో ఉత్సాహాన్ని నింపింది. డిసెంబర్ 13న హైదరాబాద్‌లో జరగనున్న ఫ్రెండ్లీ మ్యాచ్‌లో మెస్సీ పాల్గొననుండగా, ముఖ్యమంత్రి ఎ. రేవంత్ రెడ్డి కూడా ఈ సందర్భంగా మెస్సీకి వెల్ కం చెప్పబోతున్నారు. ‘గొప్ప ఆటగాడు’ (G.O.A.T) టూర్‌లో భాగంగా హైదరాబాద్‌లో ఆడనున్నట్లు మెస్సీ సోషల్ మీడియాలో పోస్ట్ చేయగా, ముఖ్యమంత్రి రేవంత్ రెడ్డి వెంటనే స్పందిస్తూ.. “డిసెంబర్ 13న జీ.ఓ.ఏ.టీ లియోనల్ మెస్సీకి ఆతిథ్యం ఇవ్వడానికి ఎదురుచూస్తున్నాను. లెజెండ్‌ను మన నేలపై చూడాలనే ప్రతి ఫుట్‌బాల్ అభిమాని కల నెరవేరేందుకు ఇదో అద్భుతమైన క్షణం” అని పేర్కొన్నారు. ఈ పర్యటన హైదరాబాద్ నగరానికి, రాష్ట్రానికి అంతర్జాతీయ వేదికపై ప్రత్యేక గుర్తింపు తీసుకురానుంది.

Virat Kohli- MS Dhoni: ఇంట‌ర్నెట్‌ను షేక్ చేస్తున్న ధోని- కోహ్లీ వైర‌ల్ పిక్ ఇదే!

కేవలం ఆతిథ్యానికే పరిమితం కాకుండా ముఖ్యమంత్రి రేవంత్ రెడ్డి స్వయంగా ఈ మ్యాచ్ కోసం తీవ్రంగా శ్రమిస్తున్నారు. దీర్ఘకాలంగా ఫుట్‌బాల్ అభిమాని అయిన రేవంత్ రెడ్డి, మెస్సీతో కలిసి ఆడే అవకాశం వచ్చిన నేపథ్యంలో తన ఆటతీరు సరిగా ఉండాలని కసరత్తు మొదలుపెట్టారు. విశ్వసనీయ వర్గాల సమాచారం ప్రకారం ముఖ్యమంత్రి తన రోజువారీ అధికారిక పనులు ముగిసిన తర్వాత, రాత్రి 11:30 గంటల ప్రాంతంలో ప్రతి రాత్రి మ్యాచ్ కోసం శిక్షణ తీసుకుంటున్నారు. “మెస్సీతో కలిసి ఒకే మైదానంలో నిలబడటమే గౌరవం అయినప్పటికీ, ముఖ్యమంత్రి పేలవమైన ప్రదర్శన ఇవ్వకూడదనుకుంటున్నారు. అందుకే, ఆయన శిక్షణ పొందుతున్నారు” అని సీఎం సన్నిహిత వర్గాలు తెలిపాయి. మెస్సీ తన ఐకానిక్ నెం. 10 జెర్సీని ధరించనుండగా, రేవంత్ రెడ్డి కూడా “RR9” నంబర్ జెర్సీతో బరిలోకి దిగనున్నారు.

ఈ ఫ్రెండ్లీ మ్యాచ్‌లో ముఖ్యమంత్రి సెంటర్ ఫార్వర్డ్ స్థానంలో ఆడనున్నట్లు సమాచారం. అంతేకాకుండా, మెస్సీ జట్టుతో తలపడే జట్టుకు ఆయనే కెప్టెన్గా వ్యవహరించనున్నారు. ఈ పర్యటన కోసం హైదరాబాద్ నగరాన్ని అలంకరించేందుకు, ‘గొప్ప ఆటగాడికి’ రాజరిక స్వాగతం పలికేందుకు నిర్వాహక కమిటీ భారీ ఏర్పాట్లు చేస్తోంది. ఒక ముఖ్యమంత్రి తన బిజీ షెడ్యూల్‌లోనూ ఫుట్‌బాల్ వంటి క్రీడపై ఆసక్తి చూపడం, అంతర్జాతీయ క్రీడాకారుడితో ఆడేందుకు వ్యక్తిగత శిక్షణ తీసుకోవడం రాష్ట్రంలో క్రీడా స్ఫూర్తిని పెంచే చర్యగా విశ్లేషకులు భావిస్తున్నారు. మెస్సీ రాకతో హైదరాబాద్‌కు గ్లోబల్ స్పోర్ట్స్ మ్యాప్‌లో చోటు దక్కుతుందని, సీఎం రేవంత్ రెడ్డి వ్యక్తిగత చొరవ ఈ ఈవెంట్‌కు మరింత ప్రాధాన్యతను తీసుకొస్తుందని చెప్పవచ్చు.