Mukesh Ambani : తిరుమల శ్రీవారిని దర్శించుకున్న ముకేశ్ అంబానీ

రిలయన్స్ ఇండస్ట్రీస్ చైర్మన్ శ్రీ ముకేశ్ అంబానీ ఆదివారం తిరుమల శ్రీ వేంకటేశ్వర స్వామి వారిని దర్శించుకున్నారు. స్వామి ఆశీస్సులతో భక్తుల సేవలో భాగంగా అంబానీ కుటుంబం మరో మహత్తర సేవా కార్యక్రమాన్ని ప్రారంభించింది. శ్రీ వేంకటేశ్వర అన్నప్రసాదం ట్రస్ట్ ఆధ్వర్యంలో తిరుమలలో అత్యాధునిక సాంకేతిక సదుపాయాలతో కూడిన ఒక కొత్త వంటగది నిర్మాణానికి శ్రీకారం చుట్టారు. ఈ వంటగది పూర్తిస్థాయిలో స్వయంచాలక పద్ధతులతో పనిచేసేలా రూపకల్పన చేయబడింది. రోజుకు రెండు లక్షల మందికి పైగా భక్తులకు పవిత్రమైన అన్నప్రసాదం వండే సామర్థ్యం కలిగిన ఈ ప్రాజెక్ట్, తిరుమలలో భక్తుల సేవలో ఒక చారిత్రాత్మక ముందడుగు కానుంది.

Y+ Security: లాలూ ప్రసాద్ యాదవ్ కుమారుడికి వై+ భద్రత.. ఏంటి ఈ భద్రతా వ్యవస్థ?

ఈ పుణ్యకార్యాన్ని తిరుమల తిరుపతి దేవస్థానం (TTD)తో భాగస్వామ్యంగా, ఆంధ్రప్రదేశ్ ప్రభుత్వ సహకారంతో చేపడుతున్నారు. అన్నప్రసాదం తయారీలో భక్తి, పవిత్రత, పోషక విలువలకు ప్రాధాన్యతనిస్తూ, ప్రతి భక్తుడికి ప్రేమతో సేవ చేయడమే ఈ యత్నం వెనుక ప్రధాన లక్ష్యం. తిరుమల భక్తి, దయ, నిస్వార్థ సేవలకు ప్రతీకగా నిలిచిన ఈ ధామంలో ముకేశ్ అంబానీ భాగస్వామ్యం విశేషంగా భావించబడుతోంది. ఈ సందర్భంగా ఆయన మాట్లాడుతూ — “ముఖ్యమంత్రి శ్రీ నారా చంద్రబాబు నాయుడు గారి అన్నసేవా సంప్రదాయాన్ని అన్ని దేవస్థానాలకు విస్తరించాలనే దూరదృష్టిని మేము గౌరవిస్తున్నాం. ఈ మహత్తర సేవలో భాగం కావడం మా అదృష్టం” అని తెలిపారు.

అంతేకాకుండా, శ్రీ ముకేశ్ అంబానీ కేరళలోని త్రిశూర్ జిల్లాలో గల గురువాయూర్ శ్రీకృష్ణ ఆలయాన్ని కూడా సందర్శించారు. ఈ సందర్భంగా ఆయన ఆలయ అభివృద్ధి నిమిత్తం రూ. 15 కోట్ల విరాళాన్ని అందజేశారు. తిరుమల నుండి గురువాయూర్ వరకూ రెండు ప్రధాన వైష్ణవక్షేత్రాలను సందర్శించి, ముకేశ్ అంబానీ ఆధ్యాత్మికత, సేవా భావానికి మరో నిదర్శనం చూపించారు. తిరుమలలో కొత్త వంటగది నిర్మాణం పూర్తయిన తర్వాత, భక్తులకు మరింత విస్తృతంగా అన్నప్రసాదం అందించే అవకాశం కలుగుతుంది. ఈ ప్రాజెక్ట్‌ తిరుమల సేవా చరిత్రలో మరొక పవిత్ర అధ్యాయం రాయబోతోందని భక్తులు ఆనందం వ్యక్తం చేస్తున్నారు.