Air India Flight: ఎయిర్ ఇండియా విమానంలో ప్రయాణికుడి రచ్చ.. ఢిల్లీ నుంచి లండన్ వెళ్తున్న విమానంలో ఘటన..!

ఢిల్లీ నుంచి లండన్ (Delhi- London) వెళ్తున్న ఎయిర్ ఇండియా విమానం (Air India Flight) లో ఓ ప్రయాణికుడు (Passenger) బీభత్సం సృష్టించాడు. ఈ గొడవ ఎంతగా పెరిగిందంటే విమానం తిరిగి ఢిల్లీ వెళ్లాల్సి వచ్చింది. దీంతో విమానయాన సంస్థ ఢిల్లీ విమానాశ్రయంలో పోలీసులకు ఫిర్యాదు చేసింది. వీరంగం సృష్టించిన ప్రయాణికుడిని పోలీసులు అదుపులోకి తీసుకున్నారు.

ఎయిరిండియా విమానం సోమవారం (ఏప్రిల్ 10) ఉదయం 6.35 గంటలకు ఢిల్లీ నుంచి లండన్‌కు బయలుదేరింది. కొద్దిసేపటికే విమానంలో ఓ ప్రయాణికుడు గొడవకు దిగాడు. సిబ్బందిపై కూడా దాడి జరిగింది. ఇందులో ఇద్దరు వ్యక్తులు గాయపడ్డారు. ప్రయాణికుడు అదుపు తప్పడం చూసి పైలట్ విమానాన్ని తిరిగి ఢిల్లీకి తీసుకురావాలని నిర్ణయించుకున్నాడు. ఢిల్లీ ఎయిర్‌పోర్ట్‌లో దిగిన తర్వాత ఆ ప్రయాణికుడిని పోలీసులకు అప్పగించారు. పోలీసులు ఎఫ్ఐఆర్ నమోదు చేసి తదుపరి చర్యలు తీసుకుంటున్నారు. సోమవారం మధ్యాహ్నానికి విమానం రీషెడ్యూల్ చేయబడింది.

Also Read: Earthquake: అండమాన్ నికోబార్‌లో భూకంపం.. 24 గంటల్లో మూడుసార్లు భూకంపం

ఎయిర్ ఇండియా ఓ ప్రకటన విడుదల

ఎయిర్ ఇండియా ఒక ప్రకటన విడుదల చేస్తూ.. “ఏప్రిల్ 10, 2023న ఎయిర్ ఇండియా విమానం AI-111 ఢిల్లీ-లండన్ హీత్రో ఒక ప్రయాణీకుడి తీవ్రమైన వికృత ప్రవర్తన కారణంగా బయలుదేరిన వెంటనే ఢిల్లీకి తిరిగి వచ్చింది. మౌఖిక, వ్రాతపూర్వక హెచ్చరికలు ఉన్నప్పటికీ ప్రయాణీకుడు గందరగోళాన్ని కొనసాగించాడు. ఫలితంగా క్యాబిన్ సిబ్బందిలోని ఇద్దరు సభ్యులకు గాయాలయ్యాయి. పైలట్-ఇన్-కమాండ్ ఢిల్లీకి తిరిగి రావాలని నిర్ణయించుకున్నాడు. ల్యాండింగ్ తర్వాత ప్రయాణీకుడిని భద్రతా సిబ్బందికి అప్పగించారు.” అని ఎయిర్ ఇండియా ప్రకటనలో పేర్కొంది.

పోలీసులు ఎఫ్ఐఆర్ కూడా నమోదు చేసినట్లు ప్రకటనలో తెలిపారు. ఎయిర్ ఇండియాలో ప్రతి ఒక్కరి భద్రత, గౌరవం మాకు ముఖ్యం. బాధిత సిబ్బందికి అన్ని విధాలా సహాయ సహకారాలు అందిస్తున్నాం. ప్రయాణికులకు కలిగిన అసౌకర్యానికి క్షమాపణలు కోరుతున్నాం. ఈ మధ్యాహ్నం విమాన సమయం మార్చబడిందని ఎయిర్ ఇండియా పేర్కొంది.