Gongura Egg Curry: ఎంతో టేస్టీగా ఉండే గోంగూర కోడిగుడ్ల కర్రీ.. తయారు చేసుకోండిలా?

మామూలుగా కోడి గుడ్లతో అనేక రకాల వంటకాలను తయారు చేస్తూ ఉంటారు. ఎగ్ రైస్, ఎగ్ కర్రీ, ఎగ్ ధమ్ బిరియాని, ఎగ్ మసాలా ఇలా ఎన్నో రకాల వంటకాలను తయారు చేస్తూ ఉంటారు. ఎప్పుడైనా గోంగూరతో కోడిగుడ్ల కర్రీని ట్రై చేశారా. ఒకవేళ ట్రై చేయకపోతే గోంగూర కోడిగుడ్ల కూర ఎలా తయారు చేయాలో ఇప్పుడు మనం తెలుసుకుందాం.. అలాగే దానికి తయారీకి కావల్సిన పదార్థాలు ఏంటి? అన్న వివరాలను ఇప్పుడు మనం తెలుసుకుందాం..

గోంగూర కోడి గుడ్డు కర్రీ తయారీకి కావల్సిన పదార్థాలు..

ఉడికించిన గుడ్లు – 6
గోంగూర – ఒక కట్ట
నూనె – 2 టేబుల్ స్పూన్స్
కరివేపాకు – ఒక రెబ్బ
తరిగిన ఉల్లిపాయలు – 2
తరిగిన పచ్చి మిర్చి – 4
పసుపు – అర టీ స్పూన్
అల్లం వెల్లుల్లి పేస్ట్ – అర టీ స్పూన్
తరిగిన టమాటాలు – 2
కారం – అర టీ స్పూన్
ధనియాల పొడి – ఒక టీ స్పూన్
జీలకర్ర పొడి – అర టీ స్పూన్
ఉప్పు – తగినంత
జీలకర్ర – అర టీ స్పూన్
నీళ్లు – అర కప్పు
తరిగిన కొత్తిమీర – కొద్దిగా
లవంగాలు – 4
యాలకులు – 3
దాల్చిన చెక్క ముక్కలు – 3
సాజీరా – అర టీ స్పూన్

గోంగూర కోడి గుడ్డు కర్రీ తయారీ విధానం :

ముందుగా కడాయిలో ఒక టీ స్పూన్ నూనెను వేసి కాగిన తరువాత శుభ్రంగా కడిగిన గోంగూరను వేసి కలుపుతూ ఉడికించి చల్లగా అయ్యే వరకు ఉంచి జార్ లో వేసి పేస్ట్ లా చేసుకోవాలి. ఇప్పుడు కళాయిలో నూనె వేసి కాగిన తరువాత ఉడికించిన గుడ్లను వేసి ఎర్రగా అయ్యే వరకు వేయించి ప్లేట్ లోకి తీసుకోవాలి. అదే కళాయిలో మసాలా దినుసులను, జీలకర్రను వేసి వేయించాలి. అవి వేగిన తరువాత తరిగిన ఉల్లిపాయలను వేసి ఉల్లిపాయ ముక్కలు ఎర్రగా అయ్యే వరకు వేయించుకోవాలి. ఇవి వేగిన తరువాత తరిగిన పచ్చి మిర్చి ముక్కలు, కరివేపాకును వేసి ఒక నిమిషం పాటు వేయించిన తరువాత అల్లం వెల్లుల్లి పేస్ట్ ను కూడా వేసి పచ్చి వాసనపోయే వరకు వేయించాలి. తరువాత టమాట ముక్కలను వేసి కలిపి మూత పెట్టి మెత్తగా అయ్యే వరకు ఉడికించాలి. టమాట ముక్కలు ఉడికిన తరువాత కారం, ధనియాల పొడి, ఉప్పు వేసి బాగా కలపాలి. ఇప్పుడు నీళ్లను పోసి కలిపి ఒక నిమిషం పాటు ఉడికించాలి. తరువాత ముందుగా తయారు చేసి పెట్టుకున్న గోంగూర పేస్ట్ ను వేసి కలిపి 3 నిమిషాల పాటు ఉడికించాలి. 3 నిమిషాల తరువాత వేయించి పెట్టుకున్న గుడ్లను వేసి మూత పెట్టి 8 నిమిషాల పాటు ఉడికించాలి. చివరగా కొత్తిమీరను వేసి స్టవ్ ఆఫ్ చేసుకోవాలి. అంతే ఎంతో టేస్టీగా ఉండే గోంగూర కోడిగుడ్ల కూర రెడీ.