Tata Vs Pakistan : పాక్ జీడీపీని దాటేసిన టాటాగ్రూప్.. మార్కెట్ విలువ ఎంతో తెలుసా ?

Tata Vs Pakistan

Tata Vs Pakistan :  టాటా గ్రూప్.. మరోసారి మనదేశ గౌరవాన్ని పెంచింది. ది గ్రేట్ అనిపించుకుంది.  రతన్ టాటా సారథ్యంలోని టాటా గ్రూప్ రూ. 30 లక్షల కోట్ల మార్కెట్ విలువను సాధించి భారత చరిత్రలో మరే కంపెనీ సాధించని కొత్త రికార్డులను నమోదు చేసింది. మన పొరుగు దేశం పాకిస్తాన్ స్థూల దేశీయోత్పత్తి(జీడీపీ)ని కూడా టాటా గ్రూప్ కంపెనీ మార్కెట్ విలువ దాటేయడం విశేషం. గత ఏడాది వ్యవధిలో టాటా గ్రూప్ యాజమాన్యంలోని లిస్టెడ్ కంపెనీల షేర్ల ధరలు  భారీగా పెరిగాయి. అద్భుతమైన రాబడి వచ్చింది. ఆ కంపెనీల ఉమ్మడి విలువ పాకిస్తాన్ ఆర్థికవ్యవస్థ కంటే ఎక్కువగా నమోదైంది. టాటా గ్రూప్ మార్కెట్ విలువ రూ. 30.3 లక్షల కోట్లకు చేరుకోగా.. పాకిస్తాన్ జీడీపీ విలువ రూ. 28.3 లక్షల కోట్ల వద్దే ఉంది. ప్రస్తుతం పాకిస్తాన్  అప్పులు, ద్రవ్యోల్బణంతో పోరాడుతున్న సంగతి తెలిసిందే.

• టాటా గ్రూప్ మార్కెట్ విలువ రూ. 30.3 లక్షల కోట్లు కాగా అందులో ఐటీ సేవల దిగ్గజం టీసీఎస్ వాటాయే రూ. 15 లక్షల కోట్లు.
• ఒక్క టీసీఎస్(Tata Vs Pakistan) వాటాయే పాకిస్తాన్ ఆర్థికవ్యవస్థ విలువలో సగం ఉంది.
• టాటా గ్రూప్‌లో టాటా మోటార్స్, ట్రెంట్ విలువ కూడా ఎక్కువే.
• టాటా మోటార్స్ షేర్లు గతేడాది కాలంలో 110 శాతం, ట్రెంట్ 200 శాతం పెరిగాయి.
• టాటా టెక్నాలజీస్, టీఆర్ఎఫ్, బెనారస్ హోటల్స్, టాటా ఇన్వెస్ట్‌మెంట్ కార్పొరేషన్, ఆటోమొబైల్ కార్పొరేషన్ ఆఫ్ గోవా, ఆర్ట్‌సన్ ఇంజినీరింగ్ వంటి షేర్లు మెరుగైన ర్యాలీ సాధించాయి.
• టాటా గ్రూప్‌కు స్టాక్ మార్కెట్లో కనీసం 25 కంపెనీలను కలిగి ఉండగా, వాటిలో టాటా కెమికల్స్ మాత్రమే గడిచిన ఏడాదిలో 5 శాతం క్షీణించింది.

పాక్ గణాంకాలు

• 2022-23 ఆర్థిక సంవత్సరంలో ఎదురైన ప్రతికూల పరిణామాలతో పాకిస్తాన్ దారుణమైన ఆర్థిక సంక్షోభాన్ని ఎదుర్కొంటోంది.
• పాక్‌కు ప్రస్తుతం రూ. 10 లక్షల కోట్ల కంటే ఎక్కువ బయటి అప్పులు ఉన్నాయి. ఈ జూలై నాటికి చెల్లించాల్సిన రూ. 2 లక్షల కోట్ల రుణాలు కూడా ఉన్నాయి.
• మరో రూ. 25 వేల కోట్ల విలువైన ఐఎంఎఫ్ సాయం గడువు వచ్చే నెలతో ముగియనుంది. ఇది పాకిస్తాన్ ఆర్థిక ఇబ్బందులను మరింత పెంచనుంది.
• ప్రస్తుతం పాక్ వద్ద రూ. 6.65 లక్షల కోట్ల విదేశీ మారకద్రవ్య నిల్వలే ఉన్నాయి. ఇవి కేవలం రెండు నెలల దిగుమతులకు మాత్రమే  సరిపోతాయి.
• పాకిస్తాన్  రుణ-జీడీపీ నిష్పత్తి 70 శాతం దాటిపోయింది. వడ్డీ చెల్లింపులకు సంబంధించి ఆందోళనకర స్థాయిలో పరిస్థితి ఉంది. ఈ ఏడాది ప్రభుత్వాదాయంలో సగం వీటికే సరిపోతుందని అంచనా వేస్తున్నారు.
• పాకిస్తాన్‌కు పూర్తి భిన్నంగా భారత జీడీపీ 3.7 ట్రిలియన్ డాలర్లతో ఆ దేశం కంటే 11 రెట్లు పెద్ద ఆర్థికవ్యవస్థగా ఉంది.
• ప్రస్తుతం ఐదో అతిపెద్ద ఆర్థికవ్యవస్థగా ఉన్న భారత్, 2028 నాటికి ప్రపంచంలోనే 3వ అతిపెద్ద ఆర్థికవ్యవస్థగా అవతరించేందుకు రెడీ అవుతోంది.

Follow us