Heavy rains : ముంబైని ముంచెత్తుతున్న వర్షాలు..రెడ్ అలెర్ట్.. స్కూళ్లు, కాలేజీల బంద్

Heavy rains : దేశ ఆర్థిక రాజధాని ముంబై నగరం వరుణుడు వర్షాలతో అతలాకుతలమవుతోంది. గత మూడు రోజులుగా ఎడతెరిపిలేని వర్షాలతో మహానగరం జలదిగ్బంధానికి లోనైంది. భారీ వర్షాల ప్రభావంతో నగరంలో జనజీవనం పూర్తిగా స్తంభించింది. ముఖ్యంగా లోతట్టు ప్రాంతాలు పూర్తిగా నీట మునిగిపోయాయి. ఈ పరిస్థితుల్లో భారత వాతావరణ శాఖ (ఐఎండీ) ముంబైకు రెడ్ అలర్ట్ ప్రకటించడంతో నగరంలోని బృహన్‌ముంబై మున్సిపల్ కార్పొరేషన్ (బీఎంసీ) అప్రమత్తమైంది.

పాఠశాలలకు సెలవు, ప్రజలకు హెచ్చరికలు

భారీ వర్షాలు మరింత కొనసాగే అవకాశాన్ని దృష్టిలో ఉంచుకుని, బీఎంసీ ముందస్తు చర్యల్లో భాగంగా మంగళవారం నగరంలోని అన్ని పాఠశాలలు, కళాశాలలకు సెలవు ప్రకటించింది. అవసరమైతే మాత్రమే ప్రజలు బయటకు రావాలని, సాధ్యమైనంతవరకు ఇంటి వద్దే ఉండాలని అధికారులు సూచించారు.

నీట మునిగిన నగరం..ట్రాఫిక్ తీవ్రంగా ప్రభావితమైందీ

నిన్న కురిసిన వర్షాల కారణంగా ముంబై నగరంలోని పలు ప్రధాన రహదారులు జలమయమయ్యాయి. రోడ్లపై నీరు నిలిచిపోవడంతో వాహన రాకపోకలు తీవ్రంగా ప్రభావితమయ్యాయి. ముఖ్యంగా లోతట్టు ప్రాంతాల్లో ట్రాఫిక్ జామ్‌లు ఏర్పడ్డాయి. కొన్నిచోట్ల చెట్లు కూలిపోవడం, విద్యుత్ లైన్లు తెగిపోవడం వంటి ఘటనలతో ప్రజలు తీవ్ర ఇబ్బందులు ఎదుర్కొన్నారు. విమానాశ్రయం వైపు వెళ్లే మార్గాల్లోనూ నీరు నిలిచిపోవడంతో ఇండిగో ఎయిర్‌లైన్స్ ప్రయాణికులకు ముందుగానే బయలుదేరాలని సూచించింది.

మరణాల శోకసంద్రం..గోడకూలిన ఘటన, డ్రైనేజీలో కొట్టుకుపోయిన వ్యక్తి

వర్షాలతో సంబంధించి పలు విషాదకర సంఘటనలు ముంబై వాసులను శోకసంద్రంలో ముంచాయి. గోద్రెజ్ బాగ్‌లో గోడకూలిన ఘటనలో సతీష్ టిర్కే అనే 35ఏళ్ల వాచ్‌మన్ మృతిచెందాడు. మరో ఘటనలో వాల్మీకి నగర్‌లో ఓ వ్యక్తి డ్రైనేజీలో కొట్టుకుపోయాడు. అతని కోసం ఎన్డీఆర్ఎఫ్ బృందాలు గాలింపుచేస్తున్నాయి. అలాగే యులోజియస్ సెల్వరాజ్ అనే మహిళ తన కుమారుడిని పాఠశాల నుంచి తీసుకురావడం సమయంలో బస్సు ఢీకొనడంతో ఆమెతో పాటు ఏడేళ్ల కుమారుడు ఆంటోనీ మరణించారు.

వర్షపాతం రికార్డు స్థాయిలో.. సరస్సులు పొంగిపొర్లుతున్నాయి

గత 81 గంటల వ్యవధిలో ముంబైలో 550 మిల్లీమీటర్ల వర్షపాతం నమోదైంది. ఇది సాధారణంగా ఆగస్టు నెల మొత్తంలో నమోదయ్యే వర్షపాతం స్థాయికి సమానం కావడం గమనార్హం. ఈ భారీ వర్షాలతో నగరానికి తాగునీరు అందించే ఏడు సరస్సులలో ఒకటైన విరార్ సరస్సు నిండిపొంగింది. ముంబైతో పాటు రత్నగిరి, రాయగడ్, హింగోలి జిల్లాల్లోనూ భారీ వర్షాలు కొనసాగుతున్నాయని వాతావరణ శాఖ తెలిపింది.

సీఎం ఆదేశాలు, అధికారుల అప్రమత్తత

ఇప్పటివరకు వర్షాల కారణంగా మహారాష్ట్ర వ్యాప్తంగా ఏడుగురు ప్రాణాలు కోల్పోయినట్టు ముఖ్యమంత్రి దేవేంద్ర ఫడ్నవీస్ కార్యాలయం ఒక ప్రకటనలో వెల్లడించింది. ప్రజల రక్షణ కోసం అన్ని అధికార శాఖలు సమన్వయంగా పనిచేయాలని సీఎం ఆదేశించారు. అత్యవసర పరిస్థితులలో సహాయక చర్యల కోసం ఎన్డీఆర్ఎఫ్ బృందాలను సిద్ధంగా ఉంచినట్టు సమాచారం.

ప్రజలు అప్రమత్తంగా ఉండాలి

వర్షాలు మరికొన్ని రోజులు కొనసాగే అవకాశముండటంతో ప్రజలు అప్రమత్తంగా ఉండాలి. ఎటువంటి అత్యవసర పరిస్థితుల్లో మున్సిపల్ అధికారులకు, సహాయ బృందాలకు సమాచారం అందించాలని అధికారులు సూచిస్తున్నారు. ట్రాఫిక్ సమస్యలు, నీటి నిల్వ, ప్రమాదాలకు లోనయ్యే ప్రాంతాల విషయంలో ప్రజలు అప్రమత్తంగా ఉండాలి. ముంబై నగరం వర్షాలకు తాళుకోలేని స్థితిలో ఉండటంతో, దీనిపై సుదీర్ఘకాలిక పరిష్కారాలు అవసరమని విశ్లేషకులు సూచిస్తున్నారు.

Read Also: Miss Universe India 2025 : మిస్ యూనివర్స్ ఇండియా 2025 విజేత ఎవరో తెలుసా?