పోలీసులపై దాడి చేసిన గ్రామస్థులు , రాయ్ గఢ్ లో ఉద్రిక్తత

Coal Mine Villagers Protest

• కోల్ మైనింగ్ ప్రాజెక్టుకు వ్యతిరేకంగా నిరసన
• తమ్నార్ గ్రామస్థులు vs పోలీసులు
• ప్రాజెక్టు వల్ల భూములు కోల్పోవడమే కాదు పర్యావరణం దెబ్బతింటుంది

ఛత్తీస్‌గఢ్‌లోని రాయ్‌గఢ్ జిల్లాలో గత కొంతకాలంగా కొనసాగుతున్న బొగ్గు గనుల వివాదం ఒక్కసారిగా హింసాత్మక రూపం దాల్చింది. జిందాల్ పవర్ అండ్ స్టీల్ లిమిటెడ్ (JSPL) చేపట్టిన కోల్ మైనింగ్ ప్రాజెక్టును వ్యతిరేకిస్తూ తమ్నార్ గ్రామస్థులు పెద్ద ఎత్తున ఆందోళన చేపట్టారు. ప్రాజెక్టు వల్ల తమ భూములు కోల్పోవడమే కాకుండా, పర్యావరణం దెబ్బతింటుందని, తమ జీవనోపాధి ప్రశ్నార్థకమవుతుందని స్థానికులు భయాందోళన వ్యక్తం చేస్తున్నారు. ఈ క్రమంలో నిరసనకారులు ఒక్కసారిగా జిందాల్ ప్లాంట్‌లోకి చొరబడటంతో పరిస్థితి అదుపు తప్పి ఉద్రిక్తతకు దారితీసింది.

Raigarh Coal Mine Villagers

ఈ ఆందోళనలో గ్రామస్థులు తీవ్ర స్థాయిలో విధ్వంసానికి పాల్పడ్డారు. ప్లాంట్ ఆవరణలోని పోలీస్ జీపులు, ట్రాక్టర్లు మరియు ఇతర యంత్రాలను నిరసనకారులు తగలబెట్టారు. ఘటనా స్థలానికి చేరుకుని అడ్డుకునేందుకు ప్రయత్నించిన పోలీసులపైకి రాళ్లు రువ్వడంతో పాటు దాడులకు దిగారు. ఈ ఘర్షణల్లో సుమారు 10 మంది పోలీసులు తీవ్రంగా గాయపడగా, పోలీసుల లాఠీఛార్జిలో పలువురు గ్రామస్థులు కూడా గాయపడ్డారు. ప్రస్తుతం అక్కడ యుద్ధ వాతావరణం నెలకొంది, భారీగా పోలీసు బలగాలను మోహరించి పరిస్థితిని అదుపులోకి తెచ్చేందుకు ప్రయత్నిస్తున్నారు.

ఈ వివాదం వెనుక దశాబ్దాల కాలంగా ఉన్న భూసేకరణ సమస్యలు మరియు పర్యావరణ ఆందోళనలు ప్రధాన కారణాలుగా కనిపిస్తున్నాయి. గనుల తవ్వకం వల్ల స్థానిక గిరిజన ప్రాంతాల్లో నీటి వనరులు కలుషితం కావడమే కాకుండా, అడవులు కనుమరుగవుతున్నాయని పర్యావరణవేత్తలు హెచ్చరిస్తున్నారు. కంపెనీలు భారీ లాభాలను ఆర్జిస్తున్నప్పటికీ, స్థానిక గ్రామాలకు కనీస సౌకర్యాలు అందడం లేదని, పునరావాస ప్యాకేజీలు సక్రమంగా అమలు కావడం లేదని ప్రజల్లో ఆగ్రహం పేరుకుపోయింది. ఈ ఘటన ఛత్తీస్‌గఢ్‌లో పారిశ్రామిక అభివృద్ధికి మరియు స్థానిక ప్రజల హక్కులకు మధ్య ఉన్న తీవ్ర సంఘర్షణను మరోసారి బయటపెట్టింది.

Follow us